Maŋ Ni Yɔɔ Miishɛɛ Lɛ
MAŊ ni yɔɔ miishɛɛ lɛ! Ani nɛkɛ wiemɔ nɛɛ kɔɔ adesai amaŋ ko he ŋmɛnɛ? Ani jeŋmaŋ ko baanyɛ ekɛ miishɛɛ akɛɛ akɛ ejie awuiyeli, yiwalɛ, ohia, kɔɔyɔɔ kɛ nu mli mujiwoo, helai ni kpataa adesai ahiɛ, maŋkwramɔŋ juu kɛ fɔ̃, kɛ jamɔ mli hetsɛ̃ fɛɛ kɛtee? Ani jeŋmaŋ ko yɛ hiɛnɔkamɔ diɛŋtsɛ akɛ ebaanyɛ eshɛ nɛkɛ otii nɛɛ ahe? Dabi kwraa!
Ni mɛni ji jeŋ muu lɛ fɛɛ shikamɔ? Mikhail Gorbachev, ni ji U.S.S.R loo Russia nɔyelɔ lɛ jaje yɛ nyɛsɛɛ July 16 akɛ: “Wɔmiishi be ko ni sa kadimɔ waa yɛ majimaji ateŋ sharamɔ mli, kɛmiiya ekroko mli, ni misusuɔ akɛ eji toiŋjɔlɛ be ko ni mli wa ni sɛɛ baakɛ hu.” Shi kɛlɛ, Time wolo tɛtrɛɛ ni je kpo nakai gbi lɛ nɔŋŋ lɛ bɔ amaniɛ akɛ United States, Amerika kã he lolo ni eta nuklea okpɛlɛmii 120 yɛ Moscow nɔ, ni amɛteŋ ekome pɛ baanyɛ akpata nakai maŋ lɛ hiɛ kwraa. Ni ŋwanejee ko bɛ he akɛ Soviet loo Russiabii lɛ hu efee klalo akɛ amɛkɛ nakai nɔ ko nɔŋŋ baato najiaŋ. Akɛni amrɔ nɛɛ Jeŋmaji Ekomefeemɔ lɛ mlibii lɛ ateŋ maji pii le bɔ ni afeɔ nuklea tawuu nibii ahaa hewɔ lɛ, miishɛɛ bɛ mɔ klɛŋklɛŋ ni baana he miishɛɛ akɛ eeefɛ okpɛlɛmii nɛɛ eko lɛ he susumɔ he tsɔ.
Maŋ ko ni Yɔɔ Miishɛɛ Lɛlɛŋ
Be ko yɛ yinɔsane mli—aaafee afi 3,500 ni eho nɛ—lɛ, maŋ ko ni yɔɔ miishɛɛ lɛlɛŋ hi shi. No ji blema Israel. Beni Nyɔŋmɔ jie nakai maŋ lɛ kɛjɛ Mizraim nɔnyɛɛ shishi lɛ, amɛfata Mose he ni amɛkɛla mlifilimɔ lala ko ni tsɔɔ kunimyeli, ni amɛtee nɔ amɛna miishɛɛ, bei abɔ ni amɛfeɔ toiboo amɛhaa amɛ-Nyɔŋmɔ kɛ Kpɔlɔ lɛ.—2 Mose 15:1-21; 5 Mose 28:1, 2, 15, 47.
Beni Salomo yeɔ maŋtsɛ lɛ, “Yuda kɛ Israel yi fa babaoo, tamɔ ŋshɔnaa shia kɛ falɛ, amɛyeyeɔ nii, amɛnunuɔ dãai, ni amɛmli filiɔ amɛ.” Mlifilimɔ kpele be diɛŋtsɛ nɛ, ni miishɛɛ lɛ fa kwraa kɛteke nɔ kɛ tsu ni ekolɛ eji nɔ ni yɔɔ nyam fe fɛɛ yɛ yinɔsane mli lɛ maa, sɔlemɔtsu kɛha Yehowa jamɔ yɛ Yerusalem.—1 Maŋtsɛmɛi 4:20; 6:11-14.
Ŋmɛnɛŋmɛnɛ Beaŋ Maŋ ni Yɔɔ Miishɛɛ Lɛ
Blema Israel fee ŋmɛnɛŋmɛnɛ beaŋ jeŋmaŋ ko he mfoniri. Mɛɛ maŋ? Maŋkwramɔŋ Israel ni yɔɔ Boka Teŋgbɛ lɛ? Adafitswaa mli amaniɛbɔɔ tsɔɔ akɛ nakai maŋ ni akɛ lɛ peleɔ nii ahe lɛ bɛ miishɛɛ ko kwraa. Ani nakai nɔ ni atsɛɔ lɛ Jeŋmaji Ekomefeemɔ lɛ kɛ miishɛɛ diɛŋtsɛ ebaha emli maji lɛ? Dabi, anɔkwa miishɛɛ bɛ he ko kwraa ni abaana yɛ ŋmɛnɛ beaŋ maŋkwramɔ maji lɛ eko mli. Hiɛjoomɔ, juu kɛ fɔ̃, kɛ anɔkwale ni ayeee egbɛ eshwã he fɛɛ he, ni yɛ maji pii anɔ lɛ, gbɔmɛi foji lɛ gboɔ deŋme babaoo ni amɛnaaa miishɛɛ ko kwraa, ni amɛmiibɔ mɔdɛŋ ni amɛhi shi kɛkɛ.—Abɛi 28:15; 29:2.
