Yitso 25

Musuŋtsɔlɛ Kɛha Kpitiyelɔ Ko

BENI Yesu kɛ ekaselɔi ejwɛ lɛ tee Galilea maji lɛ amli lɛ, naakpɛɛ nibii ni efeɔ lɛ he amaniɛbɔɔ gbɛ shwa kpokpaa lɛ nɔ he fɛɛ he. Enifeemɔi lɛ ahe saji yashɛ maŋ ko ni nuu ko ni miiye kpiti hela yɔɔ lɛ hu mli. Tsofatsɛ Luka tsɔɔ bɔ ni eyɔɔ lɛ mli akɛ “ehe eyi obɔ kɛ kpiti.” Kɛ hela ni he yɔɔ gbeyei nɛɛ mli wa waa lɛ, ehaa gbɔmɔtso lɛ hei sɔrɔtoi pii tsakeɔ. No hewɔ lɛ nɛkɛ kpitiyelɔ nɛɛ shihilɛ yɛ mɔbɔ waa diɛŋtsɛ.

Beni Yesu bashɛ maŋ lɛ mli lɛ, kpitiyelɔ lɛ banina lɛ. Taakɛ Nyɔŋmɔ Mla ji lɛ, esa akɛ kpitiyelɔ lɛ abolɔ akɛ, “Mihe tseee, mihe tseee!” koni ekɛbɔ mɛi krokomɛi kɔkɔ ni ebu amɛhe koni amɛkatsi amɛmiibɛŋkɛ lɛ ni amɛna hela lɛ eko. Kɛkɛ ni agbɛnɛ kpitiyelɔ lɛ ho ekɛ ehiɛ bu shi ni ekpa Yesu fai akɛ: “Nuŋtsɔ, kɛji oosumɔ lɛ, ooonyɛ akɛ ohaa mihe tseɔ.”

Mɛɛ hemɔkɛyeli nuu lɛ yɔɔ yɛ Yesu mli nɛkɛ! Ni kɛlɛ, kwɛ bɔ ni ehela lɛ eha enii efee mɔbɔ eha! Mɛni Yesu baafee? Kɛ bo lɛ mɛni obaafee? Akɛni musuŋtsɔlɛ tsirɛ Yesu hewɔ lɛ, ekpa enine mli ni eta nuu lɛ he, ni ekɛɛ: “Miisumɔ, ohe atse!” Ni amrɔ nɔŋŋ ni kpiti lɛ laaje kɛjɛ ehe kwraa.

Ani obaasumɔ mɔ ko ni musuŋ tsɔɔ lɛ tamɔ nɛkɛ akɛ onɔ maŋtsɛ? Gbɛ nɔ ni Yesu tsɔ ekɛ nɛkɛ kpitiyelɔ nɛɛ ye ha lɛ haa wɔ hekɛnɔfɔɔ akɛ yɛ E-Maŋtsɛyeli nɔyeli lɛ mli lɛ, Biblia gbalɛ nɛɛ baaba mli: “Eeena ohiafo kɛ mɔ ni efi lɛ lɛ mɔbɔ, ni eeehere mɛi ni efi amɛ lɛ asusumai ayiwala.” Hɛɛ, Yesu baaha nɔ ni etsui shweɔ akɛ eeeye ebua mɛi fɛɛ ni piŋɔ lɛ aba mli.

Be ni tsɔ kpitiyelɔ lɛ tsamɔ lɛ hiɛ lɛ mli po lɛ, no mli lɛ Yesu sɔɔmɔ nitsumɔ lɛ miiha mɛi amii miishɛ amɛhe waa diɛŋtsɛ. Kɛkɛ ni agbɛnɛ Yesu bɔ nuu ni etsa lɛ lɛ kɔkɔ, yɛ Yesaia gbalɛ lɛ mlibaa kɛ gbeekpamɔ naa akɛ: “Kaakɛɛ mɔ ko.” Kɛkɛ ni efa lɛ akɛ: “Yaa ni okɛ ohe ayatsɔɔ osɔfo lɛ, ni oyasha afɔle yɛ ohetsemɔ lɛ hewɔ, tamɔ bɔ ni Mose wo kita lɛ, koni efee odase eha amɛ.”

Shi nuu lɛ mii eshɛ ehe aahu akɛ enyɛɛɛ etsi naakpɛɛ nii lɛ naa ni etsiii ta. Ni etee ni ebɔi sane lɛ gbaa yɛ he fɛɛ he, ni etamɔ nɔ ni enɛ tee mɛi amiishɛɛ shi waa yɛ Yesu he akɛ no hewɔ lɛ Yesu nyɛɛɛ eya maŋ ko kwraa mli. No hewɔ lɛ, Yesu hi shi yɛ hei banee ni mɔ ko bɛ, ni gbɔmɛi ni jɛ hei sɔrɔtoi fɛɛ baa amɛbaboɔ lɛ toi kɛ agbɛnɛ koni etsa amɛhelai lɛ hu. Luka 5:12-16; Marko 1:40-45; Mateo 8:2-4; 3 Mose 13:45; 14:10-13; Lala 72:13; Yesaia 42:1, 2.

▪ Te kpiti feɔ mɔ ko ehaa tɛŋŋ, ni mɛɛ kɔkɔbɔɔ esa akɛ kpitiyelɔ lɛ kɛha?

▪ Mɛɛ gbɛ nɔ kpitiyelɔ ko bakpa Yesu fai yɛ, ni mɛni wɔbaanyɛ wɔkase kɛjɛ bɔ ni Yesu ha lɛ hetoo lɛ mli?

▪ Mɛɛ gbɛ nɔ nuu ni atsa lɛ lɛ booo Yesu toi yɛ, ni mɛni jɛ mli ba?