Ná Mɔ Lɛ He Tsui

Nɔ Ni Yesu Fee

VIDIO: Yesu Ná Enyɛmi Nuu Lɛ He Tsui Ni Eye Ebua Lɛ

1. Kwɛmɔ VIDIO lɛ, loo kanemɔ Yohane 7:​3-5 kɛ 1 Korintobii 15:​3, 4, 7. No sɛɛ lɛ, susumɔ sanebimɔi ni nyiɛ sɛɛ nɛɛ ahe:

1. Be ni Yesu shiɛ ehã enyɛmimɛi lɛ, shishijee lɛ, te amɛfee amɛnii amɛhã tɛŋŋ?

2. Mɛni tsɔɔ akɛ Yesu ná enyɛmi Yakobo he tsui?

Mɛni Wɔkaseɔ Yɛ Nɔ Ni Yesu Fee Lɛ Mli?

2. Esa akɛ wɔná mɛi ahe tsui, ejaakɛ mɛi komɛi yɛ ni eheɔ be dani amɛmɔɔ sane kpakpa lɛ mli.

Kasemɔ Yesu

3. Tsɔ gbɛ kroko nɔ oshiɛ. Kɛ́ shishijee mli lɛ, mɔ lɛ ekpɛlɛɛɛ ni okɛ lɛ aje Biblia mli nikasemɔ shishi lɛ, ná ehe tsui. Kɛ́ hegbɛ ko gbele lɛ, tsɔ asafo lɛ vidioi loo asafo lɛ woji lɛ eko nɔ oye obua lɛ ni ena bɔ ni wɔkɛ mɛi feɔ Biblia mli nikasemɔ wɔhãa kɛ bɔ ni ebaaná he sɛɛ.

4. Okɛ lɛ akato mɔ ko he. Esoro mɔ fɛɛ mɔ. Kɛ́ ewa kɛhã owekunyo ko loo mɔ ko ni okɛ lɛ gbaa sane lɛ akɛ ebaahã okɛ lɛ aje Biblia mli nikasemɔ shishi loo ebaakpɛlɛ Biblia mli tsɔɔmɔ ko nɔ lɛ, taomɔ nɔ hewɔ. Ani eeenyɛ efee akɛ jamɔ mli kusum ko ehe etsui fɛɛ? Ani eeenyɛ efee akɛ ewekumɛi loo ekutsoŋbii lɛ ahewɔ? Hã lɛ be ni esusu nɔ ni okɛ lɛ ewie lɛ he ni ena sɛɛnamɔ ni yɔɔ nɔ ni Biblia lɛ kɛɔ lɛ he.

5. Sɔlemɔ ohã mɔ lɛ. Sɔlemɔ obi Yehowa ni eye ebua bo ni onijiaŋ akaje wui, ni okɛ hiɛshikamɔ atsu nii. Bi Yehowa ni eye ebua bo ni ona kɛji mɔ lɛ bɛ sane lɛ he miishɛɛ lɛɛlɛŋ ni no hewɔ lɛ esa akɛ okpa eŋɔɔ yaa.—1 Kor. 9:26.