Nyɛtsɔsea Amɛ Kɛjɛa Gbekɛbiiashi

WINNIPEG FREE PRESS lɛ kɛɔ akɛ, ŋmɛnɛŋmɛnɛ beaŋ nibii amlipɛimɔ tsɔɔ akɛ, “hɔ́i ni aŋɔɔ lɛ yɛ bɔɔ su ko ni tsɔɔ akɛ amɛnuɔ gbeei ahe.” Nibii amlipɛilɔi ni yɔɔ North carolina Nikasemɔ He Wulu lɛ “na akɛ, beni nyɛmɛi ekane woji amɛtsɔɔ amɛbii ni amɛŋɔ amɛ hɔ́ lɛ sɛɛ lɛ, fufɔbii ni afɔɔ amɛ ehee lɛ feɔ nɔ̃ ko yɛ kukuji lɛ ni akaneɔ ekoŋŋ lɛ he.” Kɛ yei kane nii waa beni amɛhiɛ musu lɛ, enɛ baanyɛ aha gbekɛ lɛ ana jeŋba sui kpakpai. Biblia lɛ kɛɔ akɛ Timoteo ‘le ŋmalɛi krɔŋkrɔŋi lɛ kɛjɛ egbekɛbiiashi.’ (2 Timoteo 3:14, 15) Eka shi faŋŋ akɛ, enyɛ kɛ enaa yoo sɛɛnamɔ ni yɔɔ etsɔsemɔ kɛmiijɛ egbekɛbiiashi lɛ he, ni eeenyɛ eba akɛ, wolo ni akaneɔ lɛ waa hu fata he.

Niŋmalɔ, Jim Trelease kɛɔ akɛ, wolo kanemɔ ji “shihilɛ mli hesaa nii ni yɔɔ hewalɛ fe fɛɛ, ni wɔyɔɔ yɛ wɔshihilɛ mli ŋmɛnɛ.” Hesaa yɛ wiemɔ kɛ wiemɔi komekomei ni aje gbɛ abua naa kɛ nitsumɔ yaa hiɛ kɛtsɔɔ wolo kanemɔ waa nɔ.

Nilee yɛ mli akɛ oooje shi okane wolo waa, kɛ hoo lɛ kɛ oje shishi obɔi fufɔo lɛ kɛ wiemɔ pɛ. Eyɛ mli akɛ gbekɛ ni afɔko lɛ loo afɔ lɛ ehee lɛ nuŋ nɔ ni okɛɔ lɛ shishi kɛjɛ shishijee moŋ, shi sɛɛnamɔi ni sɛɛ tsɛɔ ni baajɛ mli aba lɛ sa nakai. Abɛi 22:6 kɛɔ akɛ: “Tsɔɔmɔ gbekɛ gbɛ ni sa akɛ etsɔ nɔ, ni kɛ egbɔ hu lɛ, ejeŋ nɔ.”

Mɛni obaanyɛ okane, ni anyɛɔ akɛtsuɔ nii, ni sɛɛnamɔ yɔɔ he hu? Kanemɔ Biblia lɛ waa otsɔɔ obi lɛ daa gbi. Agbɛnɛ hu kanemɔ woji ni sa, tamɔ Tsɔɔlɔ Kpele lɛ Toiboo, My Book of Bible Stories, Gbɔmɔ ni Fe Mɔ Fɛɛ Mɔ ni Ehi Shi Pɛŋ, kɛ saji ni yɔɔ Buu-Mɔɔ kɛ Awake! woji tɛtrɛbii lɛ amli lɛ.

Eji anɔkwale akɛ, ohe ni okɛaaha yɛ nɛkɛ gbɛ nɔ lɛ biɔ be, shi eji be ni akɛtsu nii jogbaŋŋ. Eji gbɛ pɔtɛɛ ni otsɔɔ nɔ otsɔɔ akɛ osusuɔ obi lɛ he ni osumɔɔ lɛ.