“Nɛgbɛ Anaa Shika lɛ Kɛjɛɔ?”
MƐI ni kwɛɔ Buu Mɔɔ Asafo lɛ video ni ji “Jehovah’s Witnesses—The Organization Behind the Name” lɛ naa he miishɛɛ waa. Amɛnaa hii kɛ yei ni yɔɔ jeŋba kɛ shihilɛ kpakpa, ni jɛ hewolonɔ sui kɛ shihilɛi sɔrɔtoi amli, ni amɛmiiŋmɔ ni amɛfee ekome kɛmiitsu nii yɛ gbeekpamɔ mli. Jeee nitsulɔi akpei abɔ ni yɔɔ miishɛɛ lɛ pɛ gbalaa amɛ jwɛŋmɔ, shi moŋ nakai nɔŋŋ hu tsũi wuji babaoo ni yɔɔ Asafo lɛ Brooklyn nitsumɔ he yitso lɛ kɛ amɛŋmɔ lɛ mli yɛ Wallkill, yɛ New York lɛ hu ji. Video lɛ tsɔɔ akɛ anaa tsɔnei ahe hiɛyaa heei yɛ tsũi nɛɛ amli—woji akalamɔ kɛ wolokpo feemɔ tsɔnei ni tsuɔ nii oya waa, ni akɛfeɔ woji akpekpei abɔ daa nyɔŋ nɔ, kɛ kompiutai sɔrɔtoi sɔrɔtoi babaoo, kɛ nitsumɔ hei krokomɛi babaoo ni tsuɔ nitsumɔi sɔrɔtoi kɛfiɔ woji afeemɔ nitsumɔ lɛ sɛɛ.
Enɛ tsɔɔ nibii babaoo ni ayɔɔ ni akɛtsuɔ nii. No hewɔ lɛ, mɛi komɛi biɔ akɛ, “Nɛgbɛ anaa shika lɛ kɛjɛɔ?”
Mɛi ni yakwɛɔ Asafo lɛ jeŋ muu fɛɛ nitsumɔ he yitso lɛ hu naa miishɛɛ nakai nɔŋŋ. Amɛholeɔ amɛyitsei anɔ kɛkwɛɔ wɔɔhe tsu hee ni kwɔlɛ ji ŋsɔɔdoi 30, ni ji tsũi babaoo ni sɔɔlɔi 3,000 ni kɛ amɛhe eha ni amɛtsuɔ nii yɛ jɛmɛ lɛ wɔɔ mli lɛ ateŋ ekome lɛ. Mɛi pii hu anaa kpɛɔ amɛhe waa kɛ amɛtee amɛyakwɛ Buu Mɔɔ Asafo lɛ Nikasemɔ He ni yɔɔ aaafee kilomitai 110 yɛ Brooklyn kooyigbɛ lɛ. Aama lolo ni agbeko naa, shi nitsulɔi aaashɛ 1,200 wɔɔ jɛmɛ. Abaatsɔse maŋsɛɛ sanekpakpa shiɛlɔi aklas sɔrɔtoi enyɔ yɛ jɛmɛ daa afi ni abaaha amɛ nitsumɔ yɛ maji asɛɛ. Biɛ nɛɛ nɔŋŋ hu ji he ni ajɛɔ ni akɛ gbɛtsɔɔmɔ haa Yehowa Odasefoi asafoi fe 10,000 ni yɔɔ United States lɛ fɛɛ. Nitsumɔ he niji ni yɔɔ je lɛŋ fɛɛ lɛ amli babaoo elɛɛ amɛ nitsumɔ he tsũi lɛ amli nyɛsɛɛ nɛɛ, aloo amɛmiifee nakai bianɛ. Nɛkɛ nifeemɔi nɛɛ fɛɛ ahe nitsumɔ biɔ shika babaoo diɛŋtsɛ. No hewɔ lɛ, mɛi biɔ akɛ, “Nɛgbɛ anaa shika lɛ kɛjɛɔ?”
