Nikasemɔ 8
Hii Shi Kɛya Naanɔ Yɛ Paradeiso Shikpɔŋ Nɔ
1, 2. Te shihilɛ baatamɔ aha tɛŋŋ yɛ Nyɔŋmɔ Maŋtsɛyeli nɔyeli lɛ shishi?
1 Te shihilɛ lɛ baatamɔ aha tɛŋŋ kɛ́ Nyɔŋmɔ jie efɔŋ feemɔ kɛ amanehulu kɛjɛ shikpɔŋ lɛ nɔ ni ekɛ ejeŋ hee ni yɔɔ eŋwɛi Maŋtsɛyeli lɛ suɔmɔ kwɛmɔ shishi lɛ baye najiaŋ? Nyɔŋmɔ ewo shi akɛ ‘ebaagbɛ edɛŋ ni eha nɔ fɛɛ nɔ ni hiɛ ka atɔ kɛ nii ni etaoɔ.’—Lala 145:16.
2 Mɛni ji nibii ni ja gbɛ ni otaoɔ? Ani jeee kɛha miishɛɛ shihilɛ, nitsumɔ kpakpa, heloonaa nii babaoo, nibii fɛfɛji ni ebɔle ohe kɛkpe, toiŋjɔlɛ yɛ gbɔmɛi fɛɛ ateŋ, kɛ heyeli kɛmiijɛ jalɛsane ni ayeee, helai, amanehului, kɛ gbele mli lɛ namɔ? Ni mumɔŋ shihilɛ ni yɔɔ miishɛɛ hu? Etsɛŋ ni nakai nibii lɛ fɛɛ baaba mli yɛ Nyɔŋmɔ Maŋtsɛyeli lɛ nɔyeli shishi. Kadimɔ nɔ ni Biblia gbalɛi kɛɔ yɛ jɔɔmɔi ni yɔɔ naakpɛɛ ni baaba yɛ nakai jeŋ hee lɛ mli lɛ ahe.
Adesai Baahi Toiŋjɔlɛ ni Eye Emuu Mli
3-6. Mɛɛ nɔmimaa wɔyɔɔ akɛ adesai baana toiŋjɔlɛ yɛ jeŋ hee lɛ mli?
3 “[Nyɔŋmɔ] ehaa tai asɛɛ foɔ kɛyaa shikpɔŋ lɛ naagbee hei lɛ, ekũɔ gãi mli, ni efoɔ akplɔ mli; ta shwiilii lɛ hu eshãa kɛ la.”—Lala 46:10.
4 “Amɛkɛ amɛklantei aaasɔ̃ kɔii ni amɛkɛ amɛkplɔi hu aaasɔ̃ adedai. Jeŋmaŋ ko woŋ klante nɔ eshiŋ jeŋmaŋ ko, ni amɛkaseŋ tawuu dɔŋŋ.”—Yesaia 2:4.
5 “Mɛi ni he jɔ lɛ, shikpɔŋ lɛ aaatsɔ amɛnɔ, ni amɛmii aaashɛ amɛhe yɛ hejɔlɛ babaoo mli.”—Lala 37:11.
6 “Shikpɔŋ muu lɛ fɛɛ ena hejɔlɛ, ni enɔ ejɔ, ni amɛmiila nyamɔ lalai.”—Yesaia 14:7.
Toiŋjɔlɛ yɛ Gbɔmɔ kɛ Kooloi Ateŋ
7, 8. Mɛɛ toiŋjɔlɛ nɛkɛ baahi shi yɛ gbɔmɛi kɛ kooloi ateŋ?
7 “Klaŋ kɛ gwantɛŋ bi aaahi shi, ni kootsɛ kɛ abotia bi aaabu shi; ni tsina bi kɛ jata bi kɛ kooloo ni ewo fɔ fɛɛ aaahi hekome, ni gbekɛ bibioo aaakpala amɛ. Tsina yoo hu kɛ oshishibrishii aaaye nii, ni amɛbii aaabumɔ shi yɛ hekome, ni jata aaaye jwɛi tamɔ tsina. Fufɔoo aaashwɛ yɛ shikpãa bu naa, ni gbekɛ ni etse fufɔ hu aaaŋɔ enine awo onufu bu mli. Amɛfeŋ efɔŋ ni amɛfiteŋ nii.”—Yesaia 11:6-9.
8 “Nakai gbi lɛ nɔ lɛ mikɛ ŋaŋ kooloi kɛ ŋwɛi loofɔji kɛ shikpɔŋ sũ lɛ nɔ waamɔ nibii aaakpaŋ kpaŋmɔ ko aha amɛ, . . . ni maha amɛkamɔ shi shweshweeshwe.”—Hoshea 2:20.
