‘Nyɛkagbalaa Kɔŋtso Kome ni Yeee Egbɔ’
TSINA hii enyɔ ni afee amɛhe mfoniri yɛ biɛ lɛ yɛ hewalɛ babaoo, ni ehaa amɛnyɛɔ amɛgbalaa jatsui ni tsii yɛ gbɛ ni waaa nɔ. Shi ŋɔɔ lɛ akɛ, akɛ teji baye tsina hii nɛɛ ekome najiaŋ. Akɛni teji edaaa ni ehe waaa tamɔ tsina nuu hewɔ lɛ, ebaanyɛ etse atua, ni ebaashi gbɛ ni enyiɛ nɔ yɛ kɔŋtso ni yeee egbɔ nɛɛ shishi lɛ ŋtia. Belɛ yiŋtoo kpakpa hewɔ ni Nyɔŋmɔ mla ni ekɛha Israel lɛ jaje akɛ: “Okɛ tsina kɛ teji akahu shikome.”—5 Mose 22:10.
Bɔfo Paulo ŋma nɔ ko ni tamɔ nakai yɛ adesai ahe. Ekɛɛ: “Nyɛkɛ mɛi ni heee yeee lɛ akagbalaa kɔŋtso kome ni yeee egbɔ.” (2 Korintobii 6:14) Esa akɛ aha enɛ ahi jwɛŋmɔ mli titri beni ahalaa gbalashihilɛ mli hefatalɔ lɛ. Gbalashihilɛ ji mla naa wekukpaa ni hiɔ shi daa, ejaakɛ Yesu Kristo kɛɛ: “Nɔ ni Nyɔŋmɔ eŋɔtsa lɛ, akaha gbɔmɔ miigbala mli.” (Mateo 19:6) Tsuiŋdɔlɛ babaoo baa kɛ gbalashihilɛ mli hefatalɔi lɛ ahemɔkɛyeli, shishitoo mlai, kɛ otii jeee ekome. No hewɔ lɛ, shishinumɔ yɛ mli akɛ aaanyiɛ Biblia ŋaawoo akɛ abote gbalashihilɛ mli “yɛ Nuntsɔ lɛ mli” lɛ sɛɛ. (1 Korintobii 7:39) Mɔ ko ni nyaaa ojamɔ mli hemɔkɛyelii ahe ni okɛ lɛ aaabote gbalashihilɛ mli lɛ kɛ naagbai wuji diɛŋtsɛ po baaba fe kɔŋtso ni tsina nuu kɛ teji aaagbala.
Sɔrɔto-feemɔ ni yɔɔ jamɔ mli hemɔkɛyeli mli lɛ ji nibii ni baaha hefatalɔi lɛ afee mɛi ni kɔŋtso yeee egbɔ lɛ ateŋ ekome pɛ. Mɛi ni kpaa gbɛ akɛ amɛbaabote gbalashihilɛ mli—ni yɔɔ hemɔkɛyeli kome po mli lɛ—baafee jogbaŋŋ akɛ amɛaabi akɛ, ‘Ani wɔ fɛɛ wɔdiɔ otii lɛ nɔŋŋ sɛɛ? Nɛgbɛ wɔbaahi? Namɔ baakwɛ shika nɔ? Ani wɔ fɛɛ wɔbaatsu nii? Ni bii afɔmɔ hu? Ani mlihilɛ kɛ mɔ he susumɔ baafee otu yɛ wekukpaa lɛ mli?’
Gbɛ ni atsɔɔ nɔ asusuɔ saji nɛɛ ahe lɛ baanyɛ atsɔɔ kɛji kɔŋtso ko baanyɛ afee nɔ ni yeɔ egbɔ loo eyeee egbɔ yɛ gbɛ ko nɔ. Eji anɔkwale akɛ, gbɔmɛi enyɔ ko bɛ ni baanyɛ akpa gbee kɛmɔ shi. Shi yɛ fɛɛ mli lɛ, kɛji akɛ mɛi ni nyiɛɔ kɛtsɔɔ gbalashihilɛ hiɛ lɛ baanyɛ adamɔ amɛ naagbai anaa ni amɛtsu he nii yɛ ekomefeemɔ mli, ni amɛkɛ amɛhe aaagba sane yɛ faŋŋ lɛ, enyɛŋ eba akɛ amɛbaafee mɛi ni yɔɔ kɔŋtso ni yeee egbɔ shishi.