“Koni Nyɛkabote Kaa Mli”
“Nyɛshia kpe ni nyɛsɔlea, koni nyɛkabote kaa mli.”—MATEO 26:41.
NƆNYƐƐ lɛ naa wa waa—fe eko fɛɛ eko ni ekɛkpe pɛŋ. Eshwɛ fioo ni Yesu Kristo, ni ji Nyɔŋmɔ Bi lɛ shikpɔŋ nɔ shihilɛ lɛ baaba naagbee. Yesu le akɛ etsɛŋ ni abaamɔ lɛ, ní abu lɛ gbele fɔ, koni ayakala lɛ akpɛtɛ sɛŋmɔtso nɔ. Ele akɛ eyiŋkpɛi kɛ nifeemɔi fɛɛ baasa e-Tsɛ lɛ gbɛi he. Yesu le hu akɛ adesai awɔsɛɛ shihilɛ gbɛkpamɔi ahe eba sane mli. Mɛni efee beni ekɛ nɔnyɛɛi nɛɛ fɛɛ kpe lɛ?
2 Yesu kɛ ekaselɔi lɛ tee Getsemane abɔɔ lɛ mli. Eji he ko ni Yesu sumɔɔ waa. Beni amɛshɛ jɛmɛ lɛ, eshi ekaselɔi lɛ ni enyiɛ kɛtee hiɛ fioo. Beni eshwɛ ekome too lɛ, ekɛ hiɛdɔɔ sɔle eha e-Tsɛ ni yɔɔ ŋwɛi lɛ kɛha hewalɛ, ni efɔse etsui mli saji eshwie enɔ—jeee shikome kɛkɛ shi moŋ shii etɛ sɔŋŋ. Eyɛ mli akɛ Yesu eye emuu moŋ, shi enuuu he akɛ ekome pɛ ebaanyɛ edamɔ nɔnyɛɛ lɛ naa.—Mateo 26:36-44.
3 Wɔ hu wɔyɛ nɔnyɛɛ mli ŋmɛnɛ. Wɔ́tsɔ hiɛ wɔsusu odaseyelii ni tsɔɔ akɛ wɔyɛ nibii agbɛjianɔtoo fɔŋ nɛɛ naagbee gbii lɛ amli lɛ he yɛ wolo bibioo nɛɛ mli. Kaai kɛ haomɔi ni jɛɔ Satan je lɛ mli kɛbaa lɛ amli miiwa waa kɛmiiya hiɛ. Yiŋkpɛi kɛ nifeemɔi ni wɔteŋ mɔ fɛɛ mɔ ni kɛɔ akɛ esɔmɔɔ anɔkwa Nyɔŋmɔ lɛ jieɔ lɛ kpo lɛ saa E-gbɛi lɛ he ni enáa hewalɛ waa yɛ ejeŋ hee lɛ mli gbɛkpamɔi ni wɔteŋ mɔ fɛɛ mɔ yɔɔ lɛ nɔ. Wɔsumɔɔ Yehowa. Wɔmiisumɔ ni ‘wɔhiɛ mli kɛyawula shi’—kɛyashi wɔwala sɛɛ baafo loo nibii agbɛjianɔtoo nɛɛ baaba naagbee, amɛteŋ eko fɛɛ eko ni baatsɔ hiɛ. (Mateo 24:13) Shi te wɔɔfee tɛŋŋ wɔhiɛ wɔhehiamɔ henumɔ lɛ mli ni wɔya nɔ wɔshi kpe?
4 Akɛni Yesu le akɛ ekaselɔi lɛ—ni yɔɔ nakai beaŋ kɛ mɛi ni yɔɔ ŋmɛnɛ lɛ fɛɛ—hu baayaje nɔnyɛɛ shishi hewɔ lɛ, ewo amɛ hewalɛ akɛ: “Nyɛshia kpe ni nyɛsɔlea, koni nyɛkabote kaa mli.” (Mateo 26:41) Mɛni nɛkɛ wiemɔi nɛɛ tsɔɔ kɛha wɔ ŋmɛnɛ? Mɛɛ kaa okɛkpeɔ? Ni te ooofee tɛŋŋ ni ‘oya nɔ oshi kpe’?
