Maŋtsɛyeli Jajelɔi Bɔ Amaniɛ

“Nyɛtsoɔ Tamɔ Kanei yɛ Je Nɛŋ”

ANAA Yehowa Odasefoi akɛ esoro amɛ kwraa, ni bei pii lɛ awieee amɛhe ekpakpa yɛ lá ni amɛkpɛlɛɛɛ ni agbalaa awoɔ amɛmli lɛ hewɔ. Shi kɛlɛ, nɛkɛ shidaamɔ ni amɛkɔ nɛɛ damɔ Biblia lɛ nɔ shiŋŋ diɛŋtsɛ. Etsɔɔ akɛ Nyɔŋmɔ buɔ lá ni akɛtsuɔ nii yɛ gbɛ fɔŋ nɔ lɛ fɔ, ejaakɛ lá jara wa yɛ ehiɛ. (1 Mose 9:3, 4; 3 Mose 17:14) Nɔ ni ejɛ Ŋmalɛi lɛ amli ni amɛpɛi yɛ sane nɛɛ he lɛ mli eba ji akɛ, Yehowa Odasefoi muɔ sane naa akɛ eyɛ faŋŋ akɛ ŋmɛnɛŋmɛnɛ beaŋ nifeemɔ ni ji lá ni agbalaa awoɔ mɔ mli lɛ fata gbɛtsɔɔmɔ ni Biblia lɛ kɛha akɛ ‘atsi he kɛjɛ lá he’ lɛ he.—Bɔfoi lɛ Asaji 15:19, 20, 28, 29.

Yɛ nyɛsɛɛ afii nɛɛ amli lɛ, mɛi fɛɛ ni fata tsofafeemɔ nitsulɔi ahe, kɛ agbɛnɛ hu kojomɔ hei ni yɔɔ maji komɛi anɔ lɛ, ebafi Yehowa Odasefoi asɛɛ yɛ nɛkɛ sane nɛɛ mli. Akɛ nɔkwɛmɔ nɔ lɛ, yɛ Denmark lɛ, obalayoo ko ni yɔɔ bii, ni ele nɔ ni Biblia lɛ tsɔɔ yɛ la he lɛ, gbó yɛ tsɔne mli oshara ko ni eyaná hewɔ. Lá ni ekpɛlɛɛɛ ni aha lɛ lɛ hewɔ lɛ, datrɛfoi ni kwɛɔ lɛ lɛ je shitee-kɛ-woo ni adafitswaa woji kɛba Yehowa Odasefoi anɔ aaashɛ nyɔŋ kome sɔŋŋ lɛ shishi.

Obalayoo lɛ fɔlɔi bi ni akwɛ sane lɛ mli jogbaŋŋ, ni yɛ April 1994 mli lɛ, Denmark Nitsumɔ He ni Kwɛɔ Helatsɛmɛi Asaji anɔ lɛ tswa yiŋkpɛɛ ni afee lɛ he adafi. Ejaje akɛ helatsɛ lɛ gbo, jeee akɛni eheee lá hewɔ, shi moŋ yɛ tsofafeemɔ mli efɔŋ feemɔ hewɔ. Yiŋkpɛɛ lɛ damɔ nibii amlipɛimɔ ni Kuu ni Kwɛɔ Tsofafeemɔ Mli Saji Kɛha Kojomɔ lɛ kɛ nitsumɔ he ni kwɛɔ hewalɛnamɔ nɔ lɛ fee lɛ nɔ. Maŋ Nitsumɔ He ni Kwɛɔ Hewalɛnamɔ Nɔ lɛ wie yɛ wolo ni amɛŋma kɛtee tsofafeemɔ hei fɛɛ yɛ Denmark lɛ mli akɛ, sɔ̃ ka datrɛfoi anɔ akɛ amɛkɛ tsofafeemɔ gbɛi krokomɛi ni yɔɔ, ni hi fe fɛɛ lɛ aha Yehowa Odasefoi, be mli ni amɛsusuɔ kpɛlɛmɔ ni amɛkpɛlɛɛɛ lá hamɔ nɔ lɛ he.

Sane kroko hu ni ba lɛ kɔɔ Dan, ni ji Odasefonyo ko ni eye afii 15, ni la mli hela ni atsɛɔ lɛ leukemia gbe lɛ lɛ he. Yɛ enɛ mli lɛ, datrɛfoi kɛ bulɛ ha Dan yiŋ ni ekpɛ kɛ ekãa akɛ ekpɛlɛɛɛ ni aha lɛ lá lɛ. Nɔ ni enɛ kɛba ji ta ni afã waa yɛ adafitswaa woji amli, ni adafitswaa woji amli niŋmalɔi shwa datrɛfoi lɛ yɛ Dan gbele lɛ he. Shi, mɛi pii kɛ amɛ kpaaa gbee yɛ amale wiemɔi fɔji nɛɛ ahe.

Akɛ nɔkwɛmɔ nɔ lɛ, tsɔɔlɔ nukpa ni yɔɔ skul ni Dan yaa lɛ ba Maŋtsɛyeli Asa lɛ nɔ kɛha eyarafeemɔ lɛ. Enaa kpɛ ehe waa yɛ adafitswaa mli saji ni ejaaa ni awie yɛ Dan gbele he lɛ he. Beni eyanina enaanyo nitsulɔ ko ni ji Odasefonyo ni ebibii lɛ saji saŋŋ yɛ Yehowa Odasefoi ahe sɛɛ lɛ, ehe Jehovah’s Witnesses—The Organization Behind the Name video kasɛt lɛ ekome. Video lɛ fee lɛ fɛo aahu akɛ eto gbɛjianɔ ni tsɔɔlɔi ni yɔɔ skul lɛ hu fɛɛ akwɛ. Sɛɛ mli lɛ, ajie video lɛ atsɔɔ nikaselɔi lɛ fɛɛ, ni ato naa ni ajie aha klas fɛɛ klas.

Denmark maŋsɔɔlɔ ni kwɛɔ hewalɛnamɔ nɔ lɛ hu kɛ adafitswaa ni ejaaa ni agbɛ ashwã yɛ Dan datrɛfoi lɛ ahe akɛni amɛfi esɛɛ hewɔ lɛ kpaaa gbee. Ewie akɛ eja gbɛ akɛ datrɛfoi lɛ jie bulɛ kpo amɛtsɔɔ Dan yiŋkpɛɛ ni tsɔɔ akɛ eda, ni edamɔ hemɔkɛyeli ni yɔɔ shiŋŋ nɔ lɛ.

Maŋtsɛyeli jajelɔi akpekpei abɔ yɛ ni feɔ toiboo amɛhaa Nyɔŋmɔ mlai. Amɛ toiboo lɛ hewɔ lɛ, anaa amɛ akɛ esoro amɛ kwraa, mɛi ni “tsoɔ tamɔ kanei yɛ je nɛŋ.”—Filipibii 2:12, 15.