Okɛ Mlifu Akato Oml

EKOLƐ ebaafee kaa ni mli wa fe fɛɛ akɛ ooohi shi ni omli fuuu kɛji mɔ ko fee bo nidɔɔnii. Biblia lɛ yɛ ŋaawoo ni anyɛɔ akɛtsuɔ nii yɛ shihilɛi ni tamɔ nɛkɛ mli. “Nyɛmli afũa,” taakɛ bɔfo Paulo ŋma lɛ, “shi nyɛkafea esha; hulu akanyɔ shi yɛ nyɛ mlila lɛ nɔ.”—Efesobii 4:26.

Kɛ mɔ ko tɔ̃ wɔnɔ lɛ, eji nɔ ni fɔɔ kaa akɛ wɔɔnu mlifu he kɛyashi he ko. Wiemɔ ni Paulo wie akɛ “nyɛmli afũa” lɛ tsɔɔ akɛ bei komɛi lɛ, ekolɛ mlifu lɛ ja gbɛ—ekolɛ eji wɔ henumɔi akpojiemɔ yɛ bɔ ni akɛ wɔ eye yɛ gbɛ ni ejaaa nɔ, loo yɛ jalɛ sane ni ayeee wɔ lɛ he. (Okɛto 2 Korintobii 11:29 he.) Shi kɛ ashĩ ni atsuuu he nii lɛ, nibii ni baajɛ mlifu ni ja gbɛ po mli aba lɛ baanyɛ afite nii, ni ekɛ esha kpele baaba. (1 Mose 34:1-31; 49:5-7; Lala 106:32, 33) No hewɔ lɛ, kɛ onu he akɛ aatsɔ onaa koni omli afũ lɛ, mɛni obaanyɛ ofee?

Yɛ shihilɛi pii ni kɔɔ tɔmɔi bibii ahe lɛ agbɛfaŋ lɛ, obaanyɛ otsu sane lɛ he nii yɛ otsui mli ‘ni ofee dioo,’ aloo yaa mɔ ni etɔ̃ onɔ lɛ ŋɔɔ ni okɛ lɛ ayasusu sane lɛ he. (Lala 4:5; Mateo 5:23, 24) Kɛ otsɔ gbɛi enyɔ nɛɛ ateŋ eko fɛɛ eko nɔ lɛ, ehi jogbaŋŋ akɛ nyɛaana sane lɛ naa oya nɔŋŋ bɔni afee ni mlifu akahe shi yɛ omli ni nibii ni baajɛ mli aba lɛ bafee amanehulu.—Efesobii 4:31.

Yehowa kɛ wɔhe eshai keɔ wɔ yaka, eshai ni ekolɛ yɛ nilee ni wɔbɛ hewɔ lɛ, wɔleee po akɛ wɔfee lɛ. Ani wɔ lɛ, wɔnyɛŋ wɔkɛ wɔnaanyo adesa tɔmɔ bibioo ni efee eshi wɔ lɛ ake lɛ nakai nɔŋŋ?—Kolosebii 3:13; 1 Petro 4:8.

Nɔ ni yɔɔ miishɛɛ ji akɛ, Hela wiemɔ kɛha “akɛke” lɛ shishinumɔ diɛŋtsɛ ji ni “ni aŋmɛɛ he kwraa.” Eshaifaa biii ni wɔba tɔmɔ lɛ shĩ loo wɔkpɛlɛ nɔ. Bei komɛi lɛ, ekolɛ nɔ ni ebiɔ kɛkɛ ji akɛ, oŋmɛɛ shihilɛ lɛ he, ejaakɛ oyooɔ akɛ mlifu ni okɛaato omli lɛ baaha ojatsu lɛ atsii waa moŋ, ni ebaagba ekomefeemɔ ni yɔɔ Kristofoi asafo lɛ mli lɛ naa. Kɛfata he lɛ, kɛ okɛ mlifu wo omli lɛ, ebaanyɛ eye ogbɔmɔtsoŋ hewalɛnamɔ awui!—Lala 103:⁠9.