Yoo Lɛ Ni Ba Nubu Lɛ He Lɛ

Hehoo lɛ sɛɛ lɛ, Yesu kɛ ekaselɔi lɛ yi mli akɛ amɛmiiku amɛsɛɛ kɛmiiya Galilea. Shi esa akɛ amɛtsɔ Samaria kɛya. Be ni amɛshɛ Yakob nubu lɛ he lɛ, Yesu jɔɔ ehe fioo. Yakob nubu lɛ bɛŋkɛ Sikar maŋ lɛ. Be ni Yesu jɔɔ ehe lɛ, kaselɔi lɛ tee maŋ lɛ mli koni amɛyahé niyenii.

Yoo ko ba ni ebayɛ nu. Yesu kɛɛ lɛ akɛ: “Hã mi nu lɛ eko manu.” Shi yoo lɛ kɛɛ lɛ akɛ: ‘Mɛni hewɔ okɛ mi wieɔ? Samaria yoo ji mi. Yudafoi kɛ Samariabii ewieee.’ Yesu here nɔ akɛ: ‘Eji ole mɔ ni miji kulɛ, obaabi mi ni mahã bo nu ni hãa mɔ wala.’ Yoo lɛ kɛɛ Yesu akɛ: ‘Mɛni owieɔ lɛ? Obɛ goga po.’ Yesu kɛɛ lɛ akɛ: ‘Mɔ fɛɛ mɔ ni baanu nu ni mahã lɛ lɛ, kumai yeŋ lɛ dɔŋŋ.’ Yoo lɛ kɛɛ lɛ akɛ: “Onukpa, hã mi nu nɛɛ eko.”

Yesu kɛɛ lɛ akɛ: ‘Yaa ni oyatsɛ owu kɛba.’ Yoo lɛ kɛɛ lɛ akɛ: “Mibɛ wu.” Yesu kɛɛ lɛ akɛ: ‘Owie anɔkwale. Obote gbalashihilɛ mli shii enumɔ, ni nuu ni okɛyɔɔ amrɔ nɛɛ, jeee owu ni.’ Yoo lɛ here nɔ akɛ: ‘Miina akɛ gbalɔ ji bo. Mimaŋbii lɛ heɔ amɛyeɔ akɛ amɛbaanyɛ amɛjá Nyɔŋmɔ yɛ gɔŋ nɛɛ nɔ, shi Yudafoi lɛ kɛɛ Yerusalem pɛ esa akɛ ajá Nyɔŋmɔ yɛ. Mile akɛ, kɛ́ Mesia lɛ ba lɛ, ebaatsɔɔ wɔ bɔ ni esa akɛ wɔjá Nyɔŋmɔ wɔhã.’ Be ni yoo lɛ wie nakai lɛ, Yesu kɛɛ lɛ nɔ ko ni kɛyashi nakai beiaŋ lɛ, ekɛko mɔ ko mɔ ko. Ekɛɛ lɛ akɛ: ‘Miji Mesia lɛ.’

Yoo lɛ kɛ oyaiyeli ku esɛɛ kɛtee maŋ lɛ mli ni eyakɛɛ Samariabii lɛ akɛ: ‘Efeɔ mi akɛ mina Mesia lɛ. Ele nibii fɛɛ ni mifee. Nyɛbaa nyɛbakwɛa!’ Mɛi lɛ nyiɛ yoo lɛ sɛɛ kɛba nubu lɛ he, ni Yesu tsɔɔ amɛ nii.

Samariabii lɛ kpa Yesu fai ni ebahi amɛmaŋ lɛ mli. Yesu tsɔɔ nii yɛ jɛmɛ gbii enyɔ, ni mɛi babaoo he enɔ amɛye. Amɛkɛɛ Samaria yoo lɛ akɛ: ‘Amrɔ nɛɛ, wɔle faŋŋ akɛ, nuu nɛɛ ji mɔ ni baahere je lɛ yiwala, ejaakɛ wɔbo lɛ toi.’