Hetoo lɛ ji akɛ, anaa kɛjɛɔ aŋkroaŋkroi ni tamɔ wɔteŋ mɔ fɛɛ mɔ lɛ aŋɔɔ. Amɛji gbɔmɛi ni yɔɔ jeŋ fɛɛ, ni miisumɔ ni amɛfee bɔ fɛɛ bɔ ni amɛaanyɛ ni amɛkɛha Kristofoi anitsumɔ ni he hiaa, ni ji shiɛmɔ kɛ nitsɔɔmɔ lɛ aya hiɛ. Ájie nɛkɛ suɔmɔ mumɔ ni amɛyɔɔ nɛɛ eko kpo dã.
Nɔkwɛmɔ nɔ ni Blema Israel Fee
Nɔ ni fe afii 3,500 ni eho nɛ lɛ, hiamɔ ko bate shi yɛ tooyeli he. No mli lɛ Yehowa efã Mose akɛ ema “kpee buu,” koni akɛtsu nii yɛ E-jamɔ mli. Tsu lɛ maa he gbɛjianɔtoo ni ajɛ ŋwɛi akɛha lɛ biɔ ni ana nibii babaoo ni jara wa waa. Yehowa fã akɛ: “Nyɛjiea nɔwomɔ nikeenii yɛ nyɛteŋ nyɛbahaa Yehowa; mɔ fɛɛ mɔ ni yɔɔ he tsuijurɔ lɛ, ha ni ekɛ nɔwomɔ nikeenii aba abaha Yehowa.” (2 Mose 35:4-9) Te gbɔmɛi lɛ here nɔ amɛha tɛŋŋ? Sane lɛ kɛɔ wɔ akɛ “amɛba, mɔ fɛɛ mɔ ni tsui mli ta lɛ, kɛ mɔ fɛɛ mɔ ni na he tsui lɛ, ni amɛkɛ Yehowa nɔwomɔ nikeenii lɛ ba ni akɛfee kpee buu lɛ kɛ ehe sɔɔmɔ nii lɛ fɛɛ kɛ atadei krɔŋkrɔŋi lɛ.” Nɛkɛ “tsuijurɔ naa nikeenii” nɛɛ tee nɔ fiofio aahu kɛyashi efa babaoo, aahu akɛ ‘ebafa kwraa fe bɔ ni he hiaa kɛha nitsumɔ ni Yehowa efã akɛ atsu lɛ.’ (2 Mose 35:21-29; 36:3-5) Mɛɛ nihamɔ mumɔ, ni pɛsɛmkunya bɛ mli gbɔmɛi lɛ jie lɛ kpo nɛkɛ!
Nɔ ni shɛɛɛ afii 500 sɛɛ lɛ, akɛ tsɛmɔ ha ekoŋŋ kɛha tooyeli ni jɛ suɔmɔ mli, kɛjɛ Israelbii lɛ aŋɔɔ. No mli lɛ bɔ ni Maŋtsɛ David sumɔɔ ni ema shia ko ni baahi shi daa kɛha Yehowa yɛ Yerusalem lɛ miihe aba mli kɛtsɔ ebi nuu Salomo nɔ. David diɛŋtsɛ bua nibii ni he baahia, kɛ lɛ diɛŋtsɛ etooyeli babaoo hu naa. Mɛi krokomɛi hu bafata he beni David bi ni amɛkɛ ‘nikeenii abaha Yehowa’ lɛ. Ni mɛni jɛ mli ba? “Maŋ lɛ nya yɛ ha ni amɛha yɛ tsuijurɔ naa lɛ hewɔ, ejaakɛ amɛha Yehowa kɛ amɛtsui muu lɛ fɛɛ yɛ suɔmɔ naa; ni maŋtsɛ David nya naakpa.” (1 Kronika 22:14; 29:3-9) Jwiɛtɛi kɛ shika lɛ pɛ jarawalɛ baashɛ dɔlai akpekpei akpei 50, yɛ bɔ ni ejara ji amrɔ nɛɛ naa!—2 Kronika 5:1.