Aaka Wɔ Koni Wɔfee Mɛni?
5 Wɔteŋ mɔ fɛɛ mɔ kɛ kaa kpeɔ daa gbi koni wɔgbee “abonsam tsɔne lɛŋ.” (2 Timoteo 2:26) Biblia lɛ bɔɔ wɔ kɔkɔ akɛ mɛi titri ni Satan kɛ ehiɛ eka amɛ ji Yehowa jálɔi. (1 Petro 5:8; Kpojiemɔ 12:12, 17) Yɛ mɛɛ yiŋtoo hewɔ? Jeee doo akɛ koni ekpata wɔhiɛ. Ebafeŋ kunimyeli nɔ̃ kɛhaŋ Satan kɛji wɔye Nyɔŋmɔ anɔkwa kɛyashi gbele mli. Satan le akɛ Yehowa baajie gbele kɛya kɛtsɔ gbohiiashitee nɔ yɛ E-be ni E-to lɛ mli.—Luka 20:37, 38.
6 Satan miitao koni efite nɔ ko ni jara wa kwraa fe amrɔ nɛɛ shihilɛ mli ni wɔyɔɔ lɛ—emuuyeli mli ni wɔhiɛ kɛha Nyɔŋmɔ lɛ. Satan egiri waa koni etsɔɔ akɛ ebaanyɛ etsi wɔ kɛjɛ Yehowa he. No hewɔ lɛ kɛji abaanyɛ alaka wɔ koni wɔkaye anɔkwa—ni wɔkpa sanekpakpa lɛ shiɛmɔ loo koni wɔkpoo Kristofoi ashishitoo mlai lɛ—no baafee kunimyeli kɛha Satan! (Efesobii 6:11-13) No hewɔ lɛ “naatsɔlɔ lɛ” loo Mɔ ni kaa mɔ lɛ kɛ kaai baa wɔnɔ.—Mateo 4:3.
7 Satan “lakamɔ nifeemɔ gbɛ̀i” lɛ yɛ srɔtoisrɔtoi. (Efesobii 6:11, Jewish New Testament) Ebaanyɛ ekɛ heloonaa nibii asɛɛdii, gbeyeishemɔ, yiŋkɔshikɔshifeemɔ, loo miishɛɛnamɔ sɛɛdii alaka wɔ. Shi nifeemɔ gbɛ̀i ni mɔɔ shi waa ni ekɛtsuɔ nii lɛ ateŋ ekome ji nijiaŋwujee. Ákɛ hiɛtɛlɔ ní tsɔɔ ŋaa gbɛ fɔŋ nɔ ekɛnáa mɛi ahe sɛɛ lɛ, ele akɛ nijiaŋwujee baanyɛ aha wɔgbɔjɔ yɛ mumɔŋ, ni kɛtsɔ no nɔ lɛ, ebaanyɛ etutua wɔ. (Abɛi 24:10) No hewɔ lɛ, be mli ni ‘wɔkumɔ kwraa’ yɛ henumɔŋ lɛ ji be titri ni ekaa wɔ koni ekɛje wɔnijiaŋ wui.—Lala 38:9.
