Kɛ́ oboɔ ofɔlɔi toi lɛ, etamɔ nɔ ni oowo nyɔmɔ ko ni ohiɛ bank ko. Kɛ́ owoɔ nyɔmɔ lɛ yɛ be naa lɛ, amɛbaahe bo amɛye, ni amɛbaanyɛ amɛfa bo shika ekoŋŋ
KƐHÃ OBLAHII KƐ OBLAYEI
10 Feemɔ Nibii Ni Baahã Anyɛ Amu Afɔ̃ Onɔ
NƆ NI ETSƆƆ
Kɛ́ oji mɔ ko ni anyɛɔ amuɔ afɔ̃ɔ enɔ lɛ, ofɔlɔi, onanemɛi, kɛ onitsumɔtsɛmɛi baahe bo aye. Mɛi ni amuɔ afɔ̃ɔ amɛnɔ lɛ yeɔ mla nɔ, amɛyeɔ amɛshiwoi anɔ ni amɛwieɔ anɔkwale be fɛɛ be.
NƆ HEWƆ NI EHE HIAA
Bei pii lɛ, kɛ́ abaaŋmɛ bo gbɛ ni ofee nɔ ko lɛ, ebaadamɔ nibii ni ofeɔ ni hãa aheɔ bo ayeɔ lɛ nɔ.
“Gbɛ ni hi fe fɛɛ ni obaanyɛ otsɔ nɔ ni ohã ofɔlɔi ahe bo aye ji, ni ofee nibii ni baahã amɛna akɛ ojwɛŋmɔ esa ni otsuɔ osɔ̃i ahe nii be ni oyɛ amɛmasɛi kɛ be ni obɛ amɛmasɛi fɛɛ.”—Sarahi.
BIBLIA MLI SHISHITOO MLA: “Nyɛyaa nɔ nyɛkaa bɔ ni nyɛji diɛŋtsɛ lɛ nyɛkwɛa.”—2 Korintobii 13:5.
NƆ NI OBAANYƐ OFEE
Kɛ́ ootao ofɔlɔi ahe bo aye waa loo ofɔlɔi heee bo amɛyeee dɔŋŋ yɛ nɔ ko ni ofee hewɔ, ni ootao ni amɛhe bo amɛye ekoŋŋ lɛ, nibii ni nyiɛ sɛɛ nɛɛ baanyɛ aye abua bo.
Ye anɔkwa. Kɛ́ omaleɔ lɛ, mɛi heŋ bo amɛyeŋ. Shi kɛ́ owieɔ anɔkwale be fɛɛ be ni okɛ otɔmɔi eteee lɛ, mɛi baahe bo amɛye waa.
“Kɛ́ nɔ fɛɛ nɔ miiya nɔ jogbaŋŋ lɛ ewaaa akɛ obaaye anɔkwa. Shi kɛ́ anɔkwa ni obaaye lɛ baahã mɛi ana bo akɛ gbɔmɔ gbonyo lɛ, no lɛ, ebɛ mlɛo. Shi bei pii lɛ, no moŋ baahã mɛi ahe bo aye.”—Caiman.
BIBLIA MLI SHISHITOO MLA: “Wɔmiisumɔ ni wɔye anɔkwa yɛ nibii fɛɛ ni wɔfeɔ lɛ amli.”—Hebribii 13:18.
Feemɔ mɔ ni abaanyɛ akɛ hiɛ afɔ̃ enɔ. Niiamlitaomɔ ko ni afee yɛ US lɛ tsɔɔ akɛ, nitsumɔ nɔkwɛlɔi 100 mlijaa 78 kɛɛ akɛ, “kɛ́ mɔ ko miitao ahe lɛ yɛ nitsumɔ ko mli lɛ, nibii titrii etɛ ni ataoɔ yɛ edɛŋ lɛ ateŋ ekome ji, esa akɛ efee mɔ ni abaanyɛ akɛ hiɛ afɔ̃ enɔ.” Kɛ́ obɔ mɔdɛŋ ofee nibii ni baahã mɛi anyɛ amɛkɛ amɛhiɛ afɔ̃ onɔ bianɛ lɛ, ebaaye ebua bo wɔsɛɛ kɛ́ oda.
“Kɛ́ mitsu mishĩa nitsumɔi ni jeee akɛ mifɔlɔi kai mi dani mifee lɛ, amɛnaa. Babaoo ni mifeɔ nakai lɛ, babaoo ni amɛheɔ mi amɛyeɔ waa ji no.”—Sarah.
BIBLIA MLI SHISHITOO MLA: “Miyɛ nɔmimaa akɛ obaabo toi, . . . ejaakɛ mile akɛ obaafee fe bɔ ni mikɛɔ lɛ po.”—Filemon 21.
Too otsui shi. Kɛ́ gbekɛ ko wó kwɔlɛ nɔ loo eeda lɛ, ewaaa akɛ mɛi baana. Shi eheɔ be dani anaa akɛ ejwɛŋmɔ esa ni etsuɔ esɔ̃i ahe nii jogbaŋŋ. Enɛ hewɔ ehe miihia ni oblahii kɛ oblayei ato amɛtsui shi lɛ.
“Jeee nɔ ko ni obaafee shi kome lɛ ni baahã ofɔlɔi kɛ mɛi krokomɛi ahe bo aye, shi kɛ́ otee nɔ otsu osɔ̃i ahe nii fiofio ni ofee nakai be kplaŋŋ lɛ, no baahã amɛhe bo amɛye.”—Brandon.
BIBLIA MLI SHISHITOO MLA: “Nyɛwoa . . . tsuishitoo.”—Kolosebii 3:12.