Wɔkadiɔ kɛjɛɔ nɛkɛ nɔkwɛmɔ nii nɛɛ amli akɛ, anyɛɛɛ mɔ ko nɔ ni ebaha nɔ ko. Ejɛ “tsuijurɔ naa” pɛ, ni amɛkɛha “kɛ amɛtsui muu lɛ fɛɛ.” Nikeenii ni jɛ mɔ suɔmɔ mli pɛ ji nɔ ni saa Yehowa hiɛ. Nakai nɔŋŋ hu, beni hegbɛ lɛ ba akɛ akɛ shika tooyeli aha koni akɛye abua Kristofoi ni ehia amɛ lɛ, bɔfo Paulo ŋma akɛ esaaa akɛ enɛ feɔ “hiɛjoomɔ nɔ ko.” Ekɛfata he akɛ: “Mɔ fɛɛ mɔ aha bɔ ni ekpɛ mli momo yɛ etsui mli, ni ekajɛ ŋkɔmɔyeli aloo fimɔ mli, ejaakɛ tsuijurɔ naa halɔ Nyɔŋmɔ sumɔɔ.”—2 Korintobii 9:5, 7.
Hiamɔ lɛ Ŋmɛnɛ
Ani tooyeli he miihia ŋmɛnɛ? Hɛɛ, ehe miihia waa, ni hiamɔ lɛ baaya hiɛ waa be mli ni be shwieɔ mli lɛ. Mɛni hewɔ?
Aha Kristofoi famɔi krɛdɛɛi kɛha nɛkɛ naagbee be nɛɛ. Yesu fã ekaselɔi lɛ akɛ: “No hewɔ lɛ nyɛyaa ni nyɛyafea jeŋmaji fɛɛ mikaselɔi, nyɛbaptisia amɛ nyɛwoa Tsɛ lɛ kɛ Bi lɛ kɛ mumɔ krɔŋkrɔŋ lɛ gbɛi amli, ni nyɛtsɔɔ amɛ ni amɛye nii fiaa ni mikɛɛ nyɛ lɛ nɔ.”—Mateo 28:19, 20.
Dani aaatsu nɛkɛ nitsɔɔmɔ kɛ shiɛmɔ nitsumɔ kpele nɛɛ agbe naa yɛ be mli ni wɔbɛŋkɛɔ ‘nibii agbɛjianɔtoo lɛ naagbee lɛ’ he kpaakpa lɛ heɔ be kɛ nibii babaoo diɛŋtsɛ. Mɛni hewɔ? Yɛ nibii fɛɛ ni he hiaa koni anyɛ akɛ Nyɔŋmɔ Maŋtsɛyeli lɛ he shɛɛ sane lɛ aya “shikpɔŋ lɛ naagbee hei lɛ” hewɔ. (Bɔfoi lɛ Asaji 1:8) Mɛi babaoo ji mɛi ni leee Ŋmalɛi lɛ amli jogbaŋŋ tamɔ bɔ ni klɛŋklɛŋ afii oha lɛ mli Yudafoi lɛ ji lɛ. Yɛ anɔkwale mli lɛ, mɛi ni yɔɔ shikpɔŋ nɛɛ nɔ lɛ ateŋ mɛi babaoo diɛŋtsɛ leee Biblia lɛ kwraa po, ni amɛbuuu lɛ akɛ Nyɔŋmɔ Wiemɔ. Esa akɛ atsɔse shiɛlɔi ni atsu amɛ kɛya shikpɔji ni yɔɔ shɔŋŋ lɛ anɔ. (Romabii 10:13-15) Ni susumɔ wiemɔi abɔ ni abaatsu he nii yɛ mli lɛ he okwɛ! Esa akɛ mɛi ni ashiɛɔ atsɔɔ amɛ lɛ ana Bibliai lɛ kɛ Biblia kasemɔ woji ni amɛkane ni amɛkase hu yɛ amɛ diɛŋtsɛ amɛ wiemɔi amli. Kɛ abaato naa ni ashɛ mɔ fɛɛ mɔ ŋɔɔ, ni akɛ amɛ aba mumɔŋ dalɛ mli fiofio koni amɛ hu amɛnyɛ amɛye amɛbua mɛi krokomɛi lɛ, no lɛ ebiɔ gbɛjianɔtoo kpele diɛŋtsɛ.—2 Timoteo 2:2.
