1 Nyɛyea Nyɛhe Anɔkwa

NƆ NI ETSƆƆ

Wumɛi kɛ ŋamɛi ni yeɔ amɛhe anɔkwa lɛ naa amɛgbalashihilɛ lɛ akɛ nɔ ko ni esa akɛ ehi shi daa, ni no hãa amɛnuɔ he akɛ amɛhefatalɔ lɛ ejeŋ amɛsɛɛ. Amɛteŋ mɔ fɛɛ mɔ yɛ hekɛnɔfɔɔ akɛ ehefatalɔ lɛ shiŋ lɛ, kɛ́ amɛkɛ naagbai miikpe po.

Wumɛi kɛ ŋamɛi komɛi bɔɔ mɔdɛŋ akɛ amɛbaaya nɔ amɛhi amɛgbalashihilɛ lɛ mli koni amɛkɛsa amɛnanemɛi kɛ amɛwekumɛi ahiɛ. Shi nɔ ni he hiaa fe fɛɛ ji, ni amɛbaaya nɔ amɛhi amɛgbalashihilɛ lɛ mli yɛ suɔmɔ kɛ bulɛ ni amɛyɔɔ kɛhã amɛhe lɛ hewɔ.

BIBLIA MLI SHISHITOO MLA: “Esaaa akɛ wu hu shiɔ eŋa.”​—1 Korintobii 7:11.

“Kɛ́ otswa ofai shi akɛ obaaye ohefatalɔ lɛ anɔkwa lɛ, kɛ́ etɔ̃ onɔ po lɛ, omli fuŋ mra. Moŋ lɛ, okɛbaake lɛ oya nɔŋŋ, ni kɛ́ ehe bahia ni okpa lɛ fai lɛ, obaafee nakai oya. Kɛ́ naagbai ba lɛ, nyɛbaabu amɛ akɛ nibii ni abaanyɛ atsu amɛhe nii, shi jeee nibii ni anyɛŋ amɛhe nii atsu ni baahã nyɛtse gbãla.”​—Micah.

NƆ HEWƆ NI EHE HIAA

Kɛ́ gbalashihilɛ mli hefatalɔi ni lé nɔ hewɔ ni esa akɛ amɛye amɛhefatalɔ lɛ anɔkwa kɛ naagba ko kpe lɛ, nɔ ni amɛkɛɔ nɔŋŋ ji: “Jeee bo ji mɔ ni kulɛ esa akɛ mikɛ hi shi.” Ni amɛtaoɔ gbɛi ni amɛbaatsɔ nɔ ni amɛshi amɛhefatalɔ lɛ.

“Mɛi babaoo boteɔ gbalashihilɛ mli kɛ susumɔ lɛ akɛ, kɛ́ amɛtee ni nibii eyahiii lɛ, amɛbaanyɛ amɛtse gbãla lɛ. Kɛ́ mɛi hiɛ susumɔ ni tamɔ nɛkɛ lɛ, no lɛ, kɛjɛ amɛgbalashihilɛ lɛ shishijee tɔ̃ɔ lɛ, amɛnyɛŋ amɛkpɛtɛ amɛhefatalɔ lɛ he ni amɛye lɛ anɔkwa.”​—Jean.

NƆ NI OBAANYƐ OFEE

OKƐ SAJI NƐƐ APƐI OMLI OKWƐ

Kɛ́ béi ba okɛ ohefatalɔ lɛ teŋ lɛ . . .

• Ani oshwaa ohe akɛ okɛ ohefatalɔ lɛ hi shi?

• Ani osusuɔ akɛ okɛ ashimashi moŋ hi shi kulɛ ehi?

• Ani okɛɔ nɔ ko tamɔ: “Mashi bo” loo “Miyatao mɔ ko ni baasumɔ mi”?

Kɛ́ ohã sanebimɔi nɛɛ ekome po hetoo akɛ hɛɛ lɛ, no lɛ, amrɔ nɛɛ ji be ni sa waa akɛ obaawaje ofai shi ni otswa akɛ obaaye ohefatalɔ lɛ anɔkwa ni okpɛtɛ lɛ lɛ.

OKƐ OHEFATALƆ LƐ ASUSU SANEBIMƆI NI NYIƐ SƐƐ NƐƐ AHE

• Ani bianɛ lɛ, wɔyeee wɔhe anɔkwa tamɔ tsutsu lɛ? Kɛ́ nakai lɛ, mɛni ehã eba lɛ nakai?

• Mɛɛ nibii wɔbaanyɛ wɔfee bianɛ koni wɔye wɔhe anɔkwa tamɔ tsutsu lɛ?

ŊAAWOO

• Yɛ be kɛ beiaŋ lɛ, ŋmaa nɔ ko ohã ohefatalɔ lɛ kɛtsɔɔ akɛ osumɔɔ lɛ

• Okɛ ohefatalɔ lɛ fotoi amamɔ okpɔlɔ lɛ nɔ yɛ onitsumɔhe lɛ kɛtsɔɔ akɛ oosumɔ ni oye lɛ anɔkwa be fɛɛ be

• Daa gbi kɛ́ otee nitsumɔ loo oyɛ he ko ni obɛ ohefatalɔ lɛ masɛi lɛ, tswaa lɛ ni obi lɛ bɔ ni nibii yaa lɛ ehãa

BIBLIA MLI SHISHITOO MLA: “Nɔ ni Nyɔŋmɔ kɛtsa lɛ, gbɔmɔ ko akagbála mli.”​—Mateo 19:6.