7 Sui Kpakpai

NƆ NI ETSƆƆ

Akɛ fɔlɔi lɛ, nyɛyɛ jeŋba he mlai ni nyɛsumɔɔ ni nyɛhi shi yɛ naa. Akɛ nɔkwɛmɔnɔ lɛ, ani nyɛbɔɔ mɔdɛŋ akɛ nyɛbaaye anɔkwa yɛ nibii fɛɛ mli? Kɛ́ nakai lɛ, no lɛ ekã shi faŋŋ akɛ nyɛbaasumɔ ni nyɛkɛ su kpakpa nɛɛ atsɔse nyɛbii lɛ.

Agbɛnɛ hu, nyɛbaasumɔ ni nyɛtsɔɔ amɛ akɛ ehe miihia ni amɛsumɔ nitsumɔ waa, amɛkakwɛ hiɛiaŋ, ni amɛfee mɛi ni susuɔ mɛi krokomɛi ahe, ni gbekɛbii lɛ baanyɛ akase sui nɛɛ jogbaŋŋ be ni amɛdarako kwraa.

BIBLIA MLI SHISHITOO MLA: “Tsɔsemɔ gbekɛ ni enyiɛ gbɛ ni esa akɛ enyiɛ nɔ lɛ nɔ; ni kɛ́ eda po lɛ, ejeŋ nɔ.”​—Abɛi 22:6.

NƆ HEWƆ NI EHE HIAA

Jeŋba kpakpa he ehia yɛ jeŋ ni ilɛktrɔnik tsɔji ahe nilee etee hiɛ yɛ mli nɛɛ mli. Mami ko ni atsɛɔ lɛ Karyn lɛ wie akɛ, “Ewaaa kwraa akɛ abaanyɛ akwɛ jeŋba gbohii ahe nibii yɛ mobail fon nɔ. Wɔbii lɛ baanyɛ ata wɔmasɛi kpaakpa, shi nakai beiaŋ nɔŋŋ lɛ amɛmiikwɛ nɔ ko gbonyo yɛ mobail fon nɔ!”

BIBLIA MLI SHISHITOO MLA: “Mɛi ni edara lɛ . . . amɛtsɔse amɛjwɛŋmɔ lɛ koni ele ekpakpa kɛ efɔŋ mlikpamɔ.”​—Hebribii 5:14.

Nyɛtsɔa nyɛbii lɛ ni amɛsusu mɛi krokomɛi ahe. Ehe miihia ni nyɛtsɔɔ amɛ ni amɛkɛ wiemɔi ni bulɛ yɔɔ he tamɔ “ofainɛ” kɛ “oyiwaladɔŋŋ” afɔ nitsumɔ, ni amɛsusu mɛi krokomɛi ahe hu, ejaakɛ ŋmɛnɛ lɛ, mɛi kɛ amɛjwɛŋmɔ yaa amɛ-ilɛktrɔnik tsɔji anɔ moŋ fe ni amɛbaasusu mɛi krokomɛi ahe.

BIBLIA MLI SHISHITOO MLA: “Bɔ pɛ ni nyɛtaoɔ akɛ mɛi afee ahã nyɛ lɛ, nyɛfea nakai nɔŋŋ nyɛhãa amɛ.”​—Luka 6:31.

NƆ NI NYƐBAANYƐ NYƐFEE

Nyɛtsɔa amɛ jeŋba he mlai ni nyɛmiisumɔ ni amɛhi shi yɛ naa. Akɛ nɔkwɛmɔnɔ lɛ, niiamlitaomɔ etsɔɔ akɛ kɛ́ ahã oblahii kɛ oblayei le faŋŋ akɛ eji tɔmɔ akɛ amɛbaaná bɔlɛ be ni amɛboteko gbalashihilɛ mli lɛ, ewaŋ akɛ amɛbaatsi amɛhe kɛje he.

ŊAAWOO: Nyɛkɛ nɔ ko ni eba nyɛsɛɛ nɛɛ atsua nii koni nyɛkɛ nyɛbii lɛ agba sui kpakpai ni nyɛbaasumɔ ni amɛná lɛ he sane. Akɛ nɔkwɛmɔnɔ lɛ, kɛ́ nyɛnu yɛ adafitswaa ko mli akɛ mɛi komɛi eyaye awui yɛ hetsɛ̃ hewɔ lɛ, nyɛbaanyɛ nyɛkɛɛ amɛ akɛ, “Bɔ ni mɛi jieɔ hetsɛ̃ ni tamɔ nɛkɛ kpo lɛ ehiii kwraa. Kɛ́ nyɛkwɛ lɛ, mɛni hãa mɛi jieɔ su gbonyo nɛɛ kpo?”

“Ewa akɛ gbekɛbii baakpɛ yiŋ yɛ nɔ ni ja kɛ nɔ ni ejaaa he kɛ́ amɛleee nɔ ni ja kɛ nɔ ni ejaaa.”​—Brandon.

Nyɛtsɔa nyɛbii lɛ ni amɛsusu mɛi krokomɛi ahe. Gbekɛbii bibii po baanyɛ akase bɔ ni akɛɔ “ofainɛ” kɛ “oyiwaladɔŋŋ” ni amɛsusu mɛi krokomɛi ahe. Wolo ko ni gbɛ́i ji Parenting Without Borders lɛ wie akɛ, “Kɛ́ gbekɛbii na akɛ jeee amɛkome pɛ amɛyɔɔ, shi amɛfata mɛi krokomɛi ahe, tamɔ amɛweku, amɛskulbii, loo amɛkutsoŋbii ahe lɛ, amɛfóŋ amɛ pɛ amɛnɔ mli, moŋ lɛ amɛbaajie mlihilɛ kpo ni amɛbaafee nibii ni mɛi krokomɛi baaná he sɛɛ.”

ŊAAWOO: Nyɛhãa nyɛbii lɛ shĩa nifeemɔi koni no ahã amɛkase bɔ ni afeɔ nii ahãa mɛi krokomɛi.

“Kɛ́ wɔbii lɛ kase bɔ ni atsuɔ shĩa nii bianɛ lɛ, wɔsɛɛ kɛ́ amɛkome amɛyahi he ko lɛ etɔŋ amɛ, ejaakɛ amɛle bɔ ni amɛbaatsu amɛ diɛŋtsɛ amɛsɔ̃i ahe nii momo.”​—Tara.