Sanebimɔi ni Jɛ Kanelɔi Adɛŋ
Efesobii 3:14, 15 kɛɔ akɛ, Nyɔŋmɔ ji mɔ ni “weku fɛɛ weku ni yɔɔ ŋwɛi kɛ shikpɔŋ nɔ lɛ na egbɛi kɛjɛ eŋɔɔ.” Ani wekui yɛ ŋwɛi, ni ani adesa weku fɛɛ weku na egbɛi kɛjɛ Yehowa ŋɔɔ yɛ gbɛ ko nɔ?
Wekui bɛ ŋwɛi, taakɛ eji yɛ shikpɔŋ nɔ kɛ tsɛ, nyɛ, kɛ bii—ni amɛ fɛɛ amɛji wekumɛi yɛ heloo naa lɛ. (Luka 24:39; 1 Korintobii 15:50) Yesu tsɔɔ mli faŋŋ akɛ ŋwɛibɔfoi boteee gbalashihilɛ mli, ni nɔ ko bɛ ni tsɔɔ akɛ amɛwoɔ shwiei yɛ gbɛ ko nɔ.—Mateo 22:30.
Shi kɛlɛ, Biblia lɛ wieɔ Yehowa Nyɔŋmɔ he yɛ okadi gbɛ nɔ akɛ ekɛ eŋwɛi gbɛjianɔtoo lɛ ebote gbalashihilɛ mli; ebote gbalashihilɛ mli yɛ mumɔŋ shishinumɔ naa. (Yesaia 54:5) Nakai ŋwɛi gbɛjianɔtoo lɛ fɔɔ bii, tamɔ ŋwɛibɔfoi lɛ nɛkɛ. (Hiob 1:6; 2:1; 38:4-7) Belɛ yɛ shishinumɔ nɛɛ naa lɛ, mumɔŋ weku ko ni yɔɔ naakpɛɛ yɛ ŋwɛi.
Agbɛnɛ hu, okadi weku hee ko miije shishi yɛ ŋwɛi, ni amɛji Yesu Kristo kɛ eyemforo asafo 144,000 lɛ. (2 Korintobii 11:2) Mɛi ni afɔ amɛ mu nɛɛ ateŋ mɛi pii egboi momo, ni amɛyɛ ŋwɛi wala he hiɛnɔkamɔ. Mɛi komɛi yɛ wala mli lolo yɛ shikpɔŋ nɔ. Amɛ fɛɛ amɛkɛ hehiamɔ miikpa “Toobi lɛ yookpeemɔ” ni baaba yɛ ŋwɛi lɛ gbɛ. Biblia lɛ kɛ nakai yookpeemɔ lɛ fataa be ni amanehulu kpeteŋkpele—Babilon Kpeteŋkpele lɛ hiɛkpatamɔ, kɛ Satan gbɛjianɔtoo ni eshwɛ ni aaajie kɛya ni bɛŋkɛɔ, lɛ he.—Kpojiemɔ 18:2-5; 19:2, 7, 11-21, NW; Mateo 24:21.
Yɛ shikpɔŋ nɔ wekui ahe lɛ, bɔfo Paulo etsɔɔɔ yɛ Efesobii 3:15 akɛ kui ni feɔ wekui fɛɛ naa egbɛi kɛjɛɔ Yehowa ŋɔɔ tɛ̃ɛ. Shi moŋ, eyɛ faŋŋ akɛ nɔ ni yɔɔ Paulo jwɛŋmɔ mli ji wekukpaai ni yaa shɔŋŋ ni baa gbɛ́i yi lɛ. Yoshua 7:16-19 kɛ nɔkwɛmɔ nɔ haa. Yehowa miijie esha ni Akan efee lɛ kpo yɛ jɛmɛ. Klɛŋklɛŋ lɛ, akɛ tɔmɔ lɛ fɔ̃ Yuda weku lɛ nɔ loo akɛtere amɛ. Kɛkɛ ni aba lɛ shi kɛtee Zerabii aweku lɛ nɔ. Yɛ naagbee lɛ, akpa Akan shiabii lɛ ahe mama. Asusu Akan kɛ eŋa kɛ ebii lɛ ahe, loo awie amɛhe akɛ amɛfata Zabdi, Akan nii shiabii (loo, weku) lɛ he. Ni nakai weku lɛ hu ji kuu ni da ni baa amɛ blematsɛ Zera gbɛi lɛ yi lɛ.
