Nu Afua He Blemasane Fiɔ Biblia Mli Sane Sɛɛ

NOA gbii lɛ amli Nu Afua lɛ ji yinɔsane mli anɔkwale. Anaa sane nɛɛ he wiemɔ yɛ hiŋmɛigbelemɔi sɔrɔtoi ni ebɔle jeