Shiwoo Shikpɔŋ lɛ Saramɔ

ŊƆƆ lɛ akɛ, naanyo ko kɛɛ bo akɛ ehe—shia hee ko kɛha bo, yɛ shihilɛ hei ni yɔɔ fɛo, ni yɔɔ kpoo mli—akɛ nikeenii. Obaasusu akɛ, ‘Te etamɔ tɛŋŋ?’ Ŋwanejee ko bɛ he akɛ, ohe baatswa shi akɛ bo diɛŋtsɛ ooona shia nɛɛ, oshera shi yɛ mli ni okwɛ tsu lɛ eko fɛɛ eko mli. Fɛɛ sɛɛ lɛ, oshia hee nɛ!

Afi 1473 D.Ŋ.B. lɛ mli lɛ, Yehowa kɛ shia hee ko ha blema Israel maŋ lɛ—Shiwoo Shikpɔŋ lɛ, shikpɔŋkuku leleoo ko ni ekɛlɛ shɛɔ kilomitai 500 kɛjɛ kooyigbɛ kɛmiiya wuoyigbɛ, ni elɛɛmɔ shɛɔ kilomitai 55, kɛ aja mli.a Akɛni eyɔɔ he ni tsutsu lɛ atsɛɔ jɛmɛ akɛ Nyɔŋtsere Fã Shikpɔŋ ni Baa Nii lɛ hewɔ lɛ, Shiwoo Shikpɔŋ lɛ ji he ko ni jɛmɛ hilɛ baaŋɔɔ waa, ni akɛ enɔ nibii ni yɔɔ sɔrɔto lɛ ejɔɔ lɛ.

Shi, mɛni hewɔ esa akɛ omii ashɛ “shia” ni akɛha mɔ kroko, titri lɛ, mɔ ko ni hi shi jeeŋmɔ beebe lɛ he? Ejaakɛ nɛkɛ yinɔsane mli shikpɔŋ nɛɛ he nilee baanyɛ aha hiɛsɔɔ ni oyɔɔ kɛha Biblia mli saji lɛ aya hiɛ. Nilelɔ Yohanan Aharoni ni egbo lɛ ŋma akɛ, “akɛ shikpɔŋ he nilee kɛ yinɔsane efutu waa yɛ Biblia shikpɔŋ lɛ nɔ akɛ, anyɛŋ anu ekome shishi diɛŋtsɛ ni ekroko lɛ yelikɛbuamɔ bɛ mli.” Agbɛnɛ hu, beni ehe gbɛ́i waa lɛ, Shiwoo Shikpɔŋ lɛ kɛ nɔ ni etsɛŋ ni Paradeiso ni yɔɔ Nyɔŋmɔ Maŋtsɛyeli lɛ shishi lɛ baaji aha adesai yɛ shikpɔŋ lɛ fɛɛ nɔ lɛ he nɔkwɛmɔ nɔ bibioo ha!—Yesaia 11:9.

Yesu Kristo kɛ nibii ni anaa yɛ Shiwoo Shikpɔŋ lɛ nɔ lɛ tsu nii ni ekɛtsɔɔ nii ni gbɔmɛi lɛ baanyɛ atsu he nii. (Mateo 13:24-32; 25:31-46; Luka 13:6-9) Wɔ hu wɔbaanyɛ wɔkase babaoo ni wɔɔnyɛ wɔtsu he nii kɛjɛ blema Palestina shikpɔŋ lɛ nɔ nibii komɛi ahe susumɔ mli. Nyɛhaa wɔsheraa shi kɛtsɔa etsũi lɛ ekomɛi amli, kɛ wɔɔkɛɛ nakai, ni wɔkwɛ shikpɔŋ ni akɛtsu nii akɛ shia kɛha Nyɔŋmɔ webii afii ohai babaoo lɛ nɔ nibii ni yɔɔ sɔrɔto waa lɛ ekomɛi. Taakɛ wɔbaana lɛ, babaoo yɛ ni wɔbaanyɛ wɔkase kɛjɛ Shiwoo Shikpɔŋ lɛ nɔ.

[Shishigbɛ niŋmaa]

[He ni Mfoniri ni yɔɔ baafa 2 lɛ Jɛ]

Cover: Pictorial Archive (Near Eastern History) Est.

[He ni Mfoniri ni yɔɔ baafa 3 lɛ Jɛ]

Garo Nalbandian