Nifeemɔ Ni Kɛ Sɛɛkuu Baa

’EKƐ amɛ wie yɛ abɛbuai amli.’ Nɛkɛ ji bɔ ni Biblia lɛ kpaa Yesu abɛbuai etɛ ni ehe gbɛi ni kɔɔ mɔbɔnalɛ he lɛ hiɛ ehaa​—too kome ni laaje lɛ, jwiɛtɛi kuku kome ni laaje lɛ, kɛ bi nyenyeŋtswi lɛ.​—Luka 15:​3-32.

Nikasemɔi enyɔ yɛ April 15, 1991 Buu-Mɔɔ lɛ mli ni tsɔɔ nakai abɛbuai lɛ amli, ni eye ebua nikanelɔi babaoo koni amɛna bɔ ni amɛaafee ni amɛkpa mɔbɔnalɛ mli amɛha mɛi krokomɛi ŋmɛnɛ. Nɔ ni ama nɔ mi titri ji mumɔŋ tookwɛlɔi ni baaŋɔ hegbɛ lɛ ni amɛtao gbɔmɛi ni ashwie amɛ kɛjɛ asafo lɛ mli shi amɛbaakpɛlɛ mlihilɛ mli ni aaajɛ asara amɛ lɛ nɔ lɛ. Mɛni ejɛ nɛkɛ nikasemɔi nɛɛ kɛ gbɛ hee ni amɛtsɔ nɔ lɛ mli eba?

Beni akala wolo tɛtrɛɛ lɛ agbe naa lɛ sɛɛ etsɛɛɛ ni nuu ko ni yɔɔ Washington maŋ lɛ mli, yɛ U.S. Amerika ŋma akɛ: “Yehowa duromɔ babaoo lɛ he odaseyeli babote mi-post ɔfis adeka lɛ mli ŋmɛnɛ. Mita biɛ, ni mihiŋmɛiiaŋ eyimɔ obɔ kɛ yaafonui kɛ tsuiŋ miishɛɛ yɛ gbɛjianɔtoo kɛ jajemɔi ni Ŋwɛiflooflo Nyo lɛ kɛha lɛ hewɔ. Nyɔŋmɔ ni ja lɛlɛŋ lɛ pɛ baanyɛ ni ekɛ yelikɛbuamɔ aha mɛi ni tamɔ gwantɛŋi ni amɛlaaje lɛ. . . . Hɛɛ, ashwie mi kɛjɛ asafo lɛ mli, shi minyiɛ gbɛ ni haa aheɔ mɔ ekoŋŋ lɛ nɔ.” Ahe lɛ kɛba asafo lɛ mli ekoŋŋ yɛ October mli.

Shi saramɔi ni asafoŋ onukpai enyɔ lɛ fee lɛ hu? Kristofonyo ŋa ko ŋma akɛ: “‘Wiemɔi nyɛŋ atsɔɔ bɔ ni minuɔ he mihaa lɛ mli. Aaafee afii 13 nɛ ni ashwie miwu kɛjɛ asafo lɛ mli. Onukpai lɛ basara lɛ, taakɛ awo he ŋaa yɛ nikasemɔ lɛ mli lɛ. Nyɛsɛɛ gbɛkɛ lɛ ji klɛŋklɛŋ be, yɛ afii babaoo mli, ni etee kpeei lɛ ekome shishi. Amrɔ nɛɛ eebɔ mɔdɛŋ ni etsake eshihilɛ ni eku esɛɛ eba ekoŋŋ.”

Yɛ be mli ni nɔkwɛlɔi gbɛfalɔi yasaraa asafoi sɔrɔtoi lɛ, amɛnaa nɔ ni jɛɔ mlibaa lɛ. Kpokpaa nɔkwɛlɔ ko ŋma nyɛsɛɛ nɛɛ akɛ:

“Beni akala April 15, 1991 Buu-Mɔɔ lɛ aha lɛ, mɛi pii susu bɔ ni abaahere onukpai ni baaya ayasara nɛkɛ gbɔmɛi nɛɛ anɔ aha lɛ he. Hetoo lɛ efee faŋŋ.

“Naagbee asafoi ejwɛ ni yɔɔ wɔkpokpaa lɛ mli ni miyasara amɛ lɛ eye gbɔmɛi nɛɛhu ni amɛku amɛsɛɛ amɛba Maŋtsɛyeli Asai lɛ anɔ lɛ he odase. Eyɛ mli akɛ amɛteŋ mɔ kome pɛ ahe lɛ ekoŋŋ moŋ, shi mɛi krokomɛi kpaanyɔ lɛ miiya amɛhiɛ fɛfɛo. Onukpai lɛ kɛ asafoi lɛ ena miishɛɛ yɛ yibii ni amɛdeŋmegbomɔi lɛ kɛ nilee ni yɔɔ teokrase gbɛtsɔɔmɔi kɛ nitsumɔ mli lɛ ewo lɛ hewɔ.

“Wɔmli efili wɔ yɛ nɛkɛ mɔbɔnalɛ gbɛjianɔtoo kpakpa nɛɛ hewɔ. Taakɛ nyɛmiyoo ko ni ahe lɛ kɛba asafo lɛ mli ekoŋŋ wie lɛ, ‘Mibɛ ekãa ni baaha maku misɛɛ mikome, ejaakɛ minuɔ he akɛ Yehowa ebu mi fɔ. Shi beni onukpai lɛ ba miŋɔɔ lɛ, no bafee hewalɛwoo ni he hiaa mi koni mikɛku misɛɛ lɛ.’ Miishɛɛ ni ena lɛ ewo asafo lɛ hewalɛ babaoo.”

Kɛji akɛ mɛi ni aaasara amɛ lɛ ateŋ mɛi pii hereee saramɔ lɛ nɔ po lɛ, nɛkɛ mɔbɔnalɛ nifeemɔ nɛɛ miitsu nɔ kpakpa ko diɛŋtsɛ. No hewɔ lɛ, kɛjɛ September shishijee kɛyaa lɛ, onukpai ni yɔɔ asafo fɛɛ asafo mli lɛ baakwɛ mɛi ni ashwie amɛ kɛjɛ asafo lɛ mli ni yɔɔ amɛ shikpɔŋkuku lɛ mli lɛ agbɛii amli ekoŋŋ, ni amɛbaato gbɛjianɔ ni amɛyasara mɛi ni amɛnuɔ he akɛ amɛbaahere mɔbɔnalɛ nine ni akpaa mli ahaa amɛ nɛɛ nɔ lɛ.