Sanegbaa tamɔ briji ni fɔlɔi tsɔɔ nɔ kɛbɛŋkɛɔ amɛbii
KƐHÃ FƆLƆI
5 Sanegbaa
NƆ NI ETSƆƆ
Kɛ́ nyɛhã nyɛbii lɛ le nyɛsusumɔi kɛ bɔ ni nyɛnuɔ nii ahe nyɛhãa, ni nyɛhã amɛ hu amɛtsɔɔ amɛsusumɔi kɛ bɔ ni amɛnuɔ nii ahe amɛhãa lɛ, no tsɔɔ akɛ sanegbaa kpakpa miiya nɔ yɛ nyɛ kɛ amɛteŋ.
NƆ HEWƆ NI EHE HIAA
Bei pii lɛ, kɛ́ gbekɛbii lɛ ye afii 13 kɛmiimɔ afii 19 lɛ, amɛkɛ sanegbaa wa. Be ni nyɛbii lɛ darako lɛ, no mli lɛ, amɛgbaa nyɛ nɔ fɛɛ nɔ. Shi bianɛ ni amɛtsɔmɔ oblahii kɛ oblayei lɛ, amɛkɛ nyɛ efɔɔɔ sanegbaa, no hewɔ lɛ, nyɛleee amɛsusumɔi kɛ bɔ ni amɛnuɔ nii ahe amɛhãa. Etamɔ nɔ ni nyɛdamɔ faa wulu ko afã kome, ni amɛ hu amɛdamɔ efã kroko lɛ. No hewɔ lɛ, kɛ́ efee tamɔ nyɛbii lɛ sumɔɔɔ ni amɛkɛ nyɛ gbaa sane po lɛ, nakai bei amli moŋ ji be ni sa jogbaŋŋ ni esa akɛ nyɛkɛ amɛ agba sane!
NƆ NI NYƐBAANYƐ NYƐFEE
Nyɛnáa be nyɛhãa nyɛbi lɛ be fɛɛ be. Kɛ́ eetao ekɛ nyɛ agba sane nyɔɔŋ teŋ po lɛ, nyɛnáa be nyɛhãa lɛ.
“Ekolɛ obaakɛɛ obi lɛ akɛ, ‘Kpaako otaoɔ okɛ mi awie, mikɛ bo yɛ kɛjɛ leebi lɛ aahu kɛbashi gbɛkɛ nɛɛ okɛɛɛ mi nɔ ko!’ Shi kɛ́ wɔbii lɛ miitao amɛkɛ wɔ agba amɛtsui mli sane lɛ, mɛni hewɔ esa akɛ egba wɔnaa? Ani jeee enɛ fɔlɔ fɛɛ fɔlɔ taoɔ?”—Lisa.
“Mikɛ miwɔ shwɛɛɛ kwraa. Shi bei ni mikɛ mibii lɛ gba sane ni wɔnu he akɛ wɔgba sane jogbaŋŋ lɛ ekomɛi tee nɔ maŋkɛ̃.”—Herbert.
BIBLIA MLI SHISHITOO MLA: “Mɔ ko mɔ ko akaya nɔ etao nɔ ni lɛ diɛŋtsɛ ebaaná he sɛɛ, shi moŋ nɔ ni mɔ kroko baaná he sɛɛ.”—1 Korintobii 10:24.
Nyɛkahãa nɔ ko gbalaa nyɛjwɛŋmɔ. Papa ko wie akɛ: “Bei pii kɛ́ mibii lɛ kɛ mi miiwie lɛ, mijwɛŋmɔ kpaa shi. Amɛnaa akɛ mijwɛŋmɔ yɛ nɔ kroko nɔ shi jeee amɛtoi miboɔ lɛ!”
Kɛ́ bo hu TV gbalaa ojwɛŋmɔ lɛ gbee, ni kɛ́ mobail fon hu lɛ kɛfɔ̃ shi. Okɛ ojwɛŋmɔ amã nɔ ni obi lɛ kɛɔ bo lɛ nɔ, kɛ́ oonu he akɛ nɔ ni ekɛɔ bo lɛ he bɛ sɛɛnamɔ po lɛ, bo lɛ toi jogbaŋŋ ni ohã ena akɛ nɔ ni ekɛɔ bo lɛ he miihia waa.
“Wɔmiisumɔ ni wɔhã wɔbii lɛ ale akɛ bɔ ni amɛnuɔ nii ahe amɛhãa lɛ kã wɔtsui nɔ waa. Kɛ́ wɔhãaa amɛnu he nakai lɛ, amɛkɛ mɛi krokomɛi moŋ baayagba sane ni amɛgbaŋ wɔ bɔ ni amɛnuɔ he amɛhãa.”—Maranda.
“Kɛ́ obi lɛ tsɔɔ esusumɔ yɛ nɔ ko he ni esusumɔ lɛ ejaaa po lɛ, ná tsui ohã lɛ.”—Anthony.
BIBLIA MLI SHISHITOO MLA: “Nyɛjwɛŋmɔ ahia bɔ ni nyɛboɔ nii toi nyɛhãa lɛ nɔ.”—Luka 8:18.
Nyɛtaoa hegbɛi ni baahã nyɛkɛ amɛ agba sane. Bei pii lɛ, gbekɛbii nyɛɔ amɛkɛ amɛfɔlɔi gbaa sane waa kɛ́ amɛkɛ amɛ fee ekome kɛtsu nii yɛ shĩa.
“Kɛ́ wɔta lɔle mli kɛmiiya he ko lɛ, wɔŋɔɔ hegbɛ lɛ ni wɔkɛ amɛ gbaa sane. Akɛni amɛta wɔmasɛi loo wɔkoŋ nɔ hewɔ lɛ, amɛnyɛɔ amɛkɛ wɔ gbaa sane jogbaŋŋ fe kɛ́ amɛta wɔhiɛ.”—Nicole.
Kɛ́ fɔlɔi kɛ amɛbii fee ekome kɛye nii lɛ, ehãa amɛnáa hegbɛ kɛgbaa sane.
“Kɛ́ wɔmiiye wɔgbɛkɛ niyenii lɛ, wɔteŋ mɔ fɛɛ mɔ gbaa nibii kpakpai kɛ nibii gbohii ni tee nɔ yɛ gbi lɛ mli lɛ he sane. Enɛ hãa wɔfeɔ ekome, ni wɔnaa hu akɛ be fɛɛ be ni wɔkɛ naagba ko baakpe lɛ mɔ ko yɛ ni baaye ebua wɔ.”—Robin.
BIBLIA MLI SHISHITOO MLA: “Mɔ fɛɛ mɔ he afee oya kɛ sane toiboo, ekaye ehe oyai kɛwie.”—Yakobo 1:19.