Klɛŋklɛŋ Wolo Ni Akɛmaje Tesalonikabii Lɛ

3 No hewɔ lɛ, be ni wɔnyɛɛɛ naa wɔdamɔ dɔŋŋ lɛ, wɔsusu akɛ ehi jogbaŋŋ akɛ wɔ pɛ wɔya nɔ wɔhi Atene;+ 2 ni wɔtsu Timoteo,+ ni ji wɔnyɛmi nuu kɛ Nyɔŋmɔ sɔɔlɔ* yɛ Kristo lɛ he sane kpakpa lɛ mli lɛ, koni ebawo nyɛ hewalɛ* ni eshɛje nyɛmii yɛ nyɛhemɔkɛyeli lɛ hewɔ, 3 koni amanehului nɛɛ akahoso mɔ ko mɔ ko.* Ejaakɛ nyɛ diɛŋtsɛ nyɛle akɛ wɔnyɛŋ wɔjo nɔnai nɛɛ anaa foi.*+ 4 Ejaakɛ be ni wɔkɛ nyɛ yɔɔ lɛ, wɔkɛɛ nyɛ wɔto akɛ wɔbaana amanehulu, ni tamɔ bɔ ni nyɛle lɛ, eba mli nakai.+ 5 No hewɔ ni be ni minyɛɛɛ naa madamɔ dɔŋŋ lɛ, mitsu koni mikɛle nyɛnɔkwayeli lɛ he sane,+ akɛ aleenɔ Mɔ Ni Kaa Mɔ+ lɛ ebaka nyɛ yɛ gbɛ ko nɔ, ni nitsumɔ ni wɔtsu waa lɛ efee efolo lo.

6 Shi amrɔ nɛɛ, Timoteo ejɛ nyɛŋɔɔ eba wɔŋɔɔ,+ ni ebagba wɔ nyɛnɔkwayeli lɛ kɛ nyɛsuɔmɔ lɛ he sane kpakpa, akɛ nyɛyaa nɔ nyɛkaiɔ wɔ kɛ miishɛɛ be fɛɛ be, ni akɛ, nyɛmiishwe ni nyɛna wɔ, tamɔ bɔ ni wɔ hu wɔshweɔ ni wɔna nyɛ lɛ. 7 Nyɛmimɛi, no hewɔ ni yɛ wɔhaomɔ* kɛ wɔmanehulu lɛ fɛɛ mli lɛ, nyɛ kɛ agbɛnɛ hu, anɔkwayeli ni nyɛjieɔ lɛ kpo lɛ eshɛje wɔmii lɛ.+ 8 Ejaakɛ kɛ́ nyɛmiidamɔ shi shiŋŋ yɛ Nuŋtsɔ lɛ mli lɛ, wɔnáa hewalɛ hee.* 9 Ejaakɛ mɛɛ shidaa po wɔɔnyɛ wɔkɛhã Nyɔŋmɔ yɛ nyɛhewɔ koni wɔkɛto miishɛɛ kpele ni wɔná yɛ nyɛhewɔ yɛ wɔ-Nyɔŋmɔ lɛ hiɛ lɛ najiaŋ? 10 Jenamɔ kɛ jetsɛremɔ fɛɛ lɛ, wɔkɛ hiɛdɔɔ kpaa fai waa bɔ ni wɔɔnyɛ koni wɔna nyɛhiɛ* ni wɔkɛ nɔ ni eshwɛ nyɛ yɛ nyɛhemɔkɛyeli lɛ gbɛfaŋ lɛ ahã nyɛ.+

11 Agbɛnɛ, wɔ-Nyɔŋmɔ kɛ wɔ-Tsɛ lɛ diɛŋtsɛ kɛ wɔ-Nuŋtsɔ Yesu agbele gbɛ ko ahã wɔ koni wɔba nyɛŋɔɔ. 12 Agbɛnɛ hu, Nuŋtsɔ lɛ ahã suɔmɔ ni nyɛkɛsumɔsumɔɔ nyɛhe kɛ mɛi fɛɛ lɛ afa fe tsutsu lɛ, hɛɛ, eteke nɔ,+ tamɔ bɔ ni wɔ hu wɔsumɔɔ nyɛ babaoo lɛ, 13 koni ehã nyɛtsuii ahe awa, ni shwamɔ ko akahi he yɛ krɔŋkrɔŋfeemɔ mli yɛ wɔ-Nyɔŋmɔ kɛ wɔ-Tsɛ lɛ hiɛ+ yɛ be ni wɔ-Nuŋtsɔ Yesu eba+ ni emɛi krɔŋkrɔŋi lɛ fɛɛ fata ehe lɛ mli.