Sanebimɔi Ni Jɛ Kanelɔi Adɛŋ
Ani abaatee mɛi ni ekpɛlɛɛɛ Kristojamɔ nɔ bianɛ ni gboiɔ dani amanehulu kpeteŋkpele lɛ jeɔ shishi lɛ ashi kɛjɛ gbohii ateŋ?
Ehi kɛha wɔ fɛɛ akɛ wɔɔte shi wɔshi sui ni aaaha wɔfee wɔnii tamɔ kojolɔi, ni wɔyoo akɛ yɛ naagbee lɛ, Yehowa kojomɔ kɛtsɔ Yesu Kristo nɔ lɛ ji nɔ ni tsɔɔ nɔ ko. Yohane 5:22; Bɔfoi lɛ Asaji 10:42; 2 Timoteo 4:1) Shi Ŋmalɛi lɛ kɛ saji ni yeɔ buaa haa wɔ yɛ sanebimɔ ni etsɔ hiɛ lɛ mli.
Nyɔŋmɔ Maŋtsɛyeli lɛ he sanekpakpa lɛ shiɛmɔ yɛ jeŋ muu fɛɛ lɛ ji ‘ba ni Yesu eba’ lɛ he okadi ko ni he hiaa waa. Ana nɛkɛ okadi nɛɛ kɛjɛ afii oha nɛɛ shishijee mli tɔŋŋ. Nɔ ni jɛɔ shiɛmɔ nitsumɔ lɛ mli baa ji gbɔmɛi ni jɛ jeŋmaji fɛɛ mli lɛ amligbalamɔ kɛha Yesu abɛbua ni kɔɔ ‘gwantɛŋi’ lɛ kɛ ‘abotiai’ ahe lɛ mlibaa. Kɛ shiɛmɔ nitsumɔ nɛɛ kɛ gbɔmɛi amligbalamɔ nitsumɔ lɛ ba naagbee lɛ, ‘amanehulu kpeteŋkpele’ lɛ kɛ nibii agbɛjianɔtoo fɔŋ nɛɛ baaba enaagbee.—Mateo 24:3,21, 22; 25:31-46, New World Translation.
Yehowa kɛ e-Bi lɛ ji mɛi ni baatsɔɔ akɛ abuɔ mɛi ni kpooɔ Maŋtsɛyeli lɛ he sane lɛ ni amɛgboiɔ dani amanehulu kpeteŋkpele lɛ fɛɔ lɛ akɛ abotiai. Yesu kɛɛ akɛ obotiai lɛ ‘aaaya naanɔ hiɛkpatamɔ mli. No hewɔ lɛ wɔbaanyɛ wɔmu sane naa akɛ mɛi ni Nyɔŋmɔ buɔ amɛ akɛ abotiai lɛ naŋ gbohiiashitee. Amɛkojomɔ lɛ tamɔ ‘mɛi ni aaana nyɔmɔwoo ni ji naanɔ hiɛkpatamɔ’ yɛ amanehulu kpeteŋkpele be lɛ mli lɛ anɔ lɛ.—2 Tesalonikabii 1:9.
Shi mɛi ni nyɛɛɛ ale Maŋtsɛyeli lɛ he sane lɛ jogbaŋŋ ni amɛnyɛɛɛ amɛkpɛ amɛyiŋ yɛ nilee mli akɛ amɛaadamɔ shi amɛha anɔkwale loo dabi dani amɛgboi yɛ nɛkɛ “naagbee gbii” nɛɛ amli lɛ hu?—2 Timoteo 3:1.
Eka shi faŋŋ akɛ mɛi ni gboi yɛ be mli ni shiɛmɔ nitsumɔ lɛ yaa nɔ, beni amanehulu kpeteŋkpele lɛ bako lɛ ateŋ mɛi pii anine baashɛ gbohiiashitee nɔ. Nɔ ni yeɔ enɛ he odase ji nɔ ni wɔkaneɔ yɛ Kpojiemɔ 6:7, 8 ni kɔɔ okadi okpɔŋɔ-nɔtaralɔi lɛ ahe lɛ. Mɛi pii ni egboi yɛ tawuu, hɔmɔ, kɛ tsɛŋemɔ helai ahewɔ. Akɛni “Hades” loo gbohiiaje miɔ mɛi ni “Gbele” gbeɔ amɛ nɛɛ hewɔ Iɛ, abaatee amɛ shi yɛ Kristo Afii Akpe Nɔyeli lɛ mli, beni Hades loo gbohiiaje jieɔ gbohii fɛɛ ni yɔɔ emli lɛ eshwieɔ shi lɛ. (Kpojiemɔ 20:13) Mɛi ni aaatee amɛ shi lɛ ateŋ mɛi pii baanyɛ afee mɛi ni bale anɔkwale lɛ he nɔ ko dani amɛgboi.
Kwɛ shi ni wɔdaa akɛ Yesu eŋmɛɛɛ sane nɛɛ he ehaaa gbɔmɛi koni amɛtsɔɔ mɛi ni tamɔ gwantɛŋi kɛ mɛi ni tamɔ abotiai! Adesai ni yeee emuu lɛ nyɛŋ atsɔɔ hegbɛ ni fa ni mɔ ko ena ni no aaaha enu ni ekpɛlɛ anɔkwale lɛ nɔ lɛ jogbaŋŋ. Ani wɔɔnyɛ wɔle bɔ ni mɔ lɛ tsui yɔɔ, aloo kɛji akɛ esumɔɔ jalɛnifeemɔ lɛlɛŋ? Ani wɔɔnyɛ wɔle bɔ ni eweku lɛ, ejamɔ, loo nibii krokomɛi na hewalɛ yɛ sane lɛ nɔkpɛlɛmɔ nɔ lɛ? Eka shi faŋŋ akɛ dabi. Ni kɛlɛ, wɔbaanyɛ wɔna nɔmimaa akɛ Yehowa Nyɔŋmɔ kɛ Yesu Kristo baanyɛ aŋmɛ saji ni tamɔ nɛkɛ ni amɛkojo yɛ gbɛ ni yeɔ emuu, ni hi, ni ja nɔ.—5 Mose 32:41; Yesaia 11:1-5
No hewɔ lɛ ehe ehiaaa ni wɔsusu mɛi ni gboi nyɛsɛɛ nɛɛ nɔŋŋ lɛ ateŋ mɛi ni aaatee amɛ shi loo amɛnaŋ shitee lɛ he. Akɛ hegbɛ hako wɔ akɛ wɔfee nakai. (Okɛto Luka 12:13, 14 he.) Nilee yɛ mli kwraa akɛ wɔɔmɛ jalɛ Kojolɔi ni ji Yehowa Nyɔŋmɔ kɛ Yesu Kristo yiŋkpɛi lɛ. Akɛ Yehowa tsuji lɛ, enɛ baaha wɔna jwɛŋmɔŋ toiŋjɔlɛ babaoo. Ebaaye ebua wɔ hu ni wɔtsu nɔ ni akɛwo wɔdɛŋ lɛ he nii jogbaŋŋ—’nyɛyaa ni nyɛyafea jeŋmaji fɛɛ kaselɔi, ni nyɛtsɔɔ amɛ ni amɛye nii fiaa ni Yesu kɛɛ lɛ anɔ.’—Mateo 28:19, 20.
[He ni Mfoniri ni yɔɔ baafa 31 lɛ Jɛ]
Leicester tooi, Meyers