Nihamɔ—Ani Akpaa Gbɛ?

EKOLƐ ole jogbaŋŋ akɛ nikee damɔɔ kusum nifeemɔi anɔ yɛ bei pii amli. Maji pii yɛ ni bei shɛɔ ni akpaa nikee gbɛ. Nikeenii nɛɛ baanyɛ afee bulɛ loo suɔmɔ kpojiemɔi ahe okadii. Mɛi ni nine shɛɔ nɔ lɛ kɛ pii tsuuu nii kwraa; ekrokomɛi yeɔ ebuaa ni etsuɔ hiamɔ nii diɛŋtsɛ he nii ni hiɛ sɔɔ waa.

Kɛ afɔ abifao ko yɛ Denmark lɛ, nanemɛi kɛ wekumɛi basaraa lɛ ni amɛkɛ nikeenii ni amɛheɔ amɛyeɔ akɛ ehe baaba sɛɛnamɔ aha abifao lɛ bahaa. Yɛ shikpɔji krokomɛi anɔ lɛ, nanemɛi baanyɛ aŋmɛ okpɔlɔ ni akɛ nikeenii nɛɛ haa yɛ fɔmɔ lɛ gbɛkpamɔ hewɔ.

Bei ni akɛkpaa nikeenii agbɛ yɛ bei pii amli lɛ baa daa afi. Eyɛ mli akɛ gbijurɔyelii ni tamɔ nɛkɛ jeee nifeemɔ ni yaa nɔ yɛ klɛŋklɛŋ Kristofoi lɛ ateŋ moŋ, shi amɛbahe shi waa yɛ mɛi ni tsɛɔ amɛhe Kristofoi kɛ mɛi ni jeee Kristofoi lɛ ateŋ mɛi pii anifeemɔ mli. Nifeemɔ ni ji fɔmɔ gbii amli nikeenii baanyɛ aba shi yɛ maji komɛi amli beni gbekɛbii daraa, shi kusum nifeemɔ ni yaa nɔ yɛ Helabii ateŋ lɛ tsɔɔ nɔ kroko. Agbalaa jwɛŋmɔ kɛyaa fɔmɔ gbii anɔ waa yɛ Hela. Amɛkeɔ mɔ nii hu yɛ ‘egbi gbɛi’ gbi lɛ nɔ. Mɛni ji no? Ojogbaŋŋ, jamɔ mli kusum nifeemɔ kɛ “hetselɔ” kroko haa afi lɛ mli gbi fɛɛ gbi, ni akɛ “hetselɔi” agbɛi woɔ mɛi pii. Kɛ “hetselɔ” lɛ gbi lɛ shɛ lɛ, mɛi ni hiɛ nakai gbɛi lɛ anine shɛɔ nikeenii anɔ.

Kɛfata fɔmɔ gbii ni amɛyeɔ amɛhaa amɛbii ahe lɛ, Koreabii yɛ maŋ hejɔɔmɔ gbi ni ale akɛ Gbekɛbii a-Gbi. Eji be ni weku lɛ kɛjeɔ kpo kɛ be ni akɛ nikeenii haa gbekɛbii, ni be ni akɛfɔ amɛ lɛ kɔɔɔ he eko. Koreabii yɛ Fɔlɔi a-Gbi hu, beni gbekɛbii keɔ amɛ fɔlɔi anii, kɛ Tsɔɔlɔi a-Gbi, beni nikaselɔi woɔ amɛ tsɔɔlɔi ahiɛ nyam ni amɛkeɔ amɛ nii. Taakɛ Koreabii akusum nifeemɔ tsɔɔ lɛ, kɛ mɔ ko ye afii 60 lɛ, aŋmɛɔ okpɔlɔ agbo ko ahaa lɛ. Wekumɛi kɛ nanemɛi bafataa he ni amɛbiɔ shweremɔ loo walasɛɛtsɛlɛ kɛ miishɛɛ amɛhaa lɛ, ni akɛ nikeenii haa mɔ ni eyashɛ wala shihilɛ mli be nɛɛ he lɛ.

Yookpeemɔ hu ji be kroko ni kusum nifeemɔ ni ehe gbɛi biɔ ni ake nii. Kɛ abote gbalashihilɛ mli yɛ Kenya lɛ, akpaa gbɛ akɛ ayemforo wu lɛ weku baake ayemforo lɛ weku lɛ nii. Mɛi ni afɔ nine atsɛ amɛ hu kɛ nikeenii baa. Kɛ ayemforo lɛ kɛ ayemforo wu lɛ diɔ kusum nifeemɔi asɛɛ lɛ, amɛbaatara kpoku nɔ, beni mɛi ni afɔ nine atsɛ amɛ lɛ kɛ amɛ nikeenii baa lɛ. Beni akɛ eko fɛɛ eko haa lɛ, atswaa adafi akɛ “Ashimashi kɛ nikeenii ebaha mɛi ni ekpee amɛhe lɛ.” Eŋɔŋ mɛi ni keɔ nii lɛ ateŋ mɛi pii anaa kɛ atsiii amɛ tã yɛ nɛkɛ gbɛ nɔ.

Yɛ Lebanon bii ateŋ lɛ, kɛ mɔ ko bote gbalashihilɛ mli lɛ, nanemɛi kɛ akutsoŋbii, mɛi ni leee hefatalɔi lɛ jogbaŋŋ po jeɔ shishi amɛkɛ nikeenii baa gbii pii yɛ no sɛɛ. Kɛjɛ gbekɛbiiashi tɔ̃ɔ ni atsɔɔ amɛ akɛ nikee ji gbɛnaa nii, etamɔ nyɔmɔ ni awoɔ. Lebanon nyo nuu ko kɛɛ akɛ: “Kɛ ofeee lɛ, ohe tseee bo. Eji kusum.”

Shi bei ni akpaa nikee gbɛ fe fɛɛ yɛ shikpɔji pii anɔ ji Blonya. Ani jeee nakai eji yɛ he ni oyɔɔ lɛ? Nyɛsɛɛ nɛɛ nɔŋŋ yɛ 1990, ni abu akɔntaa akɛ Amerikabii fiteɔ fe dɔlai akpekpei akpei 40 yɛ Blonya nikeenii ahe. Buddhafoi kɛ Shintobii ni yɔɔ Japan kɛ miishɛɛ babaoo hu yeɔ nakai gbijurɔ lɛ, ni anaa gbijurɔyelii sɔrɔtoi yɛ Europa, Amerika Wuoyigbɛ, kɛ Afrika hei krokomɛi.

Blonya ji be ni akpaa gbɛ akɛ gbɔmɛi baana miishɛɛ, shi mɛi pii naaa miishɛɛ. Ni mɛi pii naa akɛ ekãa kɛ miishɛɛ ni akɛheɔ nikeenii kɛ yeyeeye ni afeɔ yɛ nyɔmɔ ni abɔ lɛ woo mli lɛ haà miishɛɛ be fɛɛ ni amɛna lɛ nɔ.

Ni kɛlɛ, Biblia lɛ kɛɔ akɛ, miishɛɛ yɛ nihamɔ mli. Lɛlɛŋ nakai eji, ni edamɔ mumɔ ni akɛhaa nii lɛ nɔ.—Bɔfoi lɛ Asaji 20:35.