8 Etamɔ nɔ ni nibii ni kɛ nijiaŋwujee baa lɛ miiya nɔ eefa yɛ be mli ni wɔbɛŋkɛɔ naagbee gbii lɛ anaagbee kwraa lɛ, ni wɔyeee wɔhe yɛ enɛɛmɛi ahe. (Kwɛmɔ akrabatsa ni hiɛ saneyitso akɛ “Nibii Komɛi ni Kɛ Nijiaŋwujee Baa” lɛ mli.) Nijiaŋwujee baanyɛ aha wɔhewalɛ nɔ agbɔ ni nɔ ni kɛbaa lɛ kɔɔɔ he eko. Ní ‘wɔɔtsu wɔdekã he nii’ loo wɔɔhé be ni hi jogbaŋŋ ni wɔkɛtsu wɔmumɔŋ gbɛnaa nii ahe nii—ní nɔ ni fata he ji Biblia lɛ kasemɔ, Kristofoi akpeeiyaa, kɛ wɔhe ni wɔkɛaawo shiɛmɔ nitsumɔ lɛ mli lɛ—baanyɛ afee nɔ ni he nitsumɔ wa kɛji etɔ bo yɛ gbɔmɔtsoŋ, jwɛŋmɔŋ, kɛ henumɔŋ. (Efesobii 5:15, 16) Kaimɔ akɛ Naatsɔlɔ lɛ miitao koni okpa enɛɛmɛi ahe nitsumɔ. Shi jeee be ni esa akɛ okɛgbɔjɔ onitsumɔ lɛ mli loo ni okɛŋmɛɛ hehiamɔ henumɔ ni okɛtsuɔ nii yɛ be ni wɔyɔɔ mli nɛɛ mli lɛ he lɛ nɛ! (Luka 21:34-36) Te ooofee tɛŋŋ ni odamɔ kaa naa ni oya nɔ oshi kpe? Susumɔ ŋaawoi ejwɛ ni baanyɛ aye abua bo lɛ he okwɛ.
‘Sɔlemɔ Daa’
9 Okɛ ohe afɔ̃ Yehowa nɔ kɛtsɔ sɔlemɔ nɔ. Kaimɔ nɔkwɛmɔnɔ ni Yesu fee yɛ Getsemane abɔɔ lɛ mli lɛ. Beni eyɔɔ henumɔŋ nɔnyɛɛ ni naa wa waa mli lɛ, mɛni efee? Etsi ebɛŋkɛ Yehowa kɛha yelikɛbuamɔ, ni ekɛ hiɛdɔɔ sɔle waa aahu akɛ “ehe latsaa tsɔ̃ tamɔ lákulibii ni tsereɔ shwieɔ shi.” (Luka 22:44) Susumɔ he okwɛ. Yesu le Satan jogbaŋŋ. Yesu jɛ ŋwɛi ena kaai fɛɛ ni Satan kɛtsuɔ nii yɛ bɔ ni ebɔɔ mɔdɛŋ koni ekɛdũ Nyɔŋmɔ tsuji lɛ mli. Ni kɛlɛ, Yesu nuuu he akɛ ebaanyɛ edamɔ kaa fɛɛ kaa ni Naatsɔlɔ lɛ baanyɛ ekɛba enɔ lɛ naa yɛ gbɛ ni waaa kwraa nɔ. Kɛ Nyɔŋmɔ Bi ni eye emuu lɛ nu he akɛ ehe miihia ni esɔle kɛha Nyɔŋmɔ yelikɛbuamɔ kɛ hewalɛ lɛ, enyiɛ nɔŋŋ ni esaaa akɛ wɔfeɔ nakai babaoo!—1 Petro 2:21.