Gbɔmɔtsoŋ Hewalɛ ni Eye Emuu, Naanɔ Wala
9-14. Tsɔɔmɔ bɔ ni gbɔmɔtsoŋ hewalɛ baafee yɛ jeŋ hee lɛ mli.
9 “No mli lɛ aaagbele shwilafoi ahiŋmɛii, ni aaagbele toimulɔi atoii. No mli lɛ obubuafoi aaatumɔ akɛ ofrote, ni mumui lilɛi hu aaala kɛ nyamɔ.”—Yesaia 35:5, 6.
10 “Nyɔŋmɔ aaatsumɔ amɛhiɛaŋ yaafonui fɛɛ, ni gbele bɛ dɔŋŋ, ni ŋkɔmɔyeli ko kɛ bolɔmɔ ko kɛ nɔnaa ko hu bɛ dɔŋŋ.”—Kpojiemɔ 21:4.
11 “Maŋbii lɛ ateŋ mɔ ko ekɛŋ akɛ: Migbɔjɔ!”—Yesaia 33:24.
12 “No lɛ eheloo lɛ aaatsɔ efɔ fe gbekɛ nɔ; eeeku esɛɛ etsɔ obalanyo ekoŋŋ.”—Hiob 33:25.
13 “Nyɔŋmɔ duromɔ keenɔ lɛ, naanɔ wala ni yɛ Kristo Yesu, wɔ-Nuŋtsɔ lɛ mli.”—Romabii 6:23.
14 “Mɔ fɛɛ mɔ ni heɔ enɔ yeɔ lɛ [baana] . . . naanɔ wala.”—Yohane 3:16.
Gbohii lɛ Baaba Wala Mli Ekoŋŋ
15-17. Mɛɛ hiɛnɔkamɔ yɔɔ kɛha mɛi ni egboi momo lɛ?
15 “Gbohiiashitee baaba, ni jalɔi kɛ mɛi ni ejaaa fɛɛ baate shi.”—Bɔfoi lɛ Asaji 24:15.
16 “Ŋmɛlɛtswaa lɛ miiba, nɔ mli ni mɛi fɛɛ ni yɔɔ gbohii abui lɛ amli [Nyɔŋmɔ kaimɔ mli] lɛ aaanu egbee, ni amɛaaje kpo.”—Yohane 5:28, 29.
17 “Ŋshɔ jie gbohii ni yɔɔ emli lɛ eha, ni gbele kɛ gbohiiaje [gbonyo bu lɛ] jie gbohii ni yɔɔ amɛmli lɛ amɛha.”—Kpojiemɔ 20:13.
Shikpɔŋ lɛ, Etsɔ Paradeiso ni Baa Nii Babaoo
18-22. Abaatsake shikpɔŋ muu lɛ fɛɛ ni afee lɛ mɛni?
18 “Maha nugbɔ anɛ yɛ be ni sa mli; eeetsɔ jɔɔmɔ nugbɔnɛmɔ. Ni ŋã nɔ tso aaawo eyibii, ni shikpɔŋ lɛ aaaba enii, ni amɛaahi shi shweshweeshwe yɛ amɛshikpɔŋ lɛ nɔ.”—Ezekiel 34:26, 27.
19 “Shikpɔŋ lɛ eba enii; Naa-Nyɔŋmɔ ni ji wɔ-Nyɔŋmɔ lɛ aaajɔɔ wɔ.”—Lala 67:7.
20 “Ŋa kpataa kɛ shikpɔŋ gbiŋ lɛ aaanyá, ŋa kplanaa lɛ hu mli aaafili lɛ, ni eeegba afofro tamɔ fɔfɔi.”—Yesaia 35:1.
21 “Gɔji lɛ kɛ ŋmeŋmei lɛ aaawó nyamɔ lala nɔ yɛ nyɛhiɛ, ni ŋã nɔ tsei lɛ fɛɛ aaatswa amɛdɛ. Sɛsɛo aaakwɛ̃ yɛ ŋmeitso najiaŋ, ni mirtotso hu aaakwɛ̃ yɛ aklati najiaŋ.”—Yesaia 55:12, 13.
22 “Okɛ mi aaahi Paradeiso.”—Luka 23:43.
Shihilɛ Hé Kpakpa Kɛha Mɔ Fɛɛ Mɔ
23, 24. Mɛɛ nɔmimaa wɔyɔɔ akɛ abaana shihilɛ héi kpakpai ni fa bɔ ni sa kɛha mɔ fɛɛ mɔ?
23 “Amɛaamamɔ tsũi ni amɛaahi mli . . . Amɛmamɔŋ tsũi ni mɔ kroko ahi mli, ni amɛhuŋ hu, ni mɔ kroko aye; . . . ni mɛi ni mihala lɛ aaaye amɛninenaa nitsumɔ lɛ mli nii aahu po. Amɛgboŋ deŋme yakatswaa, ni amɛfɔŋ amɛhaŋ oshara.”—Yesaia 65:21-23.
