Kojolɔi
18 Nakai bei lɛ amli lɛ, abɛ maŋtsɛ yɛ Israel.+ Ni yɛ nakai bei lɛ amli hu lɛ, Dan weku+ lɛ miitao he ko amɛhi,* ejaakɛ kɛbashi nakai beiaŋ lɛ amɛnine shɛko gboshinii ko nɔ yɛ Israel wekui lɛ ateŋ.+
2 Danbii lɛ tsu amɛweku lɛ mli hii enumɔ, ni ji hii kãkãlɔi, kɛjɛ Zora kɛ Eshtaol+ koni amɛyakpá shikpɔŋ lɛ shi ni amɛkwɛ bɔ ni eshikamɔ yɔɔ. Amɛkɛɛ amɛ akɛ: “Nyɛyaa ni nyɛyakwɛa bɔ ni shikpɔŋ lɛ shikamɔ yɔɔ.” Be ni amɛshɛ he ni Mika+ shĩa lɛ yɔɔ yɛ Efraim gɔji lɛ anɔ lɛ, amɛwɔ jɛmɛ kɛyashi je tsɛre. 3 Be ni amɛbɛŋkɛ Mika shĩa lɛ, amɛyoo oblanyo Levinyo lɛ gbee, no hewɔ lɛ, amɛtee eŋɔɔ ni amɛbi lɛ akɛ: “Namɔ kɛ bo ba biɛ? Mɛni ofeɔ yɛ biɛ? Mɛni hewɔ oyɔɔ biɛ?” 4 Ehã amɛ hetoo akɛ: “Nɛkɛ kɛ nɛkɛ ji nɔ ni Mika fee ehã mi, ni ebɔ mi apaa koni misɔmɔ akɛ osɔfo mihã lɛ.”+ 5 Kɛkɛ ni amɛkɛɛ lɛ akɛ: “Ofainɛ bi Nyɔŋmɔ ohã wɔ akɛ wɔgbɛfãa lɛ baaye omanye lo.” 6 Osɔfo lɛ kɛɛ amɛ akɛ: “Nyɛyaa yɛ toiŋjɔlɛ mli. Yehowa fata nyɛhe yɛ nyɛgbɛfãa lɛ mli.”
7 No hewɔ lɛ, hii enumɔ lɛ tsa amɛgbɛfãa lɛ nɔ ni amɛyashɛ Laish.+ Amɛna akɛ mɛi ni yɔɔ jɛmɛ lɛ kɛ amɛhe fɔ̃ɔ amɛ diɛŋtsɛ amɛhe nɔ tamɔ Sidonbii lɛ. Amɛhiɔ shi kpoo ni amɛkpaaa nɔ fɔŋ ko gbɛ,+ ni yiwalɔ ko bɛ shikpɔŋ lɛ nɔ ni baagba amɛnaa. Amɛkɛ Sidonbii lɛ ateŋ jekɛ, ni amɛkɛ mɔ ko mɔ ko bɛ sharamɔ ko.
8 Be ni amɛku amɛsɛɛ kɛtee amɛnyɛmimɛi lɛ aŋɔɔ yɛ Zora kɛ Eshtaol+ lɛ, amɛnyɛmimɛi lɛ bi amɛ akɛ: “Te nibii tee lɛ tɛŋŋ?” 9 Amɛkɛɛ amɛ akɛ: “Nyɛhãa wɔkwɔa kɛyaa ni wɔyatutuaa amɛ, ejaakɛ wɔna akɛ shikpɔŋ lɛ hi waa diɛŋtsɛ. Mɛni hewɔ nyɛshashaoɔ shi? Nyɛhe afea oya ni nyɛyaŋɔa shikpɔŋ lɛ. 10 Kɛ́ nyɛyashɛ lɛ, nyɛbaana akɛ mɛi ni yɔɔ jɛmɛ lɛ kpaaa nɔ fɔŋ ko gbɛ,+ ni shikpɔŋ lɛ da. Nyɔŋmɔ kɛ shikpɔŋ lɛ ewo nyɛdɛŋ, eji shikpɔŋ lɛ nɔ he ko ni nɔ ko nɔ ko he ehiaaa mɔ yɛ.”+
11 Kɛkɛ ni Dan weku lɛ mli hii 600 ni ewula kɛhã ta shi Zora kɛ Eshtaol+ kɛtee. 12 Amɛkwɔ kɛtee ni amɛyabɔ nsara yɛ he ko ni bɛŋkɛ Kiriat-yearim+ yɛ Yuda. No hewɔ ni atsɛɔ he nɛɛ, ni yɔɔ Kiriat-yearim anai lɛ akɛ Mahane-dan*+ kɛbashi ŋmɛnɛ lɛ. 13 Amɛjɛ jɛmɛ kɛtee Efraim gɔji lɛ anɔ, ni amɛyashɛ Mika+ shĩa lɛ.