10 Kaimɔ hu akɛ, yɛ be mli ni Yesu ewo ekaselɔi lɛ hewalɛ koni ‘amɛsɔle daa’ sɛɛ lɛ, ekɛɛ akɛ: “Mumɔ lɛ miikpɛlɛ moŋ, shi heloo lɛ egbede.” (Mateo 26:41) Namɔ heloo he Yesu wieɔ lɛ? Eka shi faŋŋ akɛ jeee enɔ̃ lɛ; gbɔjɔmɔ ko kwraa bɛ egbɔmɔtso ni eye emuu akɛ adesa lɛ mli. (1 Petro 2:22) Shi ebɛ lɛ nakai yɛ ekaselɔi lɛ agbɛfaŋ. Yɛ emuu ni ayeee ni akɛfɔ́ amɛ kɛ eshafeemɔ sui ni amɛyɔɔ hewɔ lɛ, amɛji mɛi titri ni yelikɛbuamɔ he baahia amɛ bɔni afee ni amɛnyɛ amɛdamɔ kaa naa. (Romabii 7:21-24) No hewɔ ni ewo amɛ—kɛ anɔkwa Kristofoi fɛɛ ni baaba yɛ amɛsɛɛ lɛ hewalɛ—koni amɛsɔle kɛha yelikɛbuamɔ bɔni afee ni amɛnyɛ amɛdamɔ kaai anaa yɛ omanyeyeli mli lɛ. (Mateo 6:13) Yehowa boɔ sɔlemɔi ni tamɔ nɛkɛ toi. (Lala 65:3) Yɛ mɛɛ gbɛ nɔ? Kɛ hooo lɛ yɛ gbɛ̀i srɔtoi enyɔ nɔ.
11 Klɛŋklɛŋ lɛ, Nyɔŋmɔ yeɔ ebuaa wɔ koni wɔyɔse kaai kɛ́ amɛmiiba. Satan kaai lɛ tamɔ tsɔnei ni atsɔ̃ amamɔ gbɛ ko ni nɔ ewo duŋ nɔ. Kɛji onaaa lɛ, ebaanyɛ edũ bo. Yehowa kpáa Satan tsɔnei lɛ ahe mama kɛtsɔ Biblia lɛ kɛ Biblia kasemɔ woji anɔ, ni enɛ yeɔ ebuaa wɔ koni wɔkaŋmɛɛ wɔhe wɔha kaa. Yɛ afii ni eho lɛ amli lɛ, atsɔ woji ni akala, kpokpaa wulu nɔ kpee kɛ kpokpaa nɔ kpee wiemɔi anɔ ahɛle wɔ shi shii abɔ yɛ osharai, tamɔ gbɔmɔ gbeyeishemɔ, bɔlɛnamɔ mli jeŋba shara, heloonaa nii asɛɛdii kɛ kaai krokomɛi ni Satan kɛbaa lɛ ahe. (Abɛi 29:25; 1 Korintobii 10:8-11; 1 Timoteo 6:9, 10) Ani odaaa Yehowa shi yɛ shi ni ehɛleɔ wɔ yɛ Satan ŋaatsɔi lɛ ahe lɛ hewɔ? (2 Korintobii 2:11) Kɔkɔbɔi nɛɛ fɛɛ ji hetoohamɔ kɛha sɔlemɔ ni osɔleɔ kɛha yelikɛbuamɔ koni onyɛ odamɔ kaai anaa lɛ.
