Gbɛkɛ ko ni Abaakai

BI ko ni sa kaimɔ waa, nɔ ni fe afii 3,500 ni eho nɛ lɛ, Yehowa Nyɔŋmɔ ha Israelbii ni ayeɔ amɛnɔ nyɔŋ yɛ Mizraim gbe toobi ni amɛkɛ ela shwã amɛshiai lɛ ashinaa tsei lɛ ahe kɛ amɛnɔ hu. Nakai gbi lɛ gbɛkɛ lɛ, Nyɔŋmɔ bɔfo baho shiai ni akadi yɛ nɛkɛ gbɛ nɔ lɛ ahe shi egbe kromɔ-bihii ni yɔɔ Mizraimbii lɛ fɛɛ ashiai amli lɛ. Kɛkɛ ni aha Israelbii lɛ ye amɛhe. Kɛjɛ nakai be lɛ mli kɛbaa nɛɛ, kɛ be ni akɛfee enɛ lɛ shɛ lɛ, Yudafoi lɛ yeɔ Hehoo lɛ akɛ gbijurɔ.

Beni Yesu Kristo kɛ ebɔfoi lɛ gbe naagbee Hehoo lɛ yeli naa lɛ, eto niyenii ko shishi ema shi ni baakai efɔleshaa gbele lɛ. Ekɛ aboloo ha ebɔfoi anɔkwafoi lɛ ni ekɛɛ akɛ: “Nyɛhea, nyɛyea! Enɛ ji migbɔmɔtso lɛ.” No sɛɛ lɛ eha amɛ kpulu kɛ wein ni ekɛɛ: “Nyɛ fɛɛ nyɛnua eko, ejaakɛ enɛ ji mila ni ji kpaŋmɔ hee lɛ nɔ lɛ, ni afɔse ashwie shi yɛ mɛi pii ahewɔ ha eshaifaa lɛ.” Yesu kɛɛ hu akɛ: “Nyɛfea enɛ ni nyɛŋɔkai mi.” (Mateo 26:26-28; Luka 22:19, 20) No hewɔ lɛ Yesu fa esɛɛnyiɛlɔi lɛ akɛ amɛye egbele lɛ he kaimɔ nɛɛ.

Yehowa Odasefoi kɛ miishɛɛ miifɔ bo nine koni obafata amɛhe ni aye Yesu gbele lɛ Kaimɔ nɛɛ. Obaanyɛ oya yɛ Maŋtsɛyeli Asa ni bɛŋkɛ oshia fe fɛɛ lɛ nɔ. Taomɔ Odasefoi ni yɔɔ nyɛkutso lɛ mli ni ole be kɛ he pɔtɛɛ ni abaafee yɛ. Gbi ni abaafee yɛ afi 1994 ji Hɔɔ, March 26, ni akɛ aboloo kɛ wein lɛ baaha beni hulu enyɔ shi sɛɛ.