24 “Mɔ fɛɛ mɔ aaata eweintso kɛ egbamitso shishi, ni mɔ ko woŋ amɛhe gbeyei.”—Mika 4:4.
Obaanyɛ Ohi Shi Kɛya Naanɔ yɛ Paradeiso
25. Mɛɛ gbɛkpamɔ ni yɔɔ naakpɛɛ wɔyɔɔ kɛha wɔsɛɛ be?
25 Mɛɛ wɔsɛɛ be gbɛkpamɔ ni yɔɔ naakpɛɛ nɛ! Mɛɛ yiŋtoo diɛŋtsɛ shihilɛi baanyɛ ana nɛkɛ, beni akɛ hiɛnɔkamɔ ni ma shi shiŋŋ lɛ eŋmɛ lɛ sɛkɛ, ákɛ yɛ Nyɔŋmɔ jeŋ hee lɛ mli lɛ, ŋmɛnɛ naagbai nɛɛ baafee tsutsu nii ni eho etee kɛmiiya naanɔ lɛ! “Akaiŋ tsutsu nii lɛ dɔŋŋ, ni asaŋ ebaŋ jwɛŋmɔ mli dɔŋŋ.” (Yesaia 65:17) Ni kwɛ bɔ ni eji miishɛjemɔ sane akɛ wɔɔle akɛ nakai beaŋ shihilɛ lɛ baafee naanɔ wala: “[Nyɔŋmɔ baami] gbele kɛaatee naanɔ.”—Yesaia 25:8.
26. Mɛni he hiaa dani mɔ ko ahi shi kɛya naanɔ yɛ Nyɔŋmɔ jeŋ hee lɛ mli?
26 Ani oosumɔ ni ohi shi kɛya naanɔ yɛ nakai Paradeiso jeŋ hee ni ebɛŋkɛ kpaakpa nɛɛ mli? Ekolɛ ooobi akɛ: ‘Mɛni ehe baahia ni mafee koni mana Nyɔŋmɔ hiɛ duromɔ yɛ je nɛŋ naagbee lɛ mli ni matsa nɔ mahi shi kɛyabote ejeŋ hee lɛ mli?’ Ehe miihia ni ofee nɔ ni Yesu tsɔɔ yɛ sɔlemɔ ko ni esɔle eha Nyɔŋmɔ lɛ mli lɛ, akɛ: “Enɛ ji naanɔ wala lɛ, akɛ amɛaaná bo anɔkwa Nyɔŋmɔ kome lɛ, kɛ Yesu Kristo, mɔ ni otsu lɛ lɛ he anɔkwa nilee.”—Yohane 17:3, NW.
27. Mɛni esa akɛ ofee koni ona Nyɔŋmɔ yiŋtoo lɛ mli gbɛfaŋnɔ?
27 No hewɔ lɛ, taomɔ Biblia, koni oma nibii ni okane yɛ wolo bibioo nɛɛ mli lɛ nɔ mi. Taomɔ mɛi krokomɛi ni kaseɔ ni amɛtsɔɔ nɛkɛ Biblia mli anɔkwalei nɛɛ hu lɛ asɛɛ gbɛ. Tsi ohe kwraa kɛjɛ osato jamɔi ni tsɔɔ, ní amɛfeɔ nibii hu ni teɔ shi woɔ Biblia lɛ ahe. Kasemɔ bɔ ni bo, kɛ mɛi krokomɛi akpekpei abɔ ni miifee Nyɔŋmɔ suɔmɔnaa nii momo lɛ, baanyɛ afee ana Nyɔŋmɔ yiŋtoo akɛ adesai ahi shi kɛya naanɔ yɛ paradeiso shikpɔŋ nɔ lɛ mli gbɛfaŋnɔ. Ni oŋɔ nɔ ni Nyɔŋmɔ Wiemɔ ni jɛ mumɔŋ lɛ ejaje yɛ wɔsɛɛ be ni ebɛŋkɛ kpaakpa nɛɛ he lɛ oto otsui mli, akɛ: “Je lɛ hoɔ eyaa kɛ emli sɛɛdii nii lɛ; shi mɔ ni feɔ Nyɔŋmɔ suɔmɔnaa nii lɛ hiɔ shi kɛyaa naanɔ.”—1 Yohane 2:17.
[Mfoniri ni yɔɔ yɔɔ baafa 31]
Etsɛŋ ni Nyɔŋmɔ yiŋtoo akɛ ekɛ shikpɔŋ nɔ paradeiso baaba ekoŋŋ lɛ baaba mli