1 Maŋtsɛmɛi
15 Yɛ Maŋtsɛ Yeroboam,+ Nebat binuu lɛ nɔyeli afi ni ji 18 lɛ nɔ lɛ, Abiyam batsɔ Yuda maŋtsɛ.+ 2 Eye maŋtsɛ afii etɛ yɛ Yerusalem. Atsɛɔ emami akɛ Maaka;+ Maaka ji Abishalom* nabi. 3 Etee nɔ enyiɛ yɛ eshai fɛɛ ni epapa fee kɛtsɔ ehiɛ lɛ mli, ni ekɛ etsui muu fɛɛ* hãaa Yehowa, e-Nyɔŋmɔ lɛ tamɔ etsɛ David kɛ etsui hã Nyɔŋmɔ lɛ. 4 Shi David hewɔ lɛ,+ Yehowa, e-Nyɔŋmɔ lɛ, wó Abiyam binuu maŋtsɛ yɛ esɛɛ koni Yerusalem aya nɔ ahi shi,+ bɔ ni afee ni ená seshi ko ni baaya nɔ aye nɔ* yɛ Yerusalem. 5 Ejaakɛ David fee nɔ ni ja yɛ Yehowa hiɛ, ni egbaaa afã kɛjeee kitãi fɛɛ ni Nyɔŋmɔ wo lɛ lɛ he ewala gbii abɔ fɛɛ, ja Uria, Hitnyo lɛ sane lɛ mli pɛ.+ 6 Ni Rehoboam kɛ Yeroboam kɛ amɛhe wu ta ewala gbii abɔ fɛɛ.+
7 Shi Abiyam shihilɛ mli saji krokomɛi fɛɛ, nibii fɛɛ ni efee lɛ, aŋmala yɛ Yuda maŋtsɛmɛi ayinɔsaji awolo lɛ mli.+ Ta te shi yɛ Abiyam kɛ Yeroboam teŋ.+ 8 Kɛkɛ ni Abiyam gbo* ni afu lɛ yɛ David Maŋ lɛ mli; ni ebinuu Asa+ baye maŋtsɛ yɛ esɛɛ.+
9 Yɛ Israel maŋtsɛ Yeroboam nɔyeli afi ni ji 20 lɛ nɔ lɛ, Asa baye Yuda nɔ maŋtsɛ. 10 Eye maŋtsɛ afii 41 yɛ Yerusalem. Atsɛɔ enaa akɛ Maaka;+ Maaka ji Abishalom* nabi. 11 Asa fee nɔ ni ja yɛ Yehowa hiɛ+ tamɔ etsɛ David. 12 Eshwie hii ni hãa hii krokomɛi kɛ amɛ náa bɔlɛ* yɛ jamɔhei lɛ yɛ shikpɔŋ lɛ nɔ,+ ni ejie amagai ni yɔɔ nyaŋemɔ* ni etsɛmɛi lɛ fee lɛ fɛɛ.+ 13 Ehã enaa Maaka+ po kpa maŋnyɛyeli, ejaakɛ no mli lɛ, enaa efee amaga ko ni bɛ hiŋmɛi nɔ, ni akɛjáa wɔŋ tso* lɛ. Asa fo amaga ni bɛ hiŋmɛi nɔ ni enaa fee lɛ,+ ni eyashã yɛ Kidron Jɔɔ lɛ mli.+ 14 Shi ajieee hei grɔŋŋi lɛ.+ Fɛɛ sɛɛ lɛ, Asa kɛ etsui muu fɛɛ* hã Yehowa ewala gbii abɔ fɛɛ. 15 Ni ekɛ nibii ni lɛ kɛ epapa jɔɔ nɔ* lɛ ba Yehowa shĩa lɛ—jwiɛtɛi kɛ shika tsuru kɛ nibii krokomɛi.+
16 Nakai beiaŋ fɛɛ lɛ, Asa kɛ Israel maŋtsɛ Baasha+ kɛ amɛhe wu ta. 17 No hewɔ lɛ, Israel maŋtsɛ Baasha kwɔ kɛba koni ekɛ Yuda abawu, ni ebɔi gbogbotswaa kɛ Rama+ he woo* koni mɔ ko mɔ ko akaya Yuda maŋtsɛ Asa ŋɔɔ loo ejɛ eŋɔɔ kɛba.