Yesu wie akɛ “aaashiɛ maŋtsɛyeli lɛ he sanekpakpa nɛɛ atsɔɔ je nɛŋ fɛɛ” klɛŋklɛŋ dã, “ni akɛye jeŋmaji lɛ fɛɛ odase; ni no dani naagbee lɛ aaaba.” (Mateo 24:14) No hewɔ lɛ, amrɔ nɛɛ ji be ni sa akɛ wɔkɛ nɔ fɛɛ nɔ ni wɔɔnyɛ lɛ aha ni akɛtsu nakai nitsumɔ ni he hiaa waa lɛ. Dani eeeba akɛ heloonaa nii ahe bɛ sɛɛnamɔ ko dɔŋŋ lɛ, nitsumɔ kpakpa ko bɛ ni wɔkɛ wɔ nii ni wɔyɔɔ lɛ baanyɛ atsu fe enɛ.—Ezekiel 7:19; Luka 16:9.
Nɛgbɛ Shika lɛ Yaa?
Buu Mɔɔ Asafo lɛ ŋmalaa Biblia kasemɔ woji yɛ wiemɔi fe 230 mli, kɛ agbɛnɛ hu yɛ Braille mli kɛha shwilafoi, kɛ video kɛ okadii amli hu kɛha toimulɔi. No biɔ ni ana wiemɔ shishitsɔɔlɔi kɛ emli kanelɔi akui yɛ wiemɔ fɛɛ wiemɔ mli. Nɛkɛ nitsumɔ babaoo ni atsuɔ nɛɛ he susumɔ kɛkɛ, titri lɛ yɛ Buu-Mɔɔ wolo tɛtrɛɛ ni akalaa daa nyɔŋ nɔ yɛ wiemɔi 121 mli, ni emli wiemɔi 101 jeɔ kpo yɛ be kome too mli lɛ, haa mɔ naa kpɛɔ ehe waa diɛŋtsɛ. Ni kɛlɛ, ehe miihia, bɔni afee ni gbɔmɛi ni yɔɔ shikpɔŋ lɛ nɔ he fɛɛ he lɛ anine ashɛ emli sane koome lɛ nɔŋŋ nɔ ni amɛkane. Daa afi lɛ, woji kɛ nibii krokomɛi ni akɛtsuɔ nii kɛfeɔ Maŋtsɛyeli shɛɛ sane lɛ ákɛ woji ni akala loo kasɛt ni atswaa loo video ni akɛwoɔ kpãa nɔ lɛ jara yaa hiɛ. Akɛ tooyeli ni jɛɔ nyɛmimɛi lɛ aŋɔɔ tsuɔ nii kɛwoɔ nɛkɛ nyɔji nɛɛ.
Aatsu shiɛmɔ kɛ nitsɔɔmɔ nitsumɔ lɛ yɛ shikpɔŋkukuji ni Yehowa Odasefoi asafoi ni fa fe 75,000 yɛ jeŋ fɛɛ lɛ tsuɔ nii yɛ mli lɛ amli. Nɔkwɛlɔi gbɛfalɔi ni atsɔse amɛ yasaraa asafo fɛɛ asafo aaafee shii enyɔ yɛ afi mli, koni efee amɛ ekome ni ewo amɛ hewalɛ. Kpeei hu tsuɔ gbɛfaŋnɔ ni he hiaa he nii yɛ tsɔsemɔ kɛhamɔ mli. Esa akɛ ahai tsũi ni dara kɛha kpeei wuji ni tswaa mɔ hemɔkɛyeli emaa shi waa nɛɛ. Akɛ otooyeli lɛ tsuɔ yiŋtoi nɛɛ hu ahe nii.
Yɛ be mli ni afɔɔ kpeei feemɔ shii etɛ pɛ yɛ afi mli lɛ, asafoi ni yɔɔ maji sɔrɔtoi amli buaa amɛhe naa kɛhaa daa otsi kpeei enumɔ. (Okɛto 2 Mose 34:23, 24 he.) Bɔ ni mɛi heei ni hereɔ sanekpakpa lɛ nɔ lɛ baa babaoo lɛ tsɔɔ akɛ akɛ asafoi heei akpei abɔ fataa he daa afi. Atsɔɔ shika ni naa shɛɔ dɔlai akpekpei abɔ ni akɛfaa, ni atsɔɔ Asafo lɛ nɔ akɛtsuɔ nii lɛ nɔ amamɔɔ Maŋtsɛyeli Asai heei ohai abɔ daa afi, ni asaa, ni alɛɛɔ ekrokomɛi babaoo hu mli. Eyɛ mli akɛ eji shika ni hiɔ shi daa ni akɛtsuɔ nii shii abɔ be fɛɛ be moŋ, shi efalɛ ni abiɔ lɛ yaa hiɛ be fɛɛ be.