14 Kɛkɛ ni hii enumɔ lɛ ni tee amɛyakpá Laish+ shikpɔŋ lɛ shi lɛ kɛɛ amɛnyɛmimɛi lɛ akɛ: “Ani nyɛle akɛ efɔd kɛ terafim amagai,* amaga ni agbɔ,* kɛ dade amaga yɛ shĩa nɛɛ lo?+ Nyɛjwɛŋa nɔ ni esa akɛ nyɛfee lɛ he.” 15 No hewɔ lɛ, amɛwa jɛmɛ ni amɛtee oblanyo Levinyo+ lɛ shĩa, yɛ Mika shĩa lɛ, ni amɛyabi eshi. 16 Be nɛɛ fɛɛ lɛ, Dan weku lɛ mli hii 600+ ni ewula kɛhã ta lɛ damɔ agbó lɛ naa. 17 Hii enumɔ ni tee amɛyakpá shikpɔŋ lɛ shi+ lɛ bote shĩa lɛ mli ni amɛyaloo amaga ni agbɔ* lɛ, kɛ efɔd+ lɛ, kɛ terafim amagai*+ lɛ, kɛ dade amaga+ lɛ. (No mli lɛ, osɔfo+ lɛ kɛ hii 600 ni ewula kɛhã ta lɛ damɔ agbó lɛ naa.) 18 Amɛbote Mika shĩa lɛ mli ni amɛyaloo amaga ni agbɔ* lɛ, kɛ efɔd lɛ, kɛ terafim amagai* lɛ, kɛ dade amaga lɛ. Osɔfo lɛ bi amɛ akɛ: “Mɛni nyɛfeɔ lɛ?” 19 Shi amɛkɛɛ lɛ akɛ: “Feemɔ diŋŋ. Okɛ onine ato onaa ni okɛ wɔ aya ni otsɔ tsɛ* kɛ osɔfo ohã wɔ. Te nɔ ni hi lɛ—akɛ obaaye osɔfo ohã nuu kome+ shĩa aloo ni obaaye osɔfo ohã weku kɛ shĩa muu ko yɛ Israel?”+ 20 No hewɔ lɛ, osɔfo lɛ ná nɔ ni amɛwie lɛ he miishɛɛ, ni eŋɔ efɔd lɛ, kɛ terafim amagai* lɛ, kɛ amaga ni agbɔ*+ lɛ ni ekɛ mɛi lɛ tee.
21 Kɛkɛ ni amɛtsɔ amɛhe koni amɛyi gbɛ; amɛkɛ gbekɛbii lɛ, kɛ kooloi lɛ, kɛ amɛnibii ni jara wawai lɛ ye amɛhiɛ. 22 Be ni amɛkɛ Mika shĩa lɛ teŋ ejekɛ lɛ, hii ni yɔɔ shĩai ni bɛŋkɛ Mika shĩa lɛ amli lɛ bua amɛhe naa, ni amɛyanina Danbii lɛ. 23 Be ni amɛbo amɛtsɛ Danbii lɛ, amɛtsɔ amɛhe ni amɛbi Mika akɛ: “Mɛni sane? Mɛni hewɔ obua mɛi anaa kɛnyiɛ wɔsɛɛ?” 24 No hewɔ lɛ, ekɛɛ amɛ akɛ: “Nyɛbaloo minyɔŋmɔi ni mifee lɛ, ni nyɛbamɔ osɔfo lɛ hu kɛtee. Mɛni shwɛɔ mi? Te feɔ tɛŋŋ nyɛbiɔ mi akɛ, ‘Mɛni sane lɛ?’” 25 Danbii lɛ kɛɛ lɛ akɛ: “Kaawó ogbee nɔ yɛ wɔnɔ; kɛjeee nakai lɛ hii ni mli ewo la* baatutua nyɛ, ni no baahã owala* kɛ oshĩabii lɛ awala* aje nyɛdɛŋ.” 26 No hewɔ lɛ, Danbii lɛ yi gbɛ amɛtee; ni akɛni Mika na akɛ amɛhe wa fe lɛ hewɔ lɛ, etsɔ ehe ni eku esɛɛ kɛtee eshĩa lɛ.
27 Be ni amɛŋɔ nibii ni Mika efee lɛ kɛ esɔfo lɛ, amɛtee Laish,+ kɛtee mɛi ni yɔɔ kpoo ni kpaaa nɔ fɔŋ ko gbɛ lɛ aŋɔɔ.+ Amɛkɛ klante gbegbee mɛi ni yɔɔ maŋ lɛ mli lɛ, ni amɛkɛ la shã maŋ lɛ. 28 Mɔ ko mɔ ko bɛ ni baahere maŋ lɛ, ejaakɛ ekɛ Sidon teŋ jekɛ ni amɛkɛ mɔ ko mɔ ko bɛ sharamɔ ko, ni ekã Bet-rehob jɔɔ lɛ mli.+ Amɛtswa maŋ lɛ ekoŋŋ ni amɛhi mli. 29 Ni amɛtsɛ maŋ lɛ Dan,+ ejaakɛ atsɛɔ amɛtsɛ, ni ji Israel bi lɛ, Dan.+ Shi tsutsu lɛ atsɛɔ maŋ lɛ Laish.+ 30 No sɛɛ lɛ, Danbii lɛ kɛ amaga ni agbɔ*+ lɛ ma shi kɛhã amɛhe, ni Yonatan,+ Mose binuu Gershom+ binuu lɛ, kɛ ebihii lɛ batsɔmɔ osɔfoi kɛhã Dan weku lɛ kɛyashi gbi nɔ ni aŋɔ mɛi ni yɔɔ shikpɔŋ lɛ nɔ lɛ nom. 31 Ni amɛkɛ amaga ni Mika gbɔ* lɛ ma shi, ni ehi jɛmɛ yɛ gbii ni anɔkwa Nyɔŋmɔ lɛ shĩa lɛ yɔɔ Shilo+ lɛ fɛɛ amli.