Yiŋkpɛɛ
Mɛi ni ba “Ŋwɛi Jalɛsaneyeli” kpee lɛ ashishi lɛ ayi baafa kwraa fe mɛi ni ba nyɛsɛɛ afi lɛ kpee lɛ shishi ni amɛyibɔ fɛɛ fee 6,443,597 yɛ hei sɔrɔtoi 1,098 yɛ jeŋ fɛɛ ni abaptisi 93,822 lɛ. Nɔ ni nyiɛ wiemɔ ni akɛha ni yitso ji “‘Ajwamaŋ’ ni Hiɛ Eshwie Shi Lɛ” sɛɛ yɛ “Ŋwɛi Jalɛsaneyeli” kpeei lɛ ashishi ji wolo ni ajie lɛ kpo yɛ wiemɔi fe 20 mli, ni eji wolo ni yɔɔ fɛo ni akɛ mfonirii sɔrɔtoi etsɔɔ mli ni hiɛ baafai 320 ni egbɛi ji Revelation—Its Grand Climax at Hand! (Kpojiemɔ—Enaagbee Kwraa lɛ Ebɛŋkɛ!) lɛ. Wiɛlɔ lɛ kɛɛ etoibolɔi lɛ akɛ: “Nyɛkɛ wolo nɛɛ atsua nii jogbaŋŋ yɛ nyɛteemɔŋ kɛ asafoŋ nikasemɔi amli. Nyɛkɛtsua nii hu ni nyɛkɛtswaa adafi nyɛtsɔa je lɛ akɛ abu Babilon kpeteŋkpele lɛ fɔ, akɛ Harmagedon miiba jeŋmaji lɛ anɔ agbɛnɛ, ni akɛ ebaashɛ naagbee kwraa yɛ anunyam mli yɛ Yehowa anunyam Maŋtsɛyeli nɔyeli ni yɔɔ Kristo kɛ eyɛmforo lɛ dɛŋ lɛ mli. Miishɛɛ ji nyɛ kɛ nyɛnu ni nyɛye nɛkɛ nibii nɛɛ anɔ lɛ, ‘ejaakɛ be ni ato Lɛ eshɛ shi eta’!”—Kpojiemɔ 1:3.
Wɔ, ni wɔyɔɔ wala mli kɛjɛ 1914 yɛ “Nuŋtsɔ lɛ gbi lɛ nɔ” kɛ ŋwɛi kojomɔ be nɛɛ mli lɛ mli filiɔ wɔ yɛ hegbɛ ni fe fɛɛ ni wɔna akɛ wɔɔsɔmɔ Nuŋtsɔ Maŋtsɛ Yehowa, yɛ emaŋtsɛmɛi a-Maŋtsɛ, Yesu Kristo shishi lɛ hewɔ. (Kpojiemɔ 1:10) Akɛ YEHOWA ODASEFOI lɛ, wɔyeɔ odase akɛ:
(1) WƆHIƆ ahorabɔɔ ni Babilon kpeteŋkpele lɛ, titri lɛ Kristendom kɛba Yehowa anɔkwa Nyɔŋmɔ hiɛkalɔ kome lɛ gbɛi lɛ nɔ lɛ. Yɛ wɔ gbɛfaŋ lɛ, wɔkɛ tsui muu fɛɛ MAA NƆ Mi yɛ Kpojiemɔ 4:11 wiemɔi nɛɛ amli akɛ: “Nuŋtsɔ Yehowa wɔ-Nyɔŋmɔ, bo ji mɔ ni sa akɛ oŋɔ anunyam kɛ agbojee kɛ hewalɛ lɛ.”
