Yei ni Tsuɔ Nii yɛ Nitsumɔ He​—Kaai kɛ Naagbai

“WORLDWATCH Institute, ni ji gbɛjianɔtoo ko ni taoɔ saji amli lɛ bɔ amaniɛ akɛ: “Yei kɛ amɛhe ewo apaafoi anitsumɔ mli babaoo yɛ afii nyɔŋmai etɛ ni eho nɛɛ mli fe be fɛɛ.” Amaniɛbɔɔ lɛ tee nɔ ekɛɛ akɛ, “Nibii ajara ni waa yɛ maji ni yɔɔ shika kɛ maji ni bɛ shika lɛ amli fɛɛ lɛ woɔ yei ahewalɛ ni amɛtsu nii ni awo amɛ nyɔmɔ.” Aloo taakɛ Nigeria yoo ko tsɔɔ mli lɛ: “Bɔ ni shika helɛtemɔ he sane lɛ naa wa aahu ha hewɔ lɛ, ehe ebahia ni maje kpo ni mayatsu nii.”

Taakɛ “yoo kpakpa” ni yɔɔ Biblia bei amli lɛ ji lɛ, yei pii yɛ miishɛɛ akɛ amɛaaye amɛbua amɛwekui lɛ yɛ shika gbɛfaŋ (Abɛi 31: 10, 16, 24) Ni mɛi komɛi hu naa akɛ nitsumɔ ni amɛyɔɔ lɛ haa amɛkɛ nibii ni mli wawai kpeɔ, ni yɛ nakai beaŋ nɔɔŋ lɛ amɛtsui nyɔɔ amɛmli. Shi yɛ be mli ni heloo gbɛfaŋ nitsumɔ kɛ sɛɛnamɔi komɛi baa lɛ, eyɛ nibii komɛi ni gbalaa mɔ sɛɛ yɛ mli.

Akɛ nɔkwɛmɔ nɔ lɛ, yoo ko ni ekwɛɔ shwapo ko nɔ lɛ kɛɛ akɛ: “Misumɔɔ minitsumɔ lɛ. Minitsumɔtsɛ lɛ bɔɔ mɔdɛŋ, minitsumɔ he lɛ yɛ fɛo. Shi kɛji akɛ nitsumɔ lɛ miihe mibe babaoo fe bɔ ni sa lɛ, misumɔɔɔ kwraa ejaakɛ yɛ fɛɛ sɛɛ lɛ, miyɛ nitsumɔ kroko ni miimɛ mi yɛ shia​—akɛ ŋa kɛ nyɛ.” Yɛ fɛɛ sɛɛ, yei babaoo tsuɔ nii, amɛkwɛɔ shia kɛ amɛweku lɛ hu jogbaŋŋ, ni yɛ enɛ mli lɛ, amɛsa yijiemɔ waa.a

Heloo gbɛfaŋ nitsumɔ hu haa yei kɛ naagbai kpeɔ yɛ nitsumɔ he. Shwe ni yei komɛi shweɔ ni amɛya hiɛ lɛ eha yei komɛi kɛ amɛnitsumɔi efee nɔ ni amɛjwɛŋɔ he yɛ shihilɛ mli.

Yɛ bei komɛi amli hu lɛ, nitsumɔ he lɛ bafeɔ he ni anyɛɔ mɔ nɔ yɛ jeŋba mli yɛ. Wiemɔ sha ni yaa nɔ daa gbi lɛ ji haomɔ kome ni yei ni tsuɔ nii lɛ wieɔ he. Nɔ ni ehiii kwraa lɛ, amɛteŋ mɛi komɛi naa amɛhe akɛ mɛi ni akɛ bɔlɛnamɔ miinyɛ amɛnɔ. Kristofonyo yoo ko kɛɛ akɛ: “Beni mije nitsumɔ shishi klɛŋklɛŋ lɛ, no mli lɛ miji gbekɛ yoo kome pɛ ni yɔɔ nitsumɔ he lɛ. Hii lɛ wieɔ wiemɔi ni tsɔɔ akɛ amɛmiisumɔ mi, ni enɛ wa diɛŋtsɛ kɛhami.”

Nɛkɛ naagbai nɛɛ ji nɔ ko ni yei susuɔ he waa, ejaakɛ amɛkɛ enɛɛmɛi kpeɔ daa gbi, titri lɛ mɛi ni sumɔɔ ni amɛhiɛ Kristofoi ataomɔ nii ni afolɔ ashwie shi lɛ mli lɛ. Yɛ miishɛɛ mli lɛ, yelikɛbuamɔ jɛɛhe ko yɛ.

[Shishigbɛ niŋmai]