Yitso 26

Eku Esɛɛ Eba Emaŋ yɛ Kapernaum

YƐ NƐKƐ be nɛɛ mli lɛ, no mli lɛ Yesu gbɛi egbɛ eshwa hei babaoo, ni mɛi pii faa gbɛ kɛyaa he ni eyɔɔ ni kɛ amɛ jɛkɛ lɛ fɛɛ. Shi, yɛ gbii komɛi asɛɛ lɛ, eku esɛɛ kɛba Kapernaum yɛ Galilea Ŋshɔ lɛ masɛi. Amrɔ nɔŋŋ pɛ kɛkɛ ni ehe sane gbɛ eshwa akɛ eba lɛ diɛŋtsɛ emaŋ, ni mɛi pii ba shia he ni eyɔɔ lɛ. Ni Farisifoi kɛ Mla tsɔɔlɔi jɛ hei ni jɛkɛ tamɔ Yerusalem tɔɔ amɛba.

Gbɔmɛi lɛ ayi fa babaoo diɛŋtsɛ akɛ amɛtsi shia lɛ naa, ni no haaa mɔ ko mɔ ko ana gbɛ aya shia lɛ mli. Agbɛnɛ mɔ fɛɛ mɔ efee klalo kɛha naakpɛɛ nɔ ko ni baaba lɛ. Nɔ ni ba yɛ nɛkɛ be nɛɛ mli lɛ he miihia waa diɛŋtsɛ, ejaakɛ eyeɔ ebuaa wɔ ni wɔnaa akɛ Yesu yɛ hewalɛ ni ekɛaajie nibii ni kɛ nɔnaa baa adesai ashihilɛ mli lɛ ni ekɛ hewalɛnamɔ kpakpa aku sɛɛ aha mɛi fɛɛ ni esumɔɔ lɛ ekoŋŋ.

Beni Yesu tsɔɔ gbɔmɛi asafoi babaoo lɛ anii lɛ, hii ejwɛ kɛ nuu ko ni ekumɔ ni eka saa nɔ ba shia lɛ. Amɛmiitao ni Yesu atsa amɛnaanyo lɛ, shi gbɔmɛi babaoo lɛ ahewɔ lɛ, amɛnyɛɛɛ amɛbote shia lɛ mli. Mɛɛ dɔlɛ sane nɛ! Shi kɛlɛ amɛnijiaŋ ejeee wui. Amɛkwɔ kɛtee tsu lɛ yiteŋ, ni amɛgbu fɔlɔ yɛ mli, ni amɛshiu saa lɛ kɛ nuu lɛ fɛɛ kɛkpeleke shi kɛbama Yesu masɛi.

Ani Yesu mli fu yɛ enaa ni amɛgbaa nɛɛ hewɔ? Dabi kwraa! Shi moŋ, ehiɛ sɔ hemɔkɛyeli ni amɛjie kpo lɛ waa diɛŋtsɛ. Kɛkɛ ni ekɛɛ nuu ni ekumɔ lɛ akɛ: “Aŋɔ ohe eshai lɛ afao!” Shi ani Yesu baanyɛ ekɛ eshai ake diɛŋtsɛ? Woloŋmalɔi lɛ kɛ Farisifoi lɛ susuuu nakai. No hewɔ lɛ amɛsusu yɛ amɛtsuiiaŋ akɛ: “Mɛɛ hewɔ mɔ nɛ wieɔ nɛkɛ musubɔɔ wiemɔi nɛɛ? Namɔ aaanyɛ ekɛ eshai afa, akɛ ja Nyɔŋmɔ kome pɛ?”

Akɛni Yesu le amɛjwɛŋmɔ hewɔ lɛ, ekɛɛ amɛ akɛ: “Mɛɛba nyɛsusuɔ nɛkɛ nii yɛ nyɛtsuiiaŋ? Nɔ ni aaakɛɛ mɔ ni ekumɔ lɛ akɛ: ‘Aŋɔ ohe eshai lɛ afao lɛ,’ aloo nɔ ni aaakɛɛ: ‘Tee shi, wo osaa lɛ ni onyiɛ lɛ,’ te emli nɔ ni kɛɛmɔ jaraaŋ?”

Kɛkɛ ni Yesu ha gbɔmɛi asafo babaoo, kɛ mɛi ni wieɔ shiɔ lɛ lɛ hu fɛɛ na naakpɛɛ nifeemɔ ni baajie kpo atsɔɔ akɛ eyɛ hegbɛ ni ekɛ eshai keɔ yɛ shikpɔŋ nɔ, ni lɛlɛŋ hu akɛ lɛ ji gbɔmɔ ni fe mɔ fɛɛ mɔ ni ehi shi pɛŋ lɛ etsɔɔ amɛ. Etsɔ ehiɛ eha nuu ni ekumɔ lɛ ni efa lɛ akɛ: “Tee shi, wo osaa lɛ, ni oya owe.” Ni efee nakai amrɔ nɔŋŋ, ni ete shi kɛjɛ esaa lɛ nɔ yɛ amɛ fɛɛ amɛhiɛ! Ni gbɔmɛi lɛ naa kpɛ amɛhe ni amɛjie Nyɔŋmɔ yi ni amɛkɛɛ: “Wɔnako enɛ eko da!”

Ani oyɔse akɛ Yesu tsi eshai ata yɛ be mli ni ewieɔ helai ahe lɛ, ni akɛ eshaifaa kɛ gbɔmɔtsoŋ hewalɛnamɔ yɛ tsakpaa? Biblia lɛ tsɔɔ mli akɛ wɔ klɛŋklɛŋ fɔlɔ, Adam, fee esha ni akɛ wɔ fɛɛ wɔna nɔ ni jɛ esha lɛ mli ba lɛ yɛ wɔfɔmɔ mli, ni ji hela kɛ gbele. Shi yɛ Nyɔŋmɔ Maŋtsɛyeli lɛ nɔyeli shishi lɛ, Yesu kɛ mɛi fɛɛ ni sumɔɔ Nyɔŋmɔ ni amɛsɔmɔɔ Lɛ lɛ ahe eshai baake amɛ, ni no sɛɛ lɛ abaajie helai fɛɛ kɛbaaya. Kwɛ bɔ ni enɛ baafee fɛo aha! Marko 2:1-12; Luka 5:17-26; Mateo 9:1-8; Romabii 5:12, 17-19.

▪ Mɛɛ klalo afee kɛha naakpɛɛ nɔ ko feemɔ?

▪ Mɛɛ gbɛ nɔ nuu ni ekumɔ lɛ tsɔ ebashɛ Yesu masɛi?

▪ Mɛni hewɔ ni eshafeelɔi ji wɔ fɛɛ lɛ, shi mɛɛ gbɛ nɔ Yesu haa wɔ hiɛnɔkamɔ akɛ wɔbaana eshaifaa kɛ hewalɛnamɔ ni yeɔ emuu yɛ?