Wɔnifeemɔi Saa Asafo Lɛ He

Wɔkaneɔ yɛ Abɛi Awolo 11:11 akɛ: “Jalɔi ajɔɔmɔ akɛwóɔ maŋ nɔ; shi mɛifɔji anaabu butuɔlɛ.”

Maŋbii ni kɔɔ jalɛ gbɛ lɛ haa hejɔlɛ baa maŋ lɛ mli ni ehiɔ ehaa mɛi fɛɛ, ni amɛtswaa mɛikrokomɛi amɛmaa shi ni ehaa maŋ lɛ shwereɔ. Shi mɛi ni maleɔ ni amɛwieɔ wiemɔi ni ejaaa ni yeɔ mɔ awui lɛ kɛ hirihiriwoo, ŋkɔmɔyeli, mligbalamɔ kɛ naagba baa. Ebaa nakai titri kɛji mɛnɛɛmɛi hiɛ gbɛhei ni kwɔlɔ kɛ hewalɛ babaoo. Maŋ ni mɛnɛɛmɛi yɔɔ mli lɛ mli ejɔɔɔ, ni jeŋba kɛ shika gbɛfaŋ fitemɔ baa.

Shishitoomla ni atsɔɔ yɛ biɛnɛɛ kɔɔ Yehowa Odasefoi Kristofoi lɛ hu ahe, ejaakɛ amɛyɛ asafoi ni tamɔ mɔji amli. Asafo ni emlibii ni yɔɔ hegbɛ lɛ kɛ Ŋmalɛi lɛ tsuɔ nii ni amɛji mumɔŋ gbɔmɛi lɛ yɛ miishɛɛ, eyɛ klakla, eyeɔ ebuaa emlibii lɛ, ni ewoɔ Nyɔŋmɔ hiɛ nyam. Nyɔŋmɔ naa he miishɛɛ ni ejɔɔ nakai asafo lɛ yɛ mumɔŋ. Shi mɛi ni gbigbiliɔ amɛmli, amɛtsui enyɔɔɔ amɛmli, amɛtaoɔ tɔmɔi yɛ mɛi ahe, ni amɛwieɔ gbɛ nɔ ni atsɔɔ afeɔ nibii lɛ he nyanyaanya lɛ tamɔ “shishifa-kɛjoomɔ” ni nyɛɔ elɛɔ shi ni efiteɔ mɛikrokomɛi ni yɛ shishijee mli lɛ kulɛ enɛɛmɛi naaa amɛnɔ hewalɛ ko lɛ. (Heb. 12:15) Efɔɔ kaa akɛ mɛi-anaagbalɔi lɛ sumɔɔ akɛ amɛna hegbɛ babaoo kɛ gbɛhe ni kwɔ. Amɛtãa kɛfoɔ shi akɛ aŋmɛɛ saji ahe kɛkɛ aloo ayeee jalɛsane loo aakwɛkwɛɛ hiɛaŋ yɛ heni mɔ jɛ gbɛfaŋ, kɛniikɛnii, yɛ asafo lɛ mli, aloo akɛ asafoŋ onukpai lɛ miifee nakai.

Abɛ kroko hu wieɔ shishitoomla nɛɛ he yɛ mɔ aŋkro gbɛfaŋ, ni ekɛɔ akɛ: “Naajɔlɛ lilɛi lɛ, walatso ni; shi kutumpɔo nɔ̃ lɛ, tsuiŋdɔlɛ ni.” (Abɛi 15:⁠4) Lilɛi ni wieɔ wiemɔ kpakpa ni ji anɔkwale, yɛ kpoofeemɔ, mlihilɛ kɛ heshibaa mli, lɛ naa hewalɛ kpakpa yɛ mɔni nuɔ lɛ nɔ. Ewóɔ mɔ lɛ nɔ ni etswaalɛ emaa shi yɛ mumɔŋ, ni yɛ nohewɔ lɛ eyeɔ ebuaa asafo tso muu lɛ mumɔŋ hewalɛnamɔ. Shi kutumpɔo lilɛi yeɔ mɛi ni boɔlɛ toi lɛ amumɔ awui ni ekumɔɔ amɛ, ni ehaaa amɛnu susumɔi kpakpai ni baaye ebua amɛ yɛ wala gbɛ lɛ nɔ. Belɛ lilɛi fɔŋ lɛ haa mɛikrokomɛi naà mumɔŋ fitemɔ kɛ gbele.