Maŋtsɛyeli Ko Ni Tamɔ Tso Agbo

Gbɛkɛ ko lɛ, Nebukadnezar la lamɔ ko ni yɔɔ gbeyei. Etsɛ enilelɔi lɛ kɛba koni amɛtsɔɔ lɛ lamɔ lɛ shishi. Shi amɛteŋ mɔ ko mɔ ko nyɛɛɛ atsɔɔ lɛ shishi. No hewɔ lɛ, etsu ni ayatsɛ Daniel kɛba.

Nebukadnezar kɛɛ Daniel akɛ: ‘Yɛ milamɔ lɛ mli lɛ, mina tso ko. Tso lɛ da aahu ni eyashɛ ŋwɛi, ni he fɛɛ he ni mɔ ko damɔ yɛ shikpɔŋ lɛ nɔ lɛ, enyɛɔ enaa. Tso lɛ yibai yɛ fɛo, ni eyibii fa. Kooloi bajɔɔ amɛhe yɛ shishi, ni loofɔji feɔ amɛtsũi yɛ eniji lɛ anɔ. Kɛkɛ ni bɔfo ko jɛ ŋwɛi eba, ni ebo ekɛɛ: “Nyɛfoa tso lɛ nyɛfɔ̃a shi, ni nyɛfolɔa eniji lɛ. Shi nyɛshia efã bibioo ni baashwɛ lɛ kɛ eshishifã lɛ yɛ shikpɔŋ, ni nyɛkɛ dade kɛ akɔɔble afĩa. Tso lɛ hiɛ gbɔmɔ tsui, shi abaatsake ni ahã lɛ kooloo tsui, ni bei kpawo baaho eyi. Kɛkɛ lɛ, mɛi fɛɛ baaná ale akɛ Nyɔŋmɔ ji Nɔyelɔ, ni ebaanyɛ ekɛ maŋtsɛyeli ko ahã mɔ fɛɛ mɔ ni esumɔɔ.”’

Yehowa hã Daniel nu lamɔ lɛ shishi. Shi be ni Daniel nu lamɔ lɛ shishi lɛ, eshe gbeyei waa. Ekɛɛ maŋtsɛ lɛ akɛ: ‘Maŋtsɛ, miná kulɛ, lamɔ nɛɛ kɔɔ ohenyɛlɔi ahe, shi bo ohe ekɔɔ. Bo ji tso agbo lɛ ni afo afɔ̃ shi lɛ. Obaakpa maŋtsɛ lɛ yeli, ni obaaya jwɛi amli oyakpe jwɛi tamɔ jwɛiaŋ kooloo. Shi ŋwɛibɔfo lɛ kɛɛ abaashi tso lɛ fã bibioo ni baashwɛ lɛ kɛ eshishifã lɛ yɛ shikpɔŋ, no hewɔ lɛ, obaatsɔ maŋtsɛ ekoŋŋ.’

Afi sɛɛ lɛ, Nebukadnezar nyiɛ emaŋtsɛ shĩa lɛ yiteŋ eekwɛ bɔ ni Babilon yɔɔ fɛo hã. Ewie akɛ: ‘Kwɛmɔ maŋ fɛfɛo nɛɛ ni mima lɛ. Mɔ ko bɛ ni tamɔ mi!’ Ewieee etãaa ni gbee ko jɛ ŋwɛi kɛɛ lɛ akɛ: ‘Nebukadnezar! Bianɛ lɛ, ojeee maŋtsɛ dɔŋŋ.’

Nakai ŋmɛlɛtswaa lɛ nɔ nɔŋŋ lɛ, Nebukadnezar ye sɛkɛ ni etsɔ tamɔ jwɛiaŋ kooloo. Eshi emaŋtsɛ shĩa lɛ mli ni eyafata jwɛiaŋ kooloi lɛ ahe yɛ jwɛi amli. Nebukadnezar yitsɔi tsa tamɔ okropɔŋ tsɛji, ni ewaobii anaa tsa tamɔ loofɔji awaobii anaa.

Afii kpawo sɛɛ lɛ, Nebukadnezar ba gbɔmɛi ateŋ ekoŋŋ, ni Yehowa wó lɛ Babilon nɔ maŋtsɛ. Kɛkɛ ni Nebukadnezar wie akɛ: ‘Miijie Yehowa, ŋwɛi Maŋtsɛ lɛ yi. Kpaako mina akɛ Yehowa ji Nɔyelɔ. Ebaa mɛi ni wóɔ amɛhe nɔ lɛ ashi, ni enyɛɔ ekɛ maŋtsɛyeli ko hãa mɔ fɛɛ mɔ ni esumɔɔ.’