12 Nɔ ni ji enyɔ lɛ, Yehowa haa wɔsɔlemɔi lɛ ahetoo kɛtsɔɔ hewalɛ ni ehaa wɔ koni wɔnyɛ wɔto wɔtsui shi yɛ kaa mli lɛ nɔ. E-Wiemɔ lɛ kɛɔ akɛ: “Nyɔŋmɔ . . . haŋ aka nyɛ fe bɔ ni nyɛaanyɛ, shi moŋ ekɛ kaa lɛ nɔŋŋ aaaje gbɛ aha nyɛ ní nyɛje mli hu.” (1 Korintobii 10:13) Nyɔŋmɔ eŋmɛŋ gbɛ ni kaa ko aná wɔnɔ hewalɛ kɛyashɛ he ni wɔnaŋ mumɔŋ hewalɛ ni sa ni wɔkɛaadamɔ naa—kɛji ákɛ wɔtee nɔ wɔkɛ wɔhe fɔ̃ enɔ. Mɛɛ gbɛ nɔ etsɔɔ ‘ejeɔ gbɛ’ ehaa wɔ ‘koni wɔje mli’? ‘Eŋɔɔ mumɔ krɔŋkrɔŋ ehaa mɛi ni biɔ lɛ lɛ.’ (Luka 11:13) Nakai mumɔ lɛ baanyɛ aye abua wɔ koni wɔkai Biblia shishitoo mlai ni baanyɛ awo wɔfai shi ni wɔtswa akɛ wɔbaafee nɔ ni ja lɛ mli hewalɛ lɛ, ní eye ebua wɔ koni wɔkpɛ wɔyiŋ yɛ nilee mli. (Yohane 14:26; Yakobo 1:5, 6) Ebaanyɛ eye ebua wɔ koni wɔjie sui diɛŋtsɛ ni he hiaa wɔ bɔni afee ni wɔye sui gbohii anɔ kunim lɛ akpo. (Galatabii 5:22, 23) Nyɔŋmɔ mumɔ lɛ baanyɛ atsirɛ nanemɛi heyelilɔi po koni ‘amɛtsɔmɔ tsuiwoo amɛha wɔ.’ (Kolosebii 4:11) Ani odaaa shi akɛ Yehowa tsɔɔ gbɛ̀i ni suɔmɔ yɔɔ mli ni tamɔ nɛkɛ nɔ ehaa sɔlemɔi ni osɔleɔ koni oná yelikɛbuamɔ lɛ ahetoo?
Ha Ogbɛkpamɔi lɛ Afee Nɔ ni Abaanyɛ Atsu He Nii
13 Bɔni afee ni wɔya nɔ wɔshi kpe lɛ, ehe miihia ni wɔgbɛkpamɔi lɛ afee nɔ ni abaanyɛ atsu he nii. Wɔ fɛɛ wɔnuɔ tɔlɛ he yɛ bei komɛi amli yɛ shihilɛ lɛ mli nɔnyɛɛi lɛ ahewɔ. Shi esa akɛ wɔkai akɛ Nyɔŋmɔ woko shi akɛ wɔbaaná shihilɛ ni naagba ko kwraa bɛ mli yɛ gbɛjianɔtoo momo nɛɛ mli. Nyɔŋmɔ tsuji ni hi shi yɛ Biblia beaŋ po lɛ kɛ amanehului kpe, ni nɔ ni fata he ji yiwaa, ohia, shihilɛ ni haoɔ mɔ, kɛ hela.—Bɔfoi lɛ Asaji 8:1; 2 Korintobii 8:1, 2; 1 Tesalonikabii 5:14; 1 Timoteo 5:23.
14 Wɔ hu wɔkɛ naagbai kpeɔ ŋmɛnɛ. Wɔbaanyɛ wɔkɛ yiwaa akpe, ni wɔfee yeyeeye yɛ shika gbɛfaŋ, ni wɔkɛ shihilɛ ni haoɔ mɔ akpe, ni hela amɔ wɔ, kɛ agbɛnɛ ni wɔna amanehulu yɛ gbɛ̀i krokomɛi anɔ. Kɛ Yehowa aaatsɔ naakpɛɛ gbɛ nɔ ebu wɔhe kɛjɛ haomɔi fɛɛ mli lɛ, ani enɛ haŋ Satan aná nɔ ni eeedamɔ nɔ ebɔ Yehowa ahora? (Abɛi 27:11) Yehowa ŋmɛɔ gbɛ koni akɛ kaa aba etsuji anɔ, ni yɛ shihilɛi komɛi amli po lɛ kɛyashiɔ he ni mɛi ni teɔ shi ewoɔ amɛ lɛ kɛ kpatu gbele baa amɛnɔ.—Yohane 16:2.