Wekukpaai ni tamɔ nɛkɛ he hiaa waa yɛ Hebribii lɛ ateŋ, ni aŋmala pii yɛ Biblia lɛ mli. Nyɔŋmɔ fi amɛ yibaamɔ sɛɛ kɛtsɔ gbɛjianɔ ni eto, kɛ ehe miihia, koni amɛ seshibii lɛ kɛ weku gbɛ́i lɛ aha kɛtsɔ Gboshi-ŋa, loo wu nyɛmi feemɔ nii lɛ nɔ.—1 Mose 38:8, 9; 5 Mose 25:5, 6.
Ákɛ wekui ni dara loo emli lɛɛ nɛɛ ahe nɔkwɛmɔ nɔ kroko lɛ, susumɔ Yesu, akɛ David bi lɛ he. Eyɛ faŋŋ akɛ, ejeee mɔ ni Maŋtsɛ David fɔ lɛ tɛɛ, ejaakɛ afɔɔɔ lɛ aahu kɛyashi David gbele sɛɛ afii ohai babaoo. Kɛlɛ, Mesia lɛ kadimɔ nii ji akɛ, ebaajɛ David weku lɛ mli, taakɛ Yudafoi fɛɛ le lɛ. (Mateo 22:42) Yesu jɛ David wekukpaa lɛ mli kɛtsɔ enyɛ kɛ tsɛ ni ŋɔ lɛ fee ebi lɛ fɛɛ nɔ.—Mateo 1:1; Luka 2:4.
Shi, te fee tɛŋŋ ni nɛkɛ wekui nɛɛ na amɛgbɛi kɛjɛ Yehowa ŋɔɔ? Anɔkwa sane lɛ ji akɛ, shihilɛi fioo komɛi baa—tamɔ Abraham kɛ Isak sane lɛ nɛkɛ—ni Yehowa je gbɛ etsi weku yitso gbɛ́i diɛŋtsɛ tã. (1 Mose 17:5, 19) Enɛɛmɛi bafee sɔrɔto. Shi titri lɛ, Yehowa kɛ weku fɛɛ weku gbɛi ni ekɛhaa ebii haaa.
Shi, Yehowa ji mɔ ni je weku shishi beni efa Adam kɛ Hawa akɛ: “Nyɛfɔa ni nyɛyi afaa ni nyɛyia shikpɔŋ lɛ nɔ obɔ” lɛ. (1 Mose 1:28) Ni Yehowa ŋmɛ Adam kɛ Hawa ni yeee emuu lɛ gbɛ koni amɛwo shwiei, koni amɛkɛto adesai wekui fɛɛ shishi. (1 Mose 5:3) No hewɔ lɛ, abaanyɛ atsɛ Nyɔŋmɔ akɛ weku gbɛii a-Shishijelɔ yɛ nɔ ni fe shishinumɔ kome naa.
Hiŋmɛigbelemɔi pii yɛ ni ŋmɛnɛ, amɛnuuu he dɔŋŋ akɛ ehe miihia ni amɛha weku gbɛi lɛ ahi shi yinɔi pii. Ni kɛlɛ, Kristofoi daa Yehowa shi yɛ shikpɔji fɛɛ nɔ yɛ weku gbɛjianɔtoo lɛ hewɔ, ni amɛwoɔ ehiɛ nyam kɛtsɔɔ nii ni amɛtsuɔ waa koni amɛha amɛ aŋkroaŋkro weku kɔkrɔɔ lɛ aye omanye lɛ nɔ.