Okɛ Niji ni He Tse Aja Yehowa

BENI mumɔ lɛ tsirɛɔ lɛ lɛ, lalatsɛ David la akɛ: “Mafɔ midɛ yɛ bemyeli mli, ni mabɔle ofɔleshãa latɛ lɛ, Yehowa.”—Lala 26:6.

Beni David toɔ wiemɔi nɛɛ ahe gbɛjianɔ lɛ, no mli lɛ ekolɛ ekɛmiitsɔɔ kusum nii ni Israel Levi osɔfoi lɛ feɔ beni amɛkwɔɔ afɔleshãa latɛ lɛ kpoku lɛ, ni amɛkɛ amɛ afɔleshãai lɛ yafɔɔ la lɛ nɔ lɛ. Shi, dani amɛaafee jamɔ nifeemɔ ni tamɔ nɛkɛ lɛ, esa akɛ osɔfoi lɛ afɔ amɛdɛ kɛ amɛ naji ahe. Enɛ jeee nifeemɔ lɛ fa ni he ehiaaa. Shishijee nifeemɔ ni tamɔ nɛkɛ ni afeŋ lɛ baaha osɔfo lɛ wala aje edɛŋ!—2 Mose 30:18-21.

Kɛ aaawie he yɛ okadi gbɛ nɔ lɛ, nɔ ni jɛɔ hejuu nɛɛ mli baa ji mumɔŋ kɛ jeŋba mli hetsemɔ. (Yesaia 1:16; Efesobii 5:26) Yehowa miisumɔ ni ‘wɔbɔle efɔleshãa latɛ lɛ’ ŋmɛnɛ kɛtsɔ sɔɔmɔ ni wɔkɛaaha lɛ lɛ nɔ. Shi ebiɔ ni wɔkɛ niji ni he tse afee nakai—taakɛ David wie he lɛ, niji ni afɔ he “yɛ bemyeli mli.” Enɛ jeee taomɔ nii ni he ehiaaa, ejaakɛ mɛi ni kɛ amɛhe woɔ nibii ni he tseee mli lɛ anine shɛŋ Nyɔŋmɔ Maŋtsɛyeli lɛ nɔ. (Galatabii 5:19-21) Nyɔŋmɔ gbeyeishemɔ nitsumɔi kɛ hegbɛ haaa mɔ ko ni ekɛ ehe awo jeŋba shara mli. No hewɔ lɛ bɔfo Paulo ŋma akɛ: “Migbalaa mi diɛŋtsɛ migbɔmɔtso lɛ mai, ni miyeɔ lɛ nyɔ̃ŋ, koni mi ni mishiɛɔ mitsɔɔ mɛi krokomɛi lɛ, mi diɛŋtsɛ lɛ, akashɛ mi afɔ.”—1 Korintobii 9:27.

Esa akɛ mɛi ni taoɔ ŋwɛi nɔkpɛlɛmɔ kɛ anɔkwa miishɛɛ lɛ kɛ niji ni he tse asɔmɔ Yehowa. Taakɛ David ji lɛ, amɛnyiɛɔ “yɛ tsui ni eye emuu kɛ jalɛ mli.” —1 Maŋtsɛmɛi 9:4.