3 Mose
9 Gbi ni ji kpaanyɔ lɛ nɔ lɛ,+ Mose tsɛ Aaron kɛ ebihii lɛ kɛ Israel onukpai lɛ. 2 Ekɛɛ Aaron akɛ: “Ŋɔɔ tsinabi kome kɛ gwantɛŋnuu kome ni kpa ko bɛ amɛhe ni okɛ amɛ aba Yehowa hiɛ; okɛ tsinabi lɛ ashã esha afɔle+ ni okɛ gwantɛŋnuu lɛ hu ashã shãa afɔle ohã ohe. 3 Shi kɛɛmɔ Israelbii lɛ akɛ, ‘Nyɛŋɔa abotianuu kome kɛhã esha afɔle kɛ tsinabi ni eye afi kɛ gwantɛŋnuu* ni eye afi ni kpa ko bɛ amɛhe ni akɛshã shãa afɔle, 4 kɛ tsinanuu kome kɛ gwantɛŋnuu kome kɛhã naanyobɔɔ afɔle,+ koni akɛ amɛ ashã afɔle yɛ Yehowa hiɛ, kɛ ŋmaa* afɔle+ hu ni akɛ mu efutu, ejaakɛ ŋmɛnɛ lɛ, Yehowa baajie ehe kpo etsɔɔ nyɛ.’”+
5 No hewɔ lɛ, amɛkɛ nibii ni Mose fã amɛ akɛ amɛkɛba lɛ ba kpee buu lɛ hiɛ. Ni maŋ muu lɛ fɛɛ ba amɛbadamɔ Yehowa hiɛ. 6 Ni Mose kɛɛ: “Enɛ ji nɔ ni Yehowa efã akɛ nyɛfee, koni Yehowa ajie enunyam lɛ kpo etsɔɔ nyɛ.”+ 7 Kɛkɛ ni Mose kɛɛ Aaron akɛ: “Tsi obɛŋkɛ afɔleshaa latɛ lɛ, ni oshã esha afɔle+ kɛ shãa afɔle ohã ohe, ní okɛkpãtã ohã bo diɛŋtsɛ ohe+ kɛ oshĩa lɛ hu; ní oshã maŋ lɛ afɔle lɛ,+ ni okɛkpãtã ohã amɛ,+ tamɔ bɔ ni Yehowa fã lɛ pɛpɛɛpɛ.”
8 Amrɔ nɔŋŋ lɛ, Aaron tsi ebɛŋkɛ afɔleshaa latɛ lɛ, ni egbe tsinabi ni ekɛbaashã esha afɔle ehã ehe lɛ.+ 9 Ni Aaron bihii lɛ ŋɔ lá lɛ amɛhã+ lɛ, ni ekɛ ewao tsɔ lá lɛ mli ni ekɛkpa afɔleshaa latɛ lɛ he akolontoi lɛ ahe, ni etsi lá ni shwɛ lɛ eshwie afɔleshaa latɛ lɛ shishi.+ 10 Ejie esha afɔle kooloo lɛ fɔ lɛ kɛ sabai lɛ kɛ fɔ ni yɔɔ mlɛbo lɛ he lɛ, ni eshã* yɛ afɔleshaa latɛ lɛ nɔ, tamɔ bɔ ni Yehowa fã Mose lɛ pɛpɛɛpɛ.+ 11 Ni eshã loo lɛ kɛ hewolo lɛ yɛ nsara lɛ sɛɛ.+
12 No sɛɛ lɛ, egbe shãa afɔle kooloo lɛ, ni Aaron bihii lɛ ŋɔ lá lɛ amɛhã lɛ, ni ekɛshwã afɔleshaa latɛ lɛ koji lɛ fɛɛ ahe kɛkpe.+ 13 Amɛkɛ shãa afɔle kooloo lɛ loo ni afolɔ mli kukuji lɛ kɛ eyitso lɛ hã lɛ, ni eshã yɛ afɔleshaa latɛ lɛ nɔ. 14 Agbɛnɛ hu, efɔ mlinii lɛ kɛ naji lɛ ahe, ni ekɛ fɛɛ shwie shãa afɔle lɛ nɔ yɛ afɔleshaa latɛ lɛ nɔ, ni eshã.
15 No sɛɛ lɛ, ekɛ maŋ lɛ afɔle lɛ ba, eŋɔ abotia ni akɛbaashã esha afɔle ahã maŋ lɛ, ni egbe lɛ, ni ekɛshã esha afɔle tamɔ efee klɛŋklɛŋ nɔ lɛ nɔŋŋ. 16 Ni ekɛ shãa afɔle lɛ ba, ni etsu he nii tamɔ afeɔ daa lɛ.+
17 Enɛ sɛɛ lɛ, ekɛ ŋmaa afɔle lɛ ba,+ ni ekpiti eko ekɔkɔ obɔ, ni ekɛfata shãa afɔle ni ashãa leebi+ lɛ he, ni eshã yɛ afɔleshaa latɛ lɛ nɔ.
18 No sɛɛ lɛ, egbe tsinanuu lɛ kɛ gwantɛŋnuu lɛ ni akɛbaashã naanyobɔɔ afɔle ahã maŋ lɛ. Kɛkɛ ni Aaron bihii lɛ ŋɔ lá lɛ amɛhã lɛ, ni ekɛshwã afɔleshaa latɛ lɛ koji lɛ fɛɛ ahe kɛkpe.+ 19 Shi tsinanuu lɛ fɔi+ lɛ kɛ gwantɛŋnuu lɛ lei agbo lɛ kɛ fɔ ni yɔɔ mlinii lɛ ahe lɛ kɛ sabai lɛ kɛ fɔ ni yɔɔ mlɛbo lɛ he+ lɛ, 20 amɛkɛ fɔi nɛɛ fɛɛ shwie tsitsii lɛ anɔ, no sɛɛ lɛ, eshã fɔi lɛ yɛ afɔleshaa latɛ lɛ nɔ.+ 21 Shi tsitsii lɛ kɛ nanejurɔ lɛ, Aaron fɔ̃ kɛtee kɛba yɛ Yehowa hiɛ akɛ fɔ̃ɔ afɔle, tamɔ bɔ ni Mose fã lɛ pɛpɛɛpɛ.+
22 Ni be ni Aaron shã esha afɔle kɛ shãa afɔle kɛ naanyobɔɔ afɔlei lɛ egbe naa lɛ, etsɔ ehiɛ ehã maŋbii lɛ, ni ehole eniji anɔ ni ejɔɔ amɛ,+ kɛkɛ ni ekpeleke shi. 23 Naagbee lɛ, Mose kɛ Aaron tee kpee buu lɛ mli, ni amɛje kpo amɛbajɔɔ maŋbii lɛ.+
Kɛkɛ ni Yehowa jie enunyam lɛ kpo etsɔɔ maŋbii lɛ fɛɛ,+ 24 ni la jɛ Yehowa ŋɔɔ+ ebashã shãa afɔle lɛ kɛ fɔi lɛ ni yɔɔ afɔleshaa latɛ lɛ nɔ lɛ wɛlɛŋŋ. Be ni maŋbii lɛ fɛɛ na enɛ lɛ, amɛbɔi bolɔmɔ kɛ miishɛɛ, ni amɛkɛ amɛhiɛiaŋ bumɔ shi.+