Mɛni Hewɔ Esani Okwɛ Yehowa Gbɛ Yɛ Nɔ Fɛɛ Nɔ Ni Ofeɔ Mli?
Nɔ FƐƐ Nɔ ni kɛ Nyɔŋmɔ suɔmɔnaanii kpaaa gbee lɛ yeee omanye. Yɛ gbɔmɔ gbɛfaŋ lɛ, ebaafeelɛ tamɔ nɔni nitsumɔ ko ni etsuɔ lɛ he baaba sɛɛnamɔ kpele wɔsɛɛ. Shi naagbee kwraa lɛ, nɔ ko jɛɛɛ mli kɛbaaa.Nohewɔ lɛ, esani wɔkai Bɔlɔ lɛ yɛ nɔ fɛɛ nɔ ni wɔtsuɔ lɛ mli.
Lala 127 gbala wɔjwɛŋmɔ kɛtee bɔni enɛ feemɔ he hiaa waa lɛ nɔ. Wɔkaneɔ akɛ: “Kɛ jeee Yehowa maa tsu lɛ, no lɛ yakatswaa mɛi ni maa lɛ gboɔ he deŋme. Kɛ jeee Yehowa buɔ maŋ lɛ he lɛ, no lɛ yakatswaa bulɔ lɛ shiɔ he kpe. Yakatswaa nyɛteɔ shi maŋkɛ mra, nyɛtsɛɔ aahu dani nyɛyajɔɔ nyɛhe, nyɛyeɔ hejaramɔ aboloo: nakai eŋɔhaa mɔ ni esumɔɔ lɛ yɛ wɔɔ mli.”—Lala 127:1, 2.
Gbɔmɔ baanyɛ ema tsu. Shi nɔdaamɔnɔ ko bɛ ni tsɔɔ akɛ ebaahi mli ni eye mli ŋɔɔmɔ. Kpatugbele, oshara aloo nɔ ko ni baaba trukaa lɛ baanyɛ aha edeŋmegbomɔ lɛ fɛɛ afee yaka. Ekolɛ, maŋ ko yɛ ni bulɔi buɔ he jogbaŋŋ ni amɛbaa eyi. Shi maŋ lɛ baanyɛ afite yɛ ta mli, aloo shikpɔŋhosomɔ aloo la mli. Gbɔmɔ baanyɛ ate shi maŋkɛ etsu nii aahu kɛyashi jenamɔ dani eta shi ejɔɔ ehe ni eye nii. Shi ekolɛ, amɛnitsumɔ lɛ haaa amɛna miishɛɛ ko kwraa. Akɛni amɛnitsumɔ lɛ haa etɔɔ amɛ tsɔ hewɔ lɛ, ekolɛ niyenii diɛŋtsɛ eŋɔɔɔ amɛ naa. Shi Nyɔŋmɔ sɔɔlɔ naa nɔni kulɛ nakai gbɔmɛi lɛ baana kɛjɛ nakai deŋmegbomɔ kpele lɛ mli lɛ ni nakai tɔlɛ babaoo lɛ fataaa he. Belɛ ehejɔlɛ lɛ mli miishɛɛ ni enaa lɛ bafeɔ nɔkeenɔ diɛŋtsɛ ni jɛ Nyɔŋmɔ ŋɔɔ.
Yɛ enɛ kɛ gbeekpaamɔ naa lɛ, lalatsɛ lɛ bu nibii ni tamɔ tsumaa, toiŋjɔlɛ ni maŋ ko aaana kɛ shihilɛ mli miishɛɛ ni mɔ ko naa lɛ akɛ Nyɔŋmɔ dɛ jɔɔmɔ. Ebu weku mli miisɛɛ ni mɔ aaana lɛ hu nakai akɛ: “Naa, Yehowa gboshinii ni ehaa ji bii, ni nikeenii ji musuŋbii. Bɔni gaimlibii yɔɔ yɛ ekãalɔ dɛ lɛ, nakai oblahiaŋ bihii yɔɔ. Ajɔɔ nuu ni amɛyi egaimlibii akotoku lɛ tɔ Iɛ! Amɛ lɛ, kɛ amɛkɛ henyɛlɔi miitaa naa yɛ agbo naa lɛ, amɛhiɛ gboiii.”—Lala 127:3-5.
Abu nuu ni fɔ́ ebii yɛ beni lɛ diɛŋtsɛ ekã he eyɔɔ oblahiaŋ hewalɛ lɛ akɛ mɔni ajɔɔlɛ. Be mli ni ebii lɛ eda lɛ, amɛtamɔ gaimlibii yɛ edɛ. Ni amɛnyɛɔ amɛfãa amɛtsɛ he yɛ mla naa yɛ ehenyɛlɔi ahiɛ. Akɛni maji agbói anaa maŋ onukpai ye sane yɛ hewɔ lɛ, jɛmɛ ji heni bii kɛ henyɛlɔi lɛ baawie yɛ kojomɔ mli yɛ, ní amɛku henyɛlɔ lɛ naa yɛ amɛmalemɔi kɛ amale odasei ni amɛyeɔ lɛ mli.
Akɛni Yehowa jɔɔmɔ he hiaa koni nitsumɔi fɛɛ aya nɔ jogbaŋŋ hewɔ lɛ, esani wɔbɔ mɔdɛŋ ni wɔba wɔjeŋ yɛ gbɛ ni saa ehiɛ lɛ nɔ. Esani wɔfee nii ni ekɛ wiemɔ ni jɛ mumɔ mli nɛɛ shishinumɔ akpaa gbee akɛ: “Kɛji Nuŋtsɔ [Yehowa] miisumɔ ni wɔyi na wala lɛ, no lɛ wɔɔɔfee enɛ loo enɛ.”—Yak. 4:15.