He kome ni shweremɔ babaoo eba yɛ jɛmɛ, bɔ ni anako nakai dã ji maji ni yɔɔ Europa Bokagbɛ ni yɔɔ tsutsu Soviet Union shishi lɛ amli. Kwɛ bɔ ni adafitswaa ni tsara nɔ kɛba akɛ agbele nitsumɔ lɛ naa yɛ nɛkɛ hei nɛɛ yɔɔ miishɛɛ ha! Amrɔ nɛɛ akɛ maŋsɛɛ sanekpakpa shiɛlɔi miiya nɛkɛ maji nɛɛ ateŋ babaoo mli. Agbele nitsumɔ he niji heei yɛ shikpɔji komɛi anɔ, ni enɛ eha sɔɔlɔi ni kɛ amɛhe eha, ni amɛtsuɔ nii yɛ jeŋ muu fɛɛ Betel weku lɛ mli lɛ ayi efa waa kɛteke 15,000. Ni yɛ anɔkwale mli lɛ, esa akɛ ahe loo amamɔ nitsumɔ he niji tsũi koni amɛhi mli. Otooyeli lɛ yeɔ ebuaa ni akɛtsuɔ hiamɔ nɛɛ he nii.
Satan kɛ edaimonioi lɛ naa nɛkɛ nitsumɔ babaoo ni atsuɔ nɛɛ. Amɛfeɔ nɔ fɛɛ nɔ ni amɛaanyɛ ni amɛkɛha Yehowa tsuji anɔkwafoi lɛ amɔdɛŋbɔɔ afee efolo, aloo ni amɛkɛgba amɛ naa. (Kpojiemɔ 12:17) Enɛ tsɔɔ akɛ esa akɛ atsu mla naa saji ni yaa nɔ efaa babaoo ahe nii ni akɛbu hegbɛi ni Nyɔŋmɔ webii yɔɔ akɛ amɛaashiɛ ni amɛhi shi yɛ ejalɛ mlai lɛ kɛ gbeekpamɔ naa lɛ ahe. Kɛfata he lɛ, nibii ni tai kpataa hiɛ yɛ Satan nibii agbɛjianɔtoo nɛɛ mli, kɛ adebɔɔ mli osharai ni baa lɛ tsɔɔ akɛ bei pii lɛ, yelikɛbuamɔ nibii ahe hiaa wɔnyɛmimɛi hii kɛ yei kɛ mɛi krokomɛi ni fata amɛhe ni esaa amɛhe lɛ. Otooyeli lɛ yeɔ buaa kɛtsuɔ yelikɛbuamɔ ni he hiaa waa nɛɛ he nii.
Yehowa Baawo Bo Nyɔmɔ
Wɔbe kɛ wɔ nibii ni wɔyɔɔ ni wɔkɛaatsu nii ni eha Nuntsɔ lɛ nitsumɔ aya hiɛ lɛ kɛ jɔɔmɔi babaoo baa. Yɛ mɛɛ gbɛ nɔ? Ejaakɛ Nyɔŋmɔ, mɔ ni, yɛ naagbee lɛ, enɔ ji nibii fɛɛ lɛ, baawo wɔ nyɔmɔ. Abɛi 11:25 kɛɔ akɛ: “Mɔ ni nine kpɔɔ lɛ, eeewo fɔ, ni mɔ ni haa mɛi tɔrɔɔ lɛ, lɛ hu eeetɔ.” Kɛ wɔfee wɔ gbɛfaŋnɔ ni wɔkɛha ejamɔ tee hiɛ lɛ, Yehowa naa miishɛɛ waa diɛŋtsɛ. (Hebribii 13:15, 16) Ewo blema Israelbii ni kɛ tooyeli ni abiɔ yɛ Mla kpaŋmɔ lɛ mli lɛ baaba lɛ shi akɛ: “ ‘Nyɛkɛkaa mi nyɛkwɛa,’ Yehowa Zebaot kɛɛ, ‘akɛ migbeleŋ ŋwɛi samfɛji lɛ mihaŋ nyɛ, ni mifɔseŋ jɔɔmɔ mihaŋ nyɛ ni ateke nɔ lo?’ ” (Maleaki 3:10) Mumɔŋ shweremɔ ni Yehowa tsuji naa mli ŋɔɔmɔ ŋmɛnɛ lɛ ji odaseyeli ni tsɔɔ akɛ Nyɔŋmɔ yeɔ eshiwoi anɔ.
