Teemɔŋ Sane​—Namɔ Ji Ajwamaŋ Babilon Kpeteŋkpele Lɛ?

AGBE yoo ko, ajwamaŋ ni hiɛ eshwie shi, ni ena gbɔmɛi akpekpei abɔ ashihilɛ nɔ hewalɛ lɛ. Shi enɛ jeee hiɛkpatamɔ folo kɛkɛ. Mɛni ha efeɔ sɔrɔto lɛ? Blafo loo hiɛkpatalɔ lɛ ji kooloo ko, kooloo ni hiɛ yɔɔ la ni ŋmɛɔ lɛ yayai, ni yeɔ eheloo, ni eshiɔ ewui lɛ koni la akpata hiɛ. Namɔ ji yoo ni ehe gbɛi nɛɛ? Mɛni hewɔ kooloo ni hiɛ yɔɔ la tutua lɛ? Mɛni efee ni sa nɛkɛ awuiyeli naagbee nɛɛ?a​—Kpojiemɔ 17:​16,17.

Enɛ baanyɛ afee nɔdaamɔ nɔ kɛha teemɔŋ sane ko ni yɔɔ miishɛɛ​—shi belɛ ejeee adesai ahe gbɛjianɔtoo ko. Eji nii ni baaba mli yɛ yinɔsane mli ni emlibaa lɛ miihe ashɛ shi. Ni ekɔɔ ohe, ejaakɛ ekolɛ nɛkɛ ajwamaŋ ni hiɛ eshwie shi nɛɛ miina oshihilɛ nɔ hewalɛ bianɛ. Agbɛnɛ hu, kɛ okɛ lɛ aaahi shi loo oootsi ohe kɛaajɛ ehe lɛ baatsɔɔ wala kɛ gbele aha bo. No hewɔ lɛ namɔ ji yoo nɛɛ?

Teemɔŋ Yoo Lɛ Hemɛi

Yohane etsɔɔ nɛkɛ femme fatale, shishiulɔ ni hiɛ gbooo nɛɛ mli yɛ Biblia mli gbalɛ wolo ni ji Kpojiemɔ lɛ mli, he ni wɔkaneɔ yɛ akɛ: “Ni [bɔfo lɛ] ekpala mi kɛtee ŋa nɔ yɛ mumɔ mli; ni mina yoo ko ni ta kooloo ni tsuɔ tamɔ muneele ko nɔ ni ehe eyi obɔ kɛ musubɔɔ ni eyɛ yitsei kpawo kɛ akoloŋtoi nyɔŋma. Ni yoo lɛ wo afaseɔ diŋ kɛ muneele atade, ni akɛ shika kɛ tɛi ni jara wa kɛ adiagbai ewula lɛ ni ehiɛ shika kpulu ni eyi obɔ kɛ ejwamaŋbɔɔ lɛ mli nihii nii kɛ muji nii lɛ yɛ edɛŋ; ni aŋma gbɛi ko yɛ ehiɛnaa akɛ teemɔŋ sane: Babilon kpeteŋkpele lɛ, shikpɔŋ lɛ nɔ ajwamaŋi lɛ kɛ nihii nii lɛ anyɛ lɛ.”​—Kpojiemɔ 17:​3-5.

Agbɛnɛ nɛkɛ “Babilon kpeteŋkpele” nɛɛ baanyɛ afee yoo ni he wa waa, ejaakɛ sane lɛ kɛɔ yɛ Kpo 17 kuku 1 akɛ “eta nui babaoo lɛ anɔ.” Mɛni ji nɔ ni enɛ tsɔɔ? Nyɔŋmɔ bɔfo lɛ tsɔɔ mli etsɔɔ Yohane: “Nui lɛ ni ona ni yoo ajwamaŋ lɛ ta nɔ lɛ ji maji kɛ asafoi kɛ jeŋmaji kɛ majianɔ wiemɔi.” (Kpojiemɔ 17:15) Ŋwanejee ko bɛ he akɛ naa ajwamaŋ ni ehe gbɛi yɛ je lɛŋ. Shi ejeee ajwamaŋ folo ko kɛkɛ. Eji “ajwamaŋi. . . lɛ anyɛ,” nitsumɔ lɛ nɔkwɛlɔ. Kɛ eba ajwamaŋbɔɔ he lɛ, ekɛ famɔ haa. Shi eyɛ hemɛi krɛdɛɛi hu.

Ŋwɛibɔfo lɛ jie mɛi ni ajwamaŋ kpeteŋkpele nɛɛ hemɛi krɛdɛɛ lɛ ji lɛ kpo. Mɛɛ gbɛ nɔ etsɔɔ ehaa ayooɔ amɛ? Ekɛɔ akɛ Babilon Kpeteŋkpele lɛ ji mɔ ni “shikpɔŋ lɛ nɔ maŋtsɛmɛi lɛ kɛbɔ ajwamaŋ, ni mɛi ni yɔɔ shikpɔŋ lɛ nɔ lɛ tɔrɔ daa kɛ ejwamaŋbɔɔ lɛ daa lɛ.” (Kpojiemɔ 17:⁠2) Esa akɛ mɔ nɛɛ afee ajwamaŋ ni lakaa mɔ ni nyɛɔ etsɔɔ he fɛɛ he bɔ ni afee ni enyɛ etsɔ je lɛŋ maŋkwramɔŋ nɔyelɔi lɛ ayiŋ, “shikpɔŋ lɛ nɔ maŋtsɛmɛi” lɛ diɛŋtsɛ lɛ! No hewɔ lɛ namɔ ji yoo nɛɛ?

Bɔfo lɛ kɛɛ eyɛ gbɛi, teemɔŋ sane, “Babilon Kpeteŋkpele” lɛ. Agbɛnɛ naa nibii enyɔ ni baaha ayoo lɛ​—ekome ji ehemɛi lɛ ni esumɔɔ amɛ lɛ ni ekroko lɛ ji egbɛi, Babilon kpeteŋkpele lɛ. Nɛkɛ nibii enyɔ nɛɛ haa wɔmuɔ mɛɛ sane naa?

[Shishigbɛ niŋmai]