Yitso 22

Atsɛ Kaselɔi Ejwɛ

BENI abɔ mɔdɛŋ ni agbe Yesu yɛ lɛ diɛŋtsɛ emaŋ yɛ Nazaret lɛ sɛɛ lɛ, efa kɛtee Kapernaum maŋtiase lɛ mli yɛ Galilea Ŋshɔ lɛ masɛi. Enɛ ha Yesaia gbalɛ kroko hu ba mli. No ji nɔ ni atsɔ hiɛ agba efɔ shi akɛ gbɔmɛi ni yɔɔ Galilea ni yɔɔ ŋshɔ lɛ masɛi lɛ baana la kpele ko lɛ.

Beni Yesu yaa nɔ yɛ ela-kpɛmɔ nitsumɔ ni ji Maŋtsɛyeli shiɛmɔ nitsumɔ lɛ mli yɛ biɛ lɛ, ena ekaselɔi lɛ ateŋ mɛi ejwɛ. Mɛnɛɛmɛi kɛ lɛ efa gbɛ yɛ tsutsu ko, shi beni amɛkɛ Yesu ku amɛsɛɛ kɛjɛ Yudea lɛ, amɛsaa amɛtee amɛnitsumɔ ni ji wuoyaa lɛ nɔ ekoŋŋ. Ekolɛ, amrɔ nɛɛ Yesu miitao amɛ, ejaakɛ agbɛnɛ eshɛ be ni esa akɛ ena mɛi ni baaye amɛbua lɛ daa, koni etsɔse amɛ ni amɛtsa sɔɔmɔ nitsumɔ lɛ nɔ yɛ be mli ni etee sɛɛ.

No hewɔ lɛ, beni Yesu nyiɛ ŋshɔ lɛ naa ni ena Simon Petro kɛ ehefatalɔi lɛ ni amɛmiifɔ amɛyaai lɛ ahe lɛ, etee he ni amɛyɔɔ lɛ. Kɛkɛ ni ekwɔ Petro lɛlɛ lɛ ni ekɛɛ lɛ ni ekɛɛ amɛ ni amɛwiri kɛbote nu lɛ mli. Beni amɛtee amɛhiɛ fioo lɛ, Yesu ho eta lɛlɛ lɛ mli ni ebɔi gbɔmɛi asafoi babaoo ni yɔɔ ŋshɔ lɛ naa lɛ nitsɔɔmɔ.

Yɛ sɛɛ mli lɛ, Yesu kɛɛ Petro akɛ: “Nyɛtsia nyɛyaa bu lɛŋ ni nyɛfɔ̃a nyɛyaai lɛ, koni nyɛgbe loo.”

Ni Petro here nɔ akɛ: “Onukpa, nyɔɔŋ nɛɛ fɛɛ, wɔtsu nii dɛŋdɛŋdɛŋ ni wɔnaaa nɔ ko; shi kɛlɛ owiemɔ naa lɛ mafɔ̃ yaa lɛ.”

Beni amɛfɔ̃ yaa lɛ, amɛdu looi babaoo diɛŋtsɛ akɛ eha yaai lɛ bɔi gbalamɔ po. Kɛkɛ ni hii lɛ kɛ oyaiyeli fɔ̃ nine amɛtsɛ amɛnanemɛi ni yɔɔ lɛlɛ kroko ni bɛŋkɛ amɛ lɛ mli lɛ ni amɛbaye amɛbua amɛ. Etsɛɛɛ kɛkɛ ni lɛji enyɔ lɛ fɛɛ yimɔ obɔbɔ kɛ looi babaoo akɛ eha amɛbɔi shiumɔ. Ni amɛna nakai lɛ, Petro ho egbee Yesu naji anaa ni ekɛɛ: “Nuŋtsɔ, jee mimasɛi, ejaakɛ gbɔmɔ eshafeelɔ ji mi!”

Ni Yesu ha lɛ hetoo akɛ: “Kaashe gbeyei! Kɛjɛ be nɛɛ nɔ kɛyaa nɛɛ ooosha gbɔmɛi.”

Agbɛnɛ Yesu fɔ̃ Petro nyɛminuu Andrea hu nine. Ekɛɛ amɛ akɛ: “Nyɛbanyiɛa misɛɛ, ni mafee nyɛ gbɔmɛi ahe wolɛi.” Ni efɔ amɛnanemɛi wolɛi krokomɛi, Yakobo kɛ Yohane, Zebedeo bii lɛ hu nine nakai nɔŋŋ, ni amɛ hu amɛkpɛlɛ nɔ ni amɛshashaooo shi. No hewɔ lɛ mɛi ejwɛ nɛɛ shi amɛwuoyaa nitsumɔ lɛ ni amɛbatsɔmɔ Yesu sɛɛnyiɛlɔi ni kɛ ekaa nyiɛɔ esɛɛ daa lɛ amli klɛŋklɛŋ mɛi ejwɛ. Luka 5:1-11; Mateo 4:13-22; Marko 1:16-20; Yesaia 9:1, 2.

▪ Mɛni hewɔ ni Yesu tsɛ ekaselɔi lɛ ni amɛbanyiɛ esɛɛ lɛ, ni namɛi ji amɛ?

▪ Mɛɛ naakpɛɛ nɔ ko ha Petro tsui fã waa?

▪ Mɛɛ wuoyaa nitsumɔ Yesu fɔ ekaselɔi lɛ anine ni amɛbatsu?