*+ 18 Kɛkɛ ni Asa ŋɔ jwiɛtɛi lɛ kɛ shika tsuru lɛ fɛɛ ni eshwɛ yɛ Yehowa shĩa lɛ jwetritoohei lɛ kɛ maŋtsɛ shĩa lɛ jwetritoohei lɛ, ni ekɛhã etsuji lɛ. Kɛkɛ ni Maŋtsɛ Asa kɛtsu amɛ kɛtee Hezion binuu Tabrimon binuu Ben-hadad, ni ji Siria maŋtsɛ+ ni yɔɔ Damasko lɛ ŋɔɔ, ekɛɛ: 19 “Kpaŋmɔ kã mi kɛ bo teŋ kɛ mipapa kɛ opapa teŋ. Mikɛ jwiɛtɛi kɛ shika tsuru miitsu kɛmiiba abahã bo akɛ nikeenii. No hewɔ lɛ, ba ni obaku kpaŋmɔ ni yɔɔ okɛ Israel maŋtsɛ Baasha teŋ lɛ mli, koni eshi mishikpɔŋ lɛ nɔ.” 20 Ben-hadad bo Maŋtsɛ Asa toi ni etsu etatsɛmɛi lɛ koni amɛkɛ Israel maji lɛ ayawu, ni amɛtswia Yion+ kɛ Dan+ kɛ Abel-bet-maaka kɛ Kineret kpokpaa lɛ fɛɛ, kɛ Naftali shikpɔŋ lɛ fɛɛ nii. 21 Be ni Baasha nu he lɛ, oya nɔŋŋ ni ekpa gbogbo ni etswaa ewoɔ Rama he lɛ,* ni etee nɔ ehi shi yɛ Tirza.+ 22 Kɛkɛ ni Maŋtsɛ Asa bua Yuda fɛɛ naa—ashiii mɔ ko mɔ ko—ni amɛhole tɛi kɛ tsei ni Baasha kɛtswaa Rama lɛ, ni Maŋtsɛ Asa kɛyatswa gbogbo ewo Geba+ he* yɛ Benyamin, ni ekɛtswa gbogbo ewo Mizpa+ hu he.*
23 Asa shihilɛ mli saji krokomɛi fɛɛ, nibii wuji fɛɛ ni efee kɛ nibii fɛɛ ni efee kɛ maji fɛɛ ni etswa gbogboi ewo amɛhe lɛ,* aŋmala yɛ Yuda maŋtsɛmɛi ayinɔsaji awolo lɛ mli. Shi be ni egbɔ lɛ, eye nane hela ko.+ 24 Kɛkɛ ni Asa gbo* ni afu lɛ yɛ etsɛ David Maŋ lɛ mli; ni ebinuu Yehoshafat+ baye maŋtsɛ yɛ esɛɛ.
25 Yeroboam binuu Nadab+ batsɔ Israel maŋtsɛ yɛ Yuda maŋtsɛ Asa nɔyeli afi ni ji enyɔ lɛ nɔ, ni eye Israel nɔ afii enyɔ. 26 Etee nɔ efee efɔŋ yɛ Yehowa hiɛ ni enyiɛ epapa+ gbɛ lɛ nɔ kɛ esha ni epapa hã Israel fee lɛ mli.+ 27 Baasha, ni ji Ahiya ni jɛ Isakar shĩa lɛ binuu lɛ kpaŋ eyi nɔ, ni Baasha tswa Nadab nɔ yɛ Gibeton,+ ni ji Filistibii lɛ anɔ lɛ, be ni Nadab kɛ Israel fɛɛ eyawo Gibeton he ka lɛ. 28 No hewɔ lɛ, Baasha gbe lɛ yɛ Yuda maŋtsɛ Asa nɔyeli afi ni ji etɛ lɛ nɔ, ni Baasha batsɔ maŋtsɛ yɛ esɛɛ. 29 Be ni ebatsɔ maŋtsɛ nɔŋŋ pɛ lɛ, etswia Yeroboam shĩabii lɛ fɛɛ nii. Eshiii mɔ ko mɔ ko* yɛ Yeroboam shĩa lɛ; ekpãtã amɛ fɛɛ amɛhiɛ tamɔ bɔ ni Yehowa tsɔ etsulɔ Ahiya, Shilonyo lɛ nɔ ewie lɛ.+ 30 Enɛ ba lɛ nakai yɛ esha ni Yeroboam fee kɛ esha ni ehã Israel fee lɛ hewɔ, kɛ agbɛnɛ hu, Yehowa, Israel Nyɔŋmɔ lɛ mli la ni ewo waa lɛ hewɔ. 31 Nadab shihilɛ mli saji krokomɛi fɛɛ, nibii fɛɛ ni efee lɛ, aŋmala yɛ Israel maŋtsɛmɛi ayinɔsaji awolo lɛ mli. 32 Nakai beiaŋ fɛɛ lɛ, Asa kɛ Israel maŋtsɛ Baasha kɛ amɛhe wu ta.+
33 Yɛ Yuda maŋtsɛ Asa nɔyeli afi ni ji etɛ lɛ nɔ lɛ, Ahiya binuu Baasha batsɔ maŋtsɛ yɛ Tirza ni eye Israel fɛɛ nɔ ni eye maŋtsɛ afii 24.+ 34 Shi etee nɔ efee efɔŋ yɛ Yehowa hiɛ,+ ni enyiɛ Yeroboam gbɛ lɛ nɔ kɛ esha ni Yeroboam hã Israel fee lɛ mli.+