Sanebimɔi ni Jɛ Kanelɔi Adɛŋ

Paulo wie Yesu he yɛ Filipibii 2:9 akɛ: “Nyɔŋmɔ wo enɔ gojoo, ni eduro lɛ gbɛi ni ta gbɛi-fɛɛ-gbɛi nɔ.” Mɛni ji nɛkɛ gbɛi hee nɛɛ? Ni kɛji akɛ Yesu baa shi fe Yehowa lɛ, te efeɔ tɛŋŋ ni Yesu gbɛi lɛ ta gbɛi-fɛɛ-gbɛi nɔ lɛ?

Filipibii 2:8, 9 kaneɔ akɛ: “[Yesu] ba ehe shi, ni ebo toi kɛtee gbele mli, kɛtee sɛŋmɔtso nɔ gbele mli tete. Enɛ hewɔ hu ni Nyɔŋmɔ wo enɔ gojoo, ni eduro lɛ gbɛi ni ta gbɛi-fɛɛ-gbɛi nɔ.”

Nɛkɛ wiemɔ kuku nɛɛ etsɔɔɔ akɛ, akɛni Yehowa pɛ yɔɔ gbɛi ni ta gbɛi-fɛɛ-gbɛi nɔ hewɔ lɛ, Yesu baanyɛ afee Yehowa nɔŋŋ. Taakɛ Filipibii, yitso 2 lɛ mli sane lɛ tsɔɔ lɛ, Yesu nine shɛ egbɛi ni kwɔ gojoo lɛ nɔ yɛ eshitee lɛ sɛɛ. Dani enɛ aaaba lɛ, ebɛ gbɛi nɛɛ. Shi yɛ gbɛ kroko nɔ lɛ, Yehowa efee ofe be fɛɛ be, ni egbɛhe lɛ tsakeko da. Yɛ anɔkwale ni eji akɛ Yesu nine shɛ gbɛi ni kwɔ fe gbɛi ni eyɔɔ tsutsu dani ebaje eshikpɔŋ nɔ sɔɔmɔ shishi lɛ nɔ lɛ yeɔ odase akɛ jeee lɛ nɔŋŋ ji Yehowa. Beni Paulo kɛɛ aha Yesu gbɛi ni ta gbɛi-fɛɛ-gbɛi nɔ lɛ, eetsɔɔ akɛ agbɛnɛ Yesu ena gbɛi ni kwɔ fe Nyɔŋmɔ bɔɔ nii fɛɛ anɔ̃.

Mɛni ji Yesu gbɛi ni kwɔ lɛ? Yesaia 9:6 yeɔ ebuaa wɔ ni wɔhaa hetoo. Yɛ be mli ni egbaa Mesia, Yesu, baa lɛ, nakai kuku lɛ kɛɔ akɛ: ‘Ni elumɔyeli lɛ aaaka ekɔŋ nɔ, ni aaatsɛ egbɛi akɛ, Naakpɛɛ Ŋaawolɔ, Nyɔŋmɔ Hewalɔ, Naanɔ Tsɛ, kɛ Hejɔlɛ Lumɔ.’ Yesu “gbɛi” kɔɔ egbɛhe kɛ hegbɛ ni nɔ kwɔ lɛ he yɛ biɛ, nakai hu ji bɔ ni wɔnuɔ “gbɛi ni ta gbɛi-fɛɛ-gbɛi nɔ” ni atsi ta yɛ Filipibii 2:9 lɛ shishi wɔhaa. Aafa ni nakutso fɛɛ nakutso akula shi aha Yesu ni akɛkpɛlɛ enɔyeli hegbɛ ni nɔ kwɔ ni Yehowa kɛha lɛ lɛ nɔ—nɔyeli hegbɛ ni kwɔ fe fɛɛ eko ni akɛha bɔɔ nɔ̃ kroko. Wiemɔ ‘fɛɛ’ ni yɔɔ shishitsɔɔmɔ nɛɛ mli lɛ ejeee kpo yɛ shishijee Hela ŋmalɛ lɛ mli tɛ̃ɛ, shi kuku lɛ shishinumɔ tsɔɔ nakai. Yesu “gbɛi” lɛ ekwɔɔɔ fe lɛ diɛŋtsɛ egbɛi lɛ, shi ekwɔ fe bɔɔ nɔ̃ fɛɛ bɔɔ nɔ̃ kroko nɔ̃.

Kwɛ miishɛɛ ni wɔna akɛ wɔɔfata ŋwɛibɔfoi anɔkwafoi krokomɛi kɛ adesai fɛɛ he ni wɔkula shi yɛ Yesu gbɛi lɛ nɔkpɛlɛmɔ mli! Wɔfeɔ enɛ kɛtsɔɔ wɔhe shi ni wɔbaa wɔhaa Yesu yɛ egbɛhe kpele ni awo nɔ kɛ hewalɛ ni Yehowa kɛha lɛ lɛ mli—“kɛwo Tsɛ Nyɔŋmɔ lɛ hiɛ nyam.”—Filipibii 2:11; Mateo 28:18.