Nɛkɛ nitsumɔ kpele ni ji yiwalaheremɔ gbi ni ajajeɔ atsɔɔ gbɔmɛi fɛɛ, ni ayeɔ abuaa mɛi ni yɔɔ jalɛ tsuii kɛbanyiɛɔ wala gbɛ lɛ nɔ nɛɛ tsaŋ nɔ aahu kɛyaŋ naanɔ. (Mateo 7:14; 2 Korintobii 6:2) Shi esa akɛ abua mɛi ni ji Nuntsɔ lɛ “tooi krokomɛi” lɛ fɛɛ anaa. (Yohane 10:16) Kwɛ bɔ ni eyɔɔ nyam akɛ wɔɔkpee nakai kaa lɛ naa ŋmɛnɛ! Ni kwɛ bɔ ni wɔteŋ mɔ fɛɛ mɔ baana miishɛɛ aha, be mli ni wɔɔjɛ nakai jalɛ jeŋ hee lɛ mli wɔkwɛ be ni eho lɛ, ni wɔɔkɛɛ akɛ, ‘Mina gbɛfaŋnɔ kɛmɔ shi yɛ nakai naagbee naabuamɔ nitsumɔ lɛ mli’!—2 Petro 3:13.
[Akrabatsa ni yɔɔ baafa 30, 31]
Gbɛi ni Mɛi Komɛi Tsɔɔ Nɔ Amɛtsuɔ Onia Kɛhaa Maŋtsɛyeli-Shiɛmɔ Nitsumɔ Lɛ
TOOYELI KƐHA JEŊ MUU FƐƐ NITSUMƆ LƐ: Mɛi pii kɛ shika ko fɔɔ shi daa ni amɛkɛwoɔ tooyeli adekai ni akadi amɛ akɛ: “Tooyeli Kɛha Asafo lɛ Jeŋ Muu Fɛɛ Nitsumɔ—Mateo 24:14” lɛ amli. Daa nyɔŋ nɔ lɛ, asafoi lɛ kɛ shika nɛɛ majeɔ kɛyaa jeŋ muu fɛɛ nitsumɔ he yitso lɛ yɛ Brooklyn, New York, aloo amɛkɛyaa nitsumɔ he nine ni yɔɔ maŋ nɔ he ni amɛyɔɔ lɛ.
NIKEENII: Abaanyɛ akɛ shika ni ataoɔ akɛke lɛ amaje tɛɛ kɛbaha Watch Tower Bible and Tract Society of Pennsylvania, 25 Columbia Heights, Brooklyn, New York 11201-2483, aloo abaanyɛ akɛya Asafo lɛ nitsumɔ he nine ni sɔmɔɔ maŋ ni oyɔɔ mli lɛ. Abaanyɛ akɛ jwetrii kɛ nibii krokomɛi ni jara wa hu ake. Esa akɛ aŋma wolo fioo ko afata nɛkɛ nikeenii nɛɛ ahe ni akɛtsɔɔ mli akɛ amɛji nibii ni akɛmiike kwraa.
NIBII NI AKƐHA SHI AKƐKEKO LƐ AHE GBƐJIANƆTOO: Abaanyɛ akɛ shika aha Buu Mɔɔ Asafo lɛ ni ehi edɛŋ kɛyashi mɔ ni kɛha lɛ aaagbo, kɛ gbɛjianɔtoo akɛ kɛ ehe miihia mɔ ni kɛha lɛ, abaaku sɛɛ akɛha lɛ.
INSURANCE: Abaanyɛ aŋma Buu Mɔɔ Asafo lɛ gbɛi akɛ mɛi ni baana insurance gbɛjianɔtoo ko he sɛɛ lɛ ateŋ mɔ ko aloo yɛ nitsumɔ hejɔɔmɔ mli gbɛjianɔtoo hu mli. Esa akɛ atswa Asafo lɛ adafi yɛ gbɛjianɔtoo ni tamɔ nakai he.
