Yitso 23

Naakpɛɛ Nibii Pii yɛ Kapernaum

BENI Hejɔɔmɔ Gbi ni nyiɛ gbi ni Yesu tsɛ ekaselɔi ejwɛ—Petro, Andrea, Yakobo kɛ Yohane—lɛ sɛɛ lɛ shɛ lɛ, amɛ fɛɛ amɛtee kpee he ko ni yɔɔ Kapernaum lɛ mli. Kɛkɛ ni Yesu bɔi nitsɔɔmɔ yɛ jɛmɛ, ni gbɔmɛi lɛ anaa kpɛ amɛhe ejaakɛ etsɔɔ amɛ nii taakɛ mɔ ko ni yɔɔ hegbɛ shi jeee tamɔ woloŋmalɔi lɛ.

Nuu ko ni daimonio yɔɔ emli ba jɛmɛ yɛ nɛkɛ Hejɔɔmɔ Gbi nɛɛ nɔ. Yɛ be fioo sɛɛ lɛ, ekɛ gbee ni wa bo akɛ: “Fɔɔmɔ! Mɛɛ sane wɔkɛo yɔɔ, Yesu Nazarenyo? Oba wɔhiɛ kpatamɔ? Mile mɔ ni jio, bo ji Nyɔŋmɔ Mɔ Krɔŋkrɔŋ lɛ.”

Yɛ anɔkwale mli lɛ daimonio ni kudɔɔ nuu lɛ ji Satan bɔfoi lɛ ateŋ mɔ kome. Ni Yesu ka daimonio lɛ hiɛ, ni ekɛɛ: “Bu onaa, ni oje emli!”

Ni kɛlɛ, mumɔ fɔŋ lɛ ha nɔ nyɔ nuu lɛ nɔ ni eshɔ ni ebɔi bolɔmɔ kɛ gbee ni wa waa. Shi efa kɛjɛ nuu lɛ mli ni eyeee lɛ awui. Enɛ ha mɛi lɛ fɛɛ anaa kpɛ amɛhe diɛŋtsɛ. Amɛbi akɛ: “Mɛni nɛ? Ejaakɛ ekɛ hewalɛ faa mumɔi fɔji lɛ po ni amɛboɔ lɛ toi!” Kɛkɛ ni enɛ he sane gbɛ shwa nakai kpokpaa lɛ fɛɛ nɔ.

Beni Yesu kɛ ekaselɔi lɛ shi kpee he lɛ, amɛtee Simon, loo Petro shia lɛ. Jɛmɛ ni amɛyana akɛ Petro shaayoo ka shi ni flu emɔ lɛ waa. Ni amɛkpa lɛ fai akɛ, ‘ofainɛ ye obua lɛ.’ No hewɔ lɛ Yesu tee jɛmɛ, ni eyamɔ enine mli, ni ewo enɔ edamɔ shi. Ni amrɔ lɛ nɔŋŋ kɛkɛ ni ehe wa lɛ, ni ebɔi niyenii hoomɔ kɛha amɛ!

Yɛ sɛɛ mli, beni hulu yanyɔ shi lɛ, gbɔmɛi ni jɛ hei sɔrɔtoi fɛɛ kɛ amɛmɛi ni he yeɔ lɛ bɔi Petro shia lɛ baa. Etsɛɛɛ kɛkɛ ni maŋ muu lɛ fɛɛ bua amɛhe naa yɛ shia lɛ naa! Ni Yesu tsa amɛmɛi ni he yeɔ lɛ fɛɛ, ní helai ni amɛyeɔ lɛ kɔɔɔ he eko. Eha mɛi ni daimonioi yɔɔ amɛmli lɛ po ye amɛhe. Beni daimonioi ni efamɔ amɛ lɛ jeɔ kpo lɛ, amɛbolɔ akɛ: “Bo ji Nyɔŋmɔ Bi lɛ.” Shi Yesu ka amɛhiɛ ni eŋmɛɛɛ amɛ gbɛ ni amɛwie ejaakɛ amɛle akɛ lɛ ji Kristo lɛ. Marko 1:21-34; Luka 4:31-41; Mateo 8:14-17.

▪ Mɛni ba yɛ kpee he lɛ yɛ Hejɔɔmɔ Gbi ni nyiɛ gbi ni Yesu tsɛ ekaselɔi ejwɛ lɛ sɛɛ lɛ nɔ?

▪ Nɛgbɛ Yesu tee beni eshi kpee he lɛ, ni mɛɛ naakpɛɛ nii efee yɛ jɛmɛ?

▪ Mɛni ba yɛ sɛɛ mli yɛ nakai gbɛkɛ lɛ nɔŋŋ?