Shi kɛlɛ, ŋmɛnɛ, maŋ ko yɛ ni sa kadimɔ jogbaŋŋ ni yɔɔ miishɛɛ babaoo diɛŋtsɛ. Ejeee maŋkwramɔŋ nɔ, ejaakɛ e-Yitso, Kristo Yesu wie yɛ emlibii lɛ ahe akɛ: “Nyɛjɛɛɛ je lɛŋ.” (Yohane 15:19) Ni eyɛ mli akɛ Jeŋmaji Ekomefeemɔ lɛ nine enyɛ shi ni enyɛɛɛ efee emlibii lɛ ekome moŋ, shi nɛkɛ maŋ nɛɛ gbalaa mɛi ni fiɔ esɛɛ lɛ kɛjɛɔ “jeŋmaŋ fɛɛ jeŋmaŋ kɛ akutsei kɛ maji kɛ majianɔ wiemɔi amli.” (Kpojiemɔ 7:4, 9) Amrɔ nɛɛ emlibii lɛ ayibɔ fe akpekpei ejwɛ, ni tsɔɔ akɛ emlibii lɛ ayi fa fe Jeŋmaji Ekomefeemɔ lɛ mlibii 159 lɛ amli maji 60 komɛi amaŋbii ayifalɛ. Nɛkɛ gbɔmɛi ni aaashɛ akpekpei ejwɛ nɛɛ amaŋ nɔ wiemɔi miihe ashɛ 200; ni kɛlɛ amɛ fɛɛ amɛfee ekome kɛmiiwie wiemɔ kome ni ji “wiemɔ krɔŋŋ” lɛ.—Zefania 3:9.
Ani ebɛ naakpɛɛ akɛ maji sɔrɔtoi babaoo anɔ bii aaanyɛ awie wiemɔ kome? Dabi, ejaakɛ nɔ ni fata nɛkɛ wiemɔ kome ni feɔ mɛi ekome nɛɛ he ji Nyɔŋmɔ jalɛ Maŋtsɛyeli ni baa lɛ he shɛɛ sane lɛ. Nɛkɛ maŋ ni yɔɔ miishɛɛ nɛɛ ba “kɛjɛ shikpɔŋ lɛ naagbee he lɛ” ni ale amɛ yɛ jeŋ muu fɛɛ akɛ ‘Yehowa Odasefoi.’ (Yesaia 43:5-7, 10; Zakaria 8:23) He fɛɛ he ni ooofa gbɛ kɛya yɛ shikpɔŋ nɛɛ nɔ lɛ, obaana amɛ yɛ jɛmɛ.
Nyɔŋmɔ gbalɔ lɛ tsɔɔ gbɔmɛi asafo babaoo ko ni eke yuu kɛjɛ jeŋmaji fɛɛ mli lɛ mli faŋŋ yɛ Yesaia 2:2-4 lɛ, ni amɛkɛɔ akɛ: “Nyɛbaa ni wɔyakwɔa Yehowa gɔŋ lɛ, kɛyaa Yakob Nyɔŋmɔ lɛ we lɛ, koni etsɔɔ wɔ egbɛi lɛ, koni wɔnyiɛ etempɔŋi lɛ anɔ!” Mɛnɛɛmɛi hu kɛ ekaa fɔ̃ɔ nine amɛtsɛɔ mɛi krokomɛi koni amɛba Yehowa ŋɔɔ kɛha gbɛtsɔɔmɔ kɛtsɔ e-Wiemɔ ni ji Biblia lɛ nɔ, koni amɛle esuɔmɔnaa nii ni amɛfee. Nɛkɛ jeŋmaŋ kome nɛɛ nyiɛɔ anɔkwa toiŋjɔlɛ sɛɛ, ni emlibii lɛ etsɔ hiɛ amɛkɛ ‘klantei esɔ̃ kɔii ni amɛkɛ akpɔlɔi hu esɔ̃ adedai’ momo, ‘ni amɛkaseee tawuu dɔŋŋ.’ Maŋ ni yɔɔ miishɛɛ lɛlɛŋ nɛ!
Bo hu obaanyɛ ona nɛkɛ miishɛɛ nɛɛ mli gbɛfaŋnɔ. Obaanyɛ okase gbi ni bɛŋkɛɔ oyayaayai, beni Maŋtsɛ, Kristo Yesu baajie adesai kɛ nɔyelii ni fiteɔ nii lɛ kɛjɛ jɛmɛ, ni ekɛ Paradeiso aba shikpɔŋ nɔ ekoŋŋ lɛ he nii. (Daniel 2:44; Mateo 6:9, 10) Ni amrɔ nɛɛ po, Yehowa Odasefoi naa miishɛɛ kpele yɛ amɛnitsumɔ ni ji saamɔ ni amɛsaa amɛhe kɛhaa nakai anɔkwa toiŋjɔlɛ be ni yɔɔ nyam lɛ baa lɛ mli akɛ maŋ ni efee ekome lɛlɛŋ, taakɛ baafai ni nyiɛ sɛɛ lɛ baatsɔɔ lɛ.