2 Kronika
17 Ni ebinuu Yehoshafat+ baye maŋtsɛ yɛ esɛɛ, ni ewaje ehe yɛ Israel nɔ. 2 Ekɛ asraafoi to Yuda maji ni atswa gbogboi awo amɛhe lɛ fɛɛ amli ni eto asraafoi akui yɛ Yuda shikpɔŋ lɛ nɔ, kɛ agbɛnɛ hu, yɛ Efraim maji ni etsɛ Asa shɔ̃ lɛ amli.+ 3 Yehowa tee nɔ eye ebua Yehoshafat* ejaakɛ Yehoshafat nyiɛ yɛ gbɛi ni etsɛ David nyiɛ nɔ yɛ blema lɛ anɔ,+ ni eyasɔmɔɔɔ Baal srɔtoi lɛ.* 4 Ejaakɛ etao etsɛ Nyɔŋmɔ lɛ sɛɛ gbɛ,+ ni eye ekitã lɛ nɔ,* ni efeee nibii ni Israelbii lɛ feɔ lɛ.+ 5 Yehowa hã maŋtsɛyeli lɛ ma shi shiŋŋ yɛ edɛŋ;+ ni Yudabii lɛ fɛɛ bakeɔ Yehoshafat nii, ni ená nii babaoo kɛ anunyam kpele.+ 6 Ekɛ ekãa* nyiɛ Yehowa gbɛi lɛ anɔ, ni ejie hei grɔŋŋi+ lɛ kɛ wɔŋ tsei*+ lɛ po kɛje Yuda.
7 Yɛ enɔyeli afi ni ji etɛ lɛ nɔ lɛ, etsu ni ayatsɛ elumɛi lɛ, ni ji Ben-hail, kɛ Obadia, kɛ Zakaria, kɛ Netanel, kɛ Mikaia kɛba, koni amɛyatsɔɔ nii yɛ Yuda maji lɛ amli. 8 Levibii nɛɛ fata amɛhe: Shemaia, kɛ Netania, kɛ Zebadia, kɛ Asahel, kɛ Shemiramot, kɛ Yehonatan, kɛ Adonia, kɛ Tobia, kɛ Tob-adonia, ni osɔfo Elishama kɛ osɔfo Yehoram hu fata amɛhe.+ 9 Amɛyatsɔɔ nii yɛ Yuda, ni amɛhiɛ Yehowa Mla wolo lɛ kɛtee,+ ni amɛyakpa Yuda maji lɛ fɛɛ amli ni amɛtsɔɔ maŋbii lɛ nii.
10 Ni Yehowa hã gbeyei mɔmɔ shikpɔji ni bɔle Yuda he lɛ anɔ maŋtsɛyelii lɛ fɛɛ, ni amɛkɛ Yehoshafat wuuu ta. 11 Ni Filistibii lɛ bahãa Yehoshafat nikeenii kɛ shika akɛ maŋ too. Ni Arabbii lɛ kɛ amɛkooloi lɛ ateŋ gwantɛŋhii 7,700 kɛ abotiahii 7,700 bahãa lɛ.
12 Yehoshafat tee nɔ ená hewalɛ babaoo,+ ni etee nɔ eto maji ni atswa gbogboi awo amɛhe+ kɛ maji ni akɛ nibii toɔ mli+ yɛ Yuda. 13 Efee nibii babaoo yɛ Yuda maji lɛ amli ni eyɛ asraafoi, ni ji tawulɔi kãkãlɔi yɛ Yerusalem. 14 Abua amɛnaa kuikui yɛ amɛtsɛmɛi ashĩai lɛ anaa: yɛ Yuda asraafoi akpei anɔkwɛlɔi lɛ ateŋ lɛ, tatsɛ Adna, ni tawulɔi kãkãlɔi 300,000 fata ehe.+ 15 Ni tatsɛ Yehohanan yɛ eshishi, ni lɛ hu mɛi 280,000 fata ehe. 16 Ni Zikri binuu Amasia, mɔ ni kɛ ehe hã Yehowa sɔɔmɔ lɛ hu yɛ eshishi, ni lɛ hu, tawulɔi kãkãlɔi 200,000 fata ehe. 17 Ni yɛ Benyaminbii+ lɛ ateŋ lɛ, Eliada, ni ji tawulɔ kãkãlɔ lɛ, ni hii 200,000 ni hiɛɔ gãi kɛ tsɛŋ fata ehe.+ 18 Ni Yehozabad yɛ eshishi, ni lɛ hu hii 180,000 ni awula amɛ kɛhã ta fata ehe. 19 Mɛnɛɛmɛi sɔmɔɔ maŋtsɛ lɛ, soro mɛi ni maŋtsɛ lɛ eto yɛ maji ni atswa gbogboi awo amɛhe yɛ Yuda fɛɛ mli lɛ.+