15 Belɛ, mɛɛ shiwoo Yehowa kɛha mɔ? Taakɛ wɔtsĩ tã kɛtsɔ hiɛ lɛ, ewo shi akɛ kɛ́ wɔkɛ wɔhiɛ aaafɔ̃ enɔ kwraa lɛ, no lɛ ebaaha wɔnyɛ wɔdamɔ kaa fɛɛ kaa ni baanyɛ aba wɔnɔ lɛ naa. (Abɛi 3:5, 6) Etsɔɔ e-Wiemɔ lɛ, emumɔ lɛ, kɛ egbɛjianɔtoo lɛ nɔ ebuɔ wɔhe yɛ mumɔŋ, ni enɛ yeɔ ebuaa wɔ koni wɔbáa wɔkɛ lɛ teŋ wekukpaa lɛ yi. Kɛ wɔtee nɔ wɔbáa wekukpaa nɛɛ yi lɛ, kunimyelɔi ji wɔ kɛ́ wɔgboi tete po. Nɔ ko nɔ ko bɛ—kɛ gbele po—ni baanyɛ atsĩ Nyɔŋmɔ naa koni ekawo enɔkwa tsuji lɛ anyɔmɔ. (Hebribii 11:6) Ni yɛ jeŋ hee ni ebɛŋkɛ kpaakpa lɛ mli lɛ, Yehowa baaha eshiwoi krokomɛi ni yɔɔ miishɛɛ ni kɔɔ jɔɔmɔi ni mɛi ni sumɔɔ lɛ lɛ anine baashɛ nɔ lɛ ahe lɛ aba mli.—Lala 145:16.
Kaimɔ Saji Lɛ
16 Bɔni afee ni wɔhiɛ mli kɛyashi naagbee lɛ, esa akɛ wɔkai saji ni he hiaa ni kɔɔ nɔ hewɔ ni Nyɔŋmɔ eŋmɛ efɔŋfeemɔ gbɛ lɛ he lɛ. Kɛ wɔnaagbai lɛ fee tamɔ nɔ ni amɛmli wa waa yɛ bei komɛi amli, ní wɔnu he akɛ wɔɔkpa Nyɔŋmɔ sɔɔmɔ lɛ, wɔɔfee jogbaŋŋ akɛ wɔɔkai wɔhe akɛ Satan etswa ja ni Yehowa nɔyeli ja lɛ mpoa. Shishiulɔ lɛ hu eje Nyɔŋmɔ jálɔi lɛ ahetuu-kɛhamɔ kɛ emuuyeli mli ni amɛhiɛɔ lɛ he ŋwane. (Hiob 1:8-11; 2:3, 4) Nɛkɛ saji nɛɛ kɛ gbɛ ni Yehowa ehala akɛ ebaatsɔ nɔ etsu amɛhe nii lɛ ahe hiaa waa fe wɔteŋ mɔ fɛɛ mɔ. Yɛ mɛɛ gbɛ nɔ?
17 Amanehulu ni Nyɔŋmɔ eŋmɛ gbɛ yɛ be kukuoo mli lɛ eha mɛi krokomɛi ená hegbɛ ni amɛbale anɔkwale lɛ. Susumɔ enɛ he okwɛ: Yesu na amanehulu bɔni afee ni wɔnyɛ wɔná wala. (Yohane 3:16) Ani wɔdaaa shi yɛ enɛ hewɔ? Shi, wɔyɛ he miishɛɛ akɛ wɔɔya nɔ wɔto wɔtsui shi be fioo ko yɛ amanehulu mli bɔni afee ni mɛi krokomɛi hu anyɛ aná wala? Bɔni afee ni wɔhiɛ mli kɛyashi naagbee lɛ, esa akɛ wɔyɔse akɛ Yehowa nilee lɛ nɔ kwɔ kwraa fe wɔnɔ lɛ. (Yesaia 55:9) Ebaafo efɔŋfeemɔ sɛɛ yɛ be ni hi jogbaŋŋ ni akɛaatsu saji lɛ ahe nii agbe naa shikome nyɔŋlo lɛ mli, ni kɛfata he lɛ ebaafo efɔŋfeemɔ sɛɛ yɛ wɔ diɛŋtsɛ wɔnaanɔ hilɛ-kɛhamɔ hewɔ. Ani gbɛ kpakpa ko yɛ lɛɛlɛŋ ni abaanyɛ atsɔ nɔ atsu saji lɛ ahe nii fe nɛkɛ? Nyɔŋmɔ yeee sane ni ejaaa!—Romabii 9:14-24.
“Nyɛtsia Nyɛbɛŋkɛa Nyɔŋmɔ”
18 Bɔni afee ni wɔhiɛ hehiamɔ henumɔ ni wɔyɔɔ lɛ mli lɛ, esa akɛ wɔtsi wɔbɛŋkɛ Yehowa. Ohiɛ akakpa nɔ kɔkɔɔkɔ akɛ Satan miifee nɔ fɛɛ nɔ ni yɔɔ ehewalɛ mli koni efite wekukpaa kpakpa ni kã wɔkɛ Yehowa teŋ lɛ. Satan baasumɔ ni wɔhe wɔye akɛ naagbee lɛ baŋ kɔkɔɔkɔ, ni ákɛ nilee bɛ mli akɛ aaashiɛ sanekpakpa lɛ loo aaahi shi yɛ Biblia shishitoo mlai anaa. Shi “amalelɔ kɛ malemɔ tsɛ ji” lɛ. (Yohane 8:44) Esa akɛ wɔtswa wɔfai shi akɛ ‘wɔbaate shi wɔwo Abonsam.’ Esaaa akɛ wɔbuɔ wɔkɛ Yehowa teŋ wekukpaa lɛ akɛ nɔ ko ni he ehiaaa. Biblia lɛ woɔ wɔ hewalɛ yɛ suɔmɔ mli akɛ: “Nyɛtsia nyɛbɛŋkɛa Nyɔŋmɔ, ni eeetsi eeebɛŋkɛ nyɛ.” (Yakobo 4:7, 8) Te ooofee tɛŋŋ otsi obɛŋkɛ Yehowa?
19 Sɔlemɔ ni akɛaajwɛŋ sane nɔ he miihia. Kɛ shihilɛ mli nɔnyɛɛi fee tamɔ nɔ ni amɛmli wa waa lɛ, fɔsemɔ otsui mli saji oshwie Yehowa nɔ. Babaoo ni ohaa osɔlemɔ lɛ kɔɔ nɔ ko pɔtɛɛ he lɛ, babaoo ni efeɔ mlɛo kɛhaa bo akɛ ooona akɛ eha onibimɔi lɛ ahetoo. Ekolɛ jeee be fɛɛ be ebaaha osɔlemɔi lɛ ahetoo yɛ gbɛ ni okpaa gbɛ lɛ nɔ, shi kɛ́ eji nɔ ni oshweɔ akɛ okɛ woo aha lɛ ni ohiɛ emuuyeli mli oha lɛ lɛ, ekɛ yelikɛbuamɔ ni he hiaa bo lɛ baaha bo bɔni afee ni onyɛ oto otsui shi yɛ omanyeyeli mli. (1 Yohane 5:14) Yɛ be mli ni okɛ egbɛtsɔɔmɔi tsuɔ nii yɛ oshihilɛ mli lɛ, obaatsi obɛŋkɛ lɛ kpaakpa. Yehowa sui kɛ enifeemɔ gbɛ̀i lɛ ni ajie lɛ kpo yɛ Biblia lɛ mli lɛ ni oookane he nii ni ojwɛŋ nɔ lɛ hu he miihia. Sane nɔjwɛŋmɔ ni tamɔ nɛkɛ yeɔ ebuaa bo koni ole lɛ jogbaŋŋ; ekanyaa otsui ni ehaa onáa suɔmɔ ni mli kwɔ kɛhaa lɛ. (Lala 19:15) Nakai suɔmɔ lɛ baaye abua bo jogbaŋŋ fe nibii krokomɛi fɛɛ koni odamɔ kaa naa ni oya nɔ oshi kpe.—1 Yohane 5:3.
20 Bɔni afee ni wɔtsi wɔbɛŋkɛ Yehowa lɛ, ehe miihia hu ni wɔya nɔ wɔbɛŋkɛ wɔnanemɛi heyelilɔi lɛ. Abaasusu enɛ he yɛ wolo bibioo nɛɛ naagbee fã lɛ mli.
NIKASEMƆ LƐ HE SANEBIMƆI
• Mɛni Yesu fee beni eyɔɔ nɔnyɛɛ ni mli wa mli ni eshwɛ fioo ni ewala shihilɛ baaba naagbee lɛ, ni mɛni ewo ekaselɔi lɛ hewalɛ ni amɛfee? (Kk. 1-4)
• Mɛni hewɔ Satan kɛ ehiɛ eka Yehowa jálɔi lɛ, ni yɛ mɛɛ gbɛ̀i anɔ etsɔɔ ekaa wɔ? (Kk. 5-8)
• Bɔni afee ni wɔdamɔ kaa naa lɛ, mɛni hewɔ esa akɛ wɔsɔle daa (Kk. 9-12), wɔha wɔgbɛkpamɔi lɛ afee nɔ ni abaanyɛ atsu he nii (Kk. 13-15), wɔkai saji lɛ (Kk. 16-17), ni ‘wɔtsi wɔbɛŋkɛ Nyɔŋmɔ’ (Kk. 18-20)?
[Akrabatsa ni yɔɔ baafa 25]
Nibii Komɛi ni Kɛ Nijiaŋwujee Baa
Gbɔmɔtsoŋ hewalɛnamɔ kɛ gbɔlɛ. Kɛji ákɛ wɔmiiye hela ko ni ehiii tsamɔ loo kɛ́ gbɔlɛ miiba nyɛmɔ ni wɔkɛtsuɔ nii lɛ shi lɛ, ekolɛ wɔbaahao yɛ babaoo ni wɔnyɛɛɛ wɔfee yɛ Nyɔŋmɔ sɔɔmɔ mli lɛ hewɔ.—Hebribii 6:10.
Nijiaŋwujee. Wɔnijiaŋ baanyɛ aje wui kɛji wɔna akɛ mɛi fioo ko pɛ boɔ Nyɔŋmɔ Wiemɔ ni wɔkɛ mɔdɛŋbɔɔ shiɛɔ lɛ toi lɛ.—Abɛi 13:12.
Henumɔ ni anáa akɛ sɛɛnamɔ ko bɛ mɔ he. Ekolɛ afii babaoo ni akɛfee mɔ ko niseniianii lɛ baaha eyiŋ atsɔ akɛ asumɔɔɔ esane, ní Yehowa po fata he.—1 Yohane 3:19, 20.
Henumɔŋ awuiyelii. Kɛji akɛ naanyo heyelilɔ ko fee mɔ ko nɔ ko ni edɔ lɛ waa lɛ, ekolɛ ebaahao waa yɛ jwɛŋmɔŋ aahu akɛ ebaanu he akɛ esa akɛ ekpa Kristofoi akpeeiyaa loo ekpa shiɛmɔyaa.—Luka 17:1.
Yiwaa. Ekolɛ mɛi ni esoro amɛhemɔkɛyeli yɛ onɔ̃ lɛ he lɛ baate shi awo bo, ni amɛwa bo yi, loo amɛye ohe fɛo.—2 Timoteo 3:12; 2 Petro 3:3, 4.
[Mfoniri ni yɔɔ baafa 26]
Yesu wo wɔ hewalɛ koni ‘wɔsɔle daa’ kɛha yelikɛbuamɔ koni wɔkɛwu wɔshi kaa