Ani Okaiɔ?

Ani ohiɛ esɔ nyɛsɛɛ Buu-Mɔɔ ni akala ni okane lɛ? Ojogbaŋŋ, kwɛmɔ akɛ ani ooonyɛ oha sanebimɔi ni nyiɛ sɛɛ nɛɛ ahetoo lo:

▫ Mɛni baanyɛ afee sɔɔmɔ hegbɛi ni akɛfata he aha Nethinim lɛ kɛ Salomo tsuji abii lɛ beni amɛku amɛsɛɛ kɛjɛ Babilon nomŋɔɔ mli amɛba lɛ he mfoniri?

Ŋmɛnɛ, yɛ be mli ni mumɔŋ lsrael shwɛɛnii ni yɔɔ shikpɔŋ nɔ lɛ ayifalɛ baa shi lɛ, tooi krokomɛi lɛ ayi miifa. Akɛ gbɛnaa nii ni tsii ewo mɛi ni tamɔ gwantɛŋi nɛɛ ateŋ mɛi komɛi, ni tamɔ Nethinim lɛ kɛ Salomo tsuji abii lɛ adɛŋ, yɛ shwɛɛnii lɛ anɔkwɛmɔ shishi. (Yesaia 61:⁠5)​—4/15, baafai 16-17.

▫ Mɛni gbalɔ Zefania tsɔɔ beni ekɛɛ akɛ: “Ekolɛ aaaŋɔ nyɛ atee yɛ Yehowa mlifu gbi lɛ nɔ” lɛ? (Zefania 2:​2, 3)

Mɔ ko ni aaabaa eyi kɛtsɔ “amanehulu kpeteŋkpele” ni baa lɛ mli lɛ etsɔɔɔ akɛ kɛ ahere oyiwala lɛ belɛ ahere oyiwala yɛ be fɛɛ mli. (Mateo 24:​13, 21) Yibaamɔ yɛ nakai gbi lɛ nɔ lɛ baadamɔ ya ni mɔ lɛ aaaya nɔ afee nibii etɛ: Esa akɛ etao Yehowa sɛɛ gbɛ, etao jalɛ sɛɛ gbɛ, etao heshibaa sɛɛ gbɛ.​—5/1, baafai 15-16.

▫ Mikael “aaate shi adamɔ shi” yɛ “naagbee be lɛ” mli yɛ mɛɛ shishinumɔ naa? (Daniel 12:​1, 4)

Kɛjɛ be mli ni awo lɛ Maŋtsɛ yɛ 1914 nɛɛ, Mikael ‘edamɔ shi’ eha Yehowa webii. Shi etsɛŋ ni Mikael ‘aaate shi adamɔ shi” yɛ shishinumɔ krɛdɛɛ ko naa​—akɛ Yehowa Najiaŋdamɔlɔ ni ekɛ lɛ aaatsu nii ni ekɛjie efɔŋfeemɔ fɛɛ kɛjɛ shikpɔŋ nɔ, kɛ agbɛnɛ akɛ Nyɔŋmɔ webii a-Kpɔlɔ.​—5/1, baafa 17.

▫ Anɔkwa miishɛɛnamɔ damɔ mɛni nɔ?

Anɔkwa miishɛɛnamɔ damɔ wekukpaa kpakpa ni aaaka wɔkɛ Yehowa teŋ, enɔkpɛlɛmɔ ni wɔɔna, kɛ ejɔɔmɔ nɔ. (Abɛi 10:22) No hewɔ lɛ anyɛŋ ana anɔkwa miishɛɛ kɛ toiboo ni aaafee aha Yehowa kɛ heshibaa ni aaafee aha esuɔmɔnaa nii yɛ miishɛɛ mli fataaa he. (Luka 11:28)​—5/15, baafai 16, 19.

▫ Beni Yesu tsɔ naakpɛɛ gbɛ nɔ etsa helai lɛ, no mli lɛ ani hemɔkɛyeli he miihia yɛ mɛi ni etsa amɛ lɛ gbɛfaŋ?

Hemɔkɛyeli ko kɛ̃ he miihia yɛ mɛi pii ni ba Yesu ŋɔɔ koni etsa amɛ lɛ gbɛfaŋ. (Mateo 8:13) Shi Yesu biii hemɔkɛyeli jajemɔ ko dani efee enaakpɛɛ nii lɛ, tamɔ be mli ni etsa obubuafo ko ni leee mɔ ni Yesu ji po lɛ nɛkɛ. (Yohane 5:​5-13) Yesu tsa osɔfonukpa lɛ tsulɔ ni fata Yesu henyɛlɔi akuu lɛ he ni afo etoi lɛ eha lɛ. (Luka 22:​50, 51) Nyɔŋmɔ mumɔ krɔŋkrɔŋ lɛ hewalɛ akɛtsu nɛkɛ naakpɛɛ nibii nɛɛ, shi jeee yɛ mɔ ni he yeɔ lɛ hemɔkɛyeli hewɔ.​—6/1, baafa 3.

▫ “Yaa” ni Yesu wie he yɛ ebɛbua ni yɔɔ Mateo 13:​47-50 lɛ damɔ shi kɛha mɛni?

“Yaa” lɛ damɔ shi kɛha shikpɔŋ nɔ dɛŋdade loo gbɛjianɔtoo ko ni kɛɔ akɛ eji Nyɔŋmɔ asafo ni buaa “looi” anaa. Mɛi ni fata enɛ he ji Kristendom kɛ Kristofoi ni afɔ amɛ mu lɛ asafo lɛ, ni sɛɛkpee bii nɛɛ etee nɔ amɛbua ‘looi kpakpai’ anaa yɛ ŋwɛibɔfoi agbɛtsɔɔmɔ shishi, yɛ Mateo 13:49 kɛ gbeekpamɔ naa.​—6/15, baafa 20.