SHIKA NI AKƐTO BANK: Abaanyɛ aha shika ni akɛto, shika nɔ woji, aloo nitsumɔ mli hejɔɔmɔ mli shika ahi shi aloo akɛha Buu Mɔɔ Asafo lɛ yɛ mɔ lɛ gbele sɛɛ, yɛ bɔ ni nyɛ maŋ shikatoo hei ŋmɛɔ gbɛ ni afee lɛ naa. Esa akɛ atswa Asafo lɛ adafi yɛ gbɛjianɔtoi ni tamɔ nakai he.
NITSUMƆI AMLI GBƐFAŊNƆ KƐ SHIKA NI AKƐFA: Abaanyɛ akɛ nitsumɔi amli gbɛfaŋnɔ ni ayɔɔ kɛ shika ni akɛfa ni abaaku sɛɛ awo ekoŋŋ lɛ aha Buu Mɔɔ Asafo lɛ akɛ nibii ni akɛmiike kwraa aloo kɛ gbɛjianɔtoo akɛ akɛ emli sɛɛnamɔi lɛ baaha mɔ ni kɛke lɛ.
SHIKPƆJI KƐ TSŨI: Abaanyɛ akɛ shikpɔji kɛ tsũi ni baahi hɔɔmɔ lɛ aha Buu Mɔɔ Asafo lɛ kɛtsɔ ke kwraa ni akɛaake nɔ, aloo ni abaashi shikpɔŋ loo tsu lɛ yɛ mɔ ni kɛke lɛ dɛŋ, koni ehi tsu lɛ mli aloo ekwɛ nɔ aahu kɛyashi be mli ni eeegbo. Esa akɛ mɔ ni taoɔ ekɛ shikpɔŋ loo tsu ko aha Asafo lɛ ana Asafo lɛ dani efee nakai.
SHAMAŊSHEO KƐ NII NI AHAA MƆ KROKO GBƐI KÃA NƆ: Abaanyɛ akɛ nibii ni ayɔɔ loo shika ake Buu Mɔɔ Asafo lɛ kɛtsɔ shamaŋsheo ni aŋma yɛ mla naa nɔ, aloo abaanyɛ aha Asafo lɛ gbɛi akã shika ni akɛto lɛ nɔ. Bei komɛi lɛ, jamɔ gbɛjianɔtoo ko gbɛi ni kãa shika ko nɔ lɛ haa anaa too woo mli heyelii komɛi. Esa akɛ akɛ shamaŋsheo loo shika lɛ he wolo lɛ ekome amaje Asafo lɛ.
NIHAMƆ NI AKPƐ YIŊ YƐ HE: Asafo lɛ efee wolo bibioo ko yɛ Ŋleshi Blɔfo wiemɔ mli ni yitso ji “Nihamɔ ni Akpɛ Yiŋ yɛ He.” Nɛkɛ saji ni aŋmala nɛɛ baaye abua mɛi ni yɔɔ United States ni miito gbɛjianɔ ni amɛkɛ nɔ krɛdɛɛ ko ake Asafo lɛ bianɛ, aloo amɛshi nikeenii ko yɛ amɛgbele sɛɛ lɛ waa diɛŋtsɛ. Enɛ ji anɔkwale, titri lɛ kɛ amɛmiisumɔ amɛtsu amɛweku lɛ oti ko loo yiŋtoo ko ni amɛkɛma amɛhiɛ yɛ gboshinii ahe nitsumɔ gbɛfaŋ lɛ he nii, yɛ be mli ni amɛkɛ mla naa hegbɛi ni yɔɔ lɛ tsuɔ nii koni eha too ni abiɔ ni amɛwo lɛ aba shi lɛ.
Kɛji ootao ole nibii ni yɔɔ yiteŋgbɛ nɛɛ eko he saji amli babaoo lolo lɛ, ŋmaa wolo kɛya Watch Tower Bible and Tract Society of Pennsylvania, P. O. Box 760, Accra, Ghana, aloo kɛya Asafo lɛ nitsumɔ he nine ni sɔmɔɔ maŋ nɔ he ni oyɔɔ lɛ.