(2) WƆHIƆ Babilon tsɔɔmɔi ni Kristendom kɛ ehe ekpɛtɛ he lɛ, tamɔ nyɔŋmɔi etɛ ni efee ekome, adesa susuma ni gbooo, piŋmɔ kɛmiiya naanɔ yɛ hɛl, la hetsuumɔ he, kɛ amagai ajamɔ—tamɔ Madonna kɛ krɔs lɛ. Ni akɛ nɔ ni kɛ Kpojiemɔ 22:18, 19 kpaa gbee lɛ, WƆKƐ SHIŊŊFEEMƆ YEƆ Nyɔŋmɔ Wiemɔ lɛ kɛ nibii ni aŋmala yɛ mli lɛ fɛɛ nɔ.
(3) WƆHIƆ jeŋ nilee kɛ nifeemɔi ni yaa nɔ babaoo yɛ Kristendom ni teɔ shi ewoɔ Nyɔŋmɔ, tamɔ sutsakemɔ, la ni agbalaa awoɔ mɔ mli, musufitemɔ, malemɔ, hiɛjoomɔ kɛ ojotswaa lɛ. Wɔbaatsɔ wɔjamɔ kɛ wɔshihilɛ nɔ WƆWO wɔ Bɔlɔ, Yehowa Nyɔŋmɔ Ofe, mɔ ni atsɔɔ yɛ Kpojiemɔ 15:3 akɛ egbɛi “ja ni anɔkwa ji amɛ” lɛ HIƐ NYAM.
(4) WƆHIƆ bɔ ni Kristendom yeee saji ni Yesu kɛmaje asafoi kpawo ni yɔɔ Kpojiemɔ yitsei 2 kɛ 3 yɛ shihilɛi ni kɔɔ mligbalamɔi, wɔŋjamɔ, ajwamaŋbɔɔ, hewalɛ ni Yezebel naa yɛ mɛi anɔ, kulɔkulɔfeemɔ kɛ wɔdɔiwɔɔ lɛ he lɛ anɔ lɛ. Yɛ wɔ gbɛfaŋ lɛ, WƆBAAFEE TOIBOO Nl WƆYE nɔ ni “mumɔ lɛ kɛɔ asafoi” lɛ ANƆ.
(5) WƆHIƆ jeŋba shara kɛ su ni ŋmɛɔ nɔ fɛɛ nɔ feemɔ gbɛ ni yɔɔ Kristendom kɛ esɔfoi lɛ ateŋ lɛ, ni wɔkpɛlɛɔ Yehowa jalɛ kojomɔ ni mli ka shi faŋŋ ni aŋma yɛ Kpojiemɔ 21:8, akɛ mɛi ni feɔ nihii nii—ajwamaŋbɔlɔi, amalelɔi, kɛ mɛi krokomɛi ni tamɔ nakai lɛ—abaakpata amɛhiɛ kwraa lɛ nɔ. WƆJƐƆ WƆTSUI MUU FƐƐ MLl WƆFIƆ Biblia mli taomɔ nii ni kɔɔ bɔlɛnamɔ, gbalashihilɛ kɛ weku shihilɛ he lɛ SƐƐ.
(6) WƆHIƆ mumɔŋ ajwamaŋ ni Babilon Kpeteŋkpele lɛ mli osɔfoi lɛ kɛ afii ohai abɔ kɛ je nɛɛ hiɛnyiɛlɔi ebɔ ni etsɔ nɔ ena hewalɛ, jwetri babaoo, kɛ nɔnyɛɛ ni ekɛyeɔ gbɔmɛi foji lɛ anɔ lɛ. WƆKPƐ WƆYIŊ akɛ wɔbaaye wɔbua gbɔmɛi ni yɔɔ tsuijurɔ lɛ fɛɛ ni amɛye bɔfo lɛ famɔ ni yɔɔ Kpojiemɔ 18:4 lɛ nɔ akɛ: “Nyɛjea emli mimaŋ.”
(7) WƆHIƆ la yi sɔyeli babaoo ni jɛ gbɔmɛi akpekpei 100 ni akpata amɛhiɛ yɛ tai amli yɛ afii oha nɛɛ pɛ mli lɛ ni jɛ ajwamaŋ ni ajwamaŋ kpeteŋkpele lɛ kɛ maŋkwramɔŋ hewalɛi lɛ bɔɔ lɛ hewɔ lɛ. WƆMLI FILIƆ wɔ akɛni be ni ato ni Nyɔŋmɔ kɛbaafɔse toigbalamɔ kojomɔ eshwie Babilon Kpeteŋkpele lɛ nɔ, taakɛ bɔ ni aŋma yɛ Kpojiemɔ 18:21-24 lɛ bɛŋkɛɔ lɛ hewɔ.
Akɛ Yehowa Odasefoi lɛ, WƆBUƆ ENƐ AKƐ MIISHƐƐ SANE KƐ HEGBƐ Nl WƆNA akɛ wɔɔtswa adafi wɔtsɔɔ je lɛ akɛ “je nɛŋ maŋtsɛyeli lɛ etsɔ wɔ-Nuŋtsɔ [Yehowa] kɛ e-Kristo lɛ nɔ” yɛ 1914. (Kpojiemɔ 11:15) WƆKPƐ WƆYIŊ akɛ wɔbaaya wɔhiɛ ni wɔsheee gbeyei yɛ Yehowa kojomɔi ni wɔjajeɔ wɔshwieɔ Babilon Kpeteŋkpele lɛ nɔ lɛ mli kɛ Nyɔŋmɔ ta ni ji Harmagedon ni hiɛ foi kɛbaa lɛ he kɔkɔ ni wɔɔbɔ lɛ mli. WƆTSWA WƆFAI SHI akɛ wɔkɛ gbee ni wa baajaje miishɛɛ sane lɛ wɔtsɔɔ mɛi ni yɔɔ “jeŋmaŋ fɛɛ jeŋmaŋ kɛ akutso fɛɛ akutso kɛ majianɔwiemɔi fɛɛ kɛ maŋ fɛɛ maŋ” mli lɛ akɛ “ŋwɛi hee kɛ shikpɔŋ hee” kɛha adesai toibolɔi fɛɛ ajɔɔmɔ lɛ eshɛ shi eta.(Kpojiemɔ 14:6; 21:1) . WƆMLI FlLlƆ wɔ akɛ yɛ nɔ ni wɔjaje nɛɛ hewɔ lɛ, gbɔmɛi asafoi babaoo ko ni yibɔ fe akpekpei 3 ni jɛ jeŋmaji fɛɛ mli lɛ kɛ wɔ efee ekome bianɛ yɛ jeŋ muu lɛ fɛɛ. Wɔfataa ŋwɛi bɔfo ni filikiɔ yɛ ŋwɛi teŋ lɛ hewɔ fɛɛ wɔjajeɔ akɛ: “Nyɛshea Nyɔŋmɔ gbeyei ni nyɛkɛ anunyam ahaa lɛ, ejaakɛ ekojomɔ ŋmɛlɛtswaa lɛ eshɛ; ni nyɛjaa mɔ ni fee ŋwɛi kɛ shikpɔŋ kɛ ŋshɔ kɛ nubui ni baa lɛ.”—Kpojiemɔ 14:7.
Sanebimɔi kɛha “Yiŋkpɛɛ” lɛ Kasemɔ:
1. Yehowa Odasefoi amli filiɔ amɛ yɛ mɛni mli bianɛ?
2. Tsɔɔmɔ (a) Nɔ ni Yehowa Odasefoi hiɔ kɛ (b) Nɔ ni Odasefoi lɛ kpɛlɛɔ nɔ ni amɛmaa nɔ mi yɛ Yiŋkpɛɛ lɛ mli saji otii kpawo lɛ eko fɛɛ eko mli.
3. (a) Mɛɛ miishɛɛ kɛ hegbɛ Yehowa Odasefoi ena? (b) Mɛni ji Odasefoi lɛ ayiŋkpɛɛ?(d) Mɛni hu wɔtswa wɔfai shi akɛ wɔbaafee? (e) Mɛɛ miishɛɛnamɔ kɛ sanejajemɔ ko Yehowa Odasefoi naa mli gbɛfaŋnɔ?