▫ Mɛni ji shishitoo mlai ni esa akɛ Israel kojolɔi kɛtsu nii yɛ be mli ni amɛtsuɔ amɛnitsumɔi ahe nii lɛ ekomɛi?

Jalɛ kojomɔ kɛha niiatsɛ kɛ ohiafo, hiɛaŋkwɛmɔ ko kwraa bɛ, ni aheee nyɔɔŋnii. (3 Mose 19:​15; 5 Mose 16:19)​—7/1, baafa 13.

▫ Mɛni esa akɛ onukpai abɔ mɔdɛŋ ni amɛnine ashɛ nɔ kɛtsɔ kojomɔ saji ni amɛyeɔ lɛ nɔ?

Oti kome ji ni amɛle anɔkwalei ni kɔɔ sane muu lɛ fɛɛ he, ni amɛkɛ suɔmɔ afee enɛ. Kɛ amɛna amɛle enɛɛmɛi pɛ lɛ, esa akɛ onukpai lɛ afee nɔ fɛɛ nɔ ni amɛaanyɛ ni amɛkɛbu asafo lɛ he, ni amɛha Yehowa taomɔ nii ni nɔ kwɔlɔ lɛ ahi mli, koni Nyɔŋmɔ mumɔ lɛ ahi osafo lɛ mli ni nɔ ko etsiii naa. Agbɛnɛ ayeɔ sane lɛ hu koni kɛ aaahi lɛ, ni akɛhere eshafeelɔ ni yɔɔ oshara mli lɛ yiwala. (Okɛto Luka 15:​8-10 he.)​—7/1, baafa 18-19.

▫ Mɛni hewɔ yaka yiŋsusumɔi ni kɔɔ bɔlɛnamɔ ni mla eŋmɛɛɛ gbɛ he lɛ yeɔ awui waa lɛ?

Yɛ Yesu wiemɔi ni yɔɔ Mateo 5:​27, 28 lɛ hewɔ lɛ, mɛi fɛɛ ni yaa nɔ amɛkɛ amɛhe woɔ yaka yiŋsusumɔi ni kɔɔ bɔlɛnamɔ he lɛ amli lɛ eye gbalafitemɔ he fɔ yɛ amɛtsui mli. Ni oshara diɛŋtsɛ yɛ akɛ nɛkɛ yaka yiŋsusumɔi nɛɛ baanyɛ ni ekɛ jeŋba shara diɛŋtsɛ aba.​—7/15, baafa 15.

▫ Mɛɛ gbɛi anɔ Yehowa baanyɛ aye abua wɔ ni wɔkɛ jwɛŋmɔ kpakpa akwɛ kaai ni baa wɔnɔ lɛ koni wɔŋmɛ wɔtsui shi yɛ mli?

Nanemɛi heyelilɔi baanyɛ agbala wɔjwɛŋmɔ kɛya ŋmalɛi anɔ loo yɛ Biblia kasemɔ bei amli. Nibii loo saji ni atsɔ Nyɔŋmɔ gbɛtsɔɔmɔ nɔ akɛba lɛ baanyɛ aye abua wɔ ni wɔna nɔ ni esa akɛ wɔfee. Ŋwɛibɔfoi baanyɛ ni amɛkɛ amɛhe awo wɔkudɔmɔ mli, loo ekolɛ wɔnine baanyɛ ashɛ gbɛtsɔɔmɔ nɔ kɛtsɔ mumɔ krɔŋkrɔŋ nɔ. (Hebribii 1:14)​—7/15, baafa 21.

▫ Ani Nikaea Gwabɔɔ ni atsɛ yɛ 325 Ŋ.B. Iɛ to Triniti tsɔɔmɔ lɛ shishi loo ema nɔ mi?

Dabi, Nikaea Gwabɔɔ lɛ kɛ Bi lɛ to Tsɛ lɛ he akɛ amɛyeɔ egbɔ yɛ “heloo kome” ni ekɛɛ amɛji lɛ pɛ mli. Jeee nakai gwabɔɔ lɛ aloo Sɔlemɔ Tsɛmɛi lɛ kɛ susumɔ ni ana akɛ Tsɛ lɛ, Bi lɛ, kɛ mumɔ krɔŋkrɔŋ lɛ ateŋ mɔ fɛɛ mɔ ji anɔkwa Nyɔŋmɔ​—mɛi etɛ-yɛ-ekome mli Nyɔŋmɔ​—lɛ ba.​—8/1, baafa 20.

▫ Ani Hiob pɛ ji gbɔmɔ ni ye Yehowa anɔkwa yɛ be mli ni eyɔɔ shihilɛ mli lɛ? (Hiob 1:⁠8)

Dabi, Hiob wolo lɛ diɛŋtsɛ tsɔɔ akɛ Nyɔŋmɔ kpɛlɛ Elihu nɔ. Agbɛnɛ beni Hiob yɔɔ wala mli lɛ, no mli lɛ Israelbii pii yɛ Mizraim, ni nɔ ko bɛ ni aaadamɔ nɔ asusu akɛ mɛnɛɛmɛi fɛɛ yeee anɔkwa ni Nyɔŋmɔ ekpɛlɛɛɛ amɛ nɔ,​—8/1, baafa 31.