Amɛjáaa Amaga Lɛ

Be ni Maŋtsɛ Nebukadnezar la lamɔ ni kɔɔ amaga lɛ he lɛ sɛɛ lɛ, efee shika amaga agbo ko ni ekɛma Dura ŋa lɛ nɔ. Etsɛ onukpai ni yɔɔ Babilon shikpɔŋ lɛ nɔ lɛ fɛɛ kɛba koni amɛbabua amɛhe naa yɛ amaga lɛ hiɛ. Shadrak, Meshak, kɛ Abednego fata onukpai ni etsɛ lɛ ahe. Maŋtsɛ lɛ fã akɛ: ‘Kɛ nyɛnu tɛtɛrɛmantɛrɛi, saŋkui, kɛ bɛji agbɛɛmɔ lɛ, nyɛkɛ nyɛhiɛ abumɔa shi ni nyɛjáa amaga lɛ! Mɔ fɛɛ mɔ ni jáaa amaga lɛ, abaashɛ lɛ afɔ̃ la kɛ flɔnɔɔ lɛ mli.’ Ani Hebribii etɛ nɛɛ baajá amaga lɛ, aloo amɛbaaye Yehowa anɔkwa?

Maŋtsɛ lɛ fã ni abɔi lala lɛ tswaa. Mɛi lɛ fɛɛ kɛ amɛhiɛ bumɔ shi ni amɛjá amaga lɛ. Shi Shadrak, Meshak, kɛ Abednego jáaa amaga lɛ. Mɛi komɛi na akɛ Hebribii etɛ lɛ jáaa amaga lɛ. No hewɔ lɛ, amɛyakɛɛ maŋtsɛ lɛ akɛ: ‘Nakai Hebribii etɛ lɛ jáaa amaga ni ofee oma shi lɛ.’ Nebukadnezar tsu ni ayatsɛ amɛ kɛba, ni ekɛɛ amɛ akɛ: ‘Mahã atswa lala lɛ ahã nyɛ ekoŋŋ koni nyɛjá amaga lɛ. Kɛ́ nyɛjáaa amaga lɛ, mahã akɛ nyɛ awo flɔnɔɔ lɛ mli. Ni nyɔŋmɔ ko bɛ ni baanyɛ ahere nyɛ kɛje midɛŋ.’ Shi amɛhere nɔ amɛkɛɛ lɛ akɛ: ‘Kaahã atswa lala lɛ ekoŋŋ. Wɔ-Nyɔŋmɔ lɛ baanyɛ ahere wɔyiwala. Shi maŋtsɛ, kɛ́ ehereee wɔyiwala po lɛ, ná ole akɛ wɔjáŋ amaga ni ofee oma shi lɛ.’

Nebukadnezar mli fu waa. Ekɛɛ ewebii lɛ akɛ: ‘Nyɛhãa flɔnɔɔ lɛ adɔa toi kpawo fe bɔ ni edɔɔ daa lɛ!’ Kɛkɛ ni efã esraafoi lɛ akɛ: ‘Nyɛfimɔa hii nɛɛ, ni nyɛshɛrɛa amɛ nyɛwoa mli!’ Flɔnɔɔ lɛ dɔ aahu akɛ, be ni asraafoi lɛ bɛŋkɛ he lɛ, amɛgboi amrɔ nɔŋŋ. Hebribii etɛ lɛ yagbee la lɛ mli. Shi be ni Nebukadnezar yakwɛ flɔnɔɔ lɛ mli lɛ, enaaa mɛi etɛ. Moŋ lɛ, ena mɛi ejwɛ ni amɛmiinyiɛ kɛmiiya kɛmiiba yɛ flɔnɔɔ lɛ mli. Etsui fã, ni ebi emaŋ onukpai lɛ akɛ: ‘Ani jeee mɛi etɛ wɔkɛwo la lɛ mli lɛ? Miina mɛi ejwɛ, ni amɛteŋ mɔ kome tamɔ ŋwɛibɔfo!’

Nebukadnezar nyiɛ kɛbɛŋkɛ flɔnɔɔ lɛ, ni ebo ekɛɛ: ‘Nyɔŋmɔ Ni Nɔ Kwɔ Fe Fɛɛ lɛ tsuji, nyɛjea kpo!’ Mɔ fɛɛ mɔ naa kpɛ ehe be ni Shadrak, Meshak, kɛ Abednego je kpo kɛje la lɛ mli lɛ, ejaakɛ nɔ ko nɔ ko efeko amɛ. La lɛ eshãaa amɛgbɔmɔtsei, amɛyitsɔi, loo amɛtadei, ni anuuu la he fu po yɛ amɛhe.

Kɛkɛ ni Nebukadnezar kɛɛ akɛ: ‘Shadrak, Meshak, kɛ Abednego Nyɔŋmɔ lɛ yɛ hewalɛ waa. Etsu ebɔfo lɛ ni ebahere amɛyiwala. Nyɔŋmɔ ko bɛ ni tamɔ amɛ-Nyɔŋmɔ lɛ.’

Ani otswa ofai shi akɛ obaaye Yehowa anɔkwa tamɔ Hebribii etɛ lɛ fee lɛ, ekɔɔɔ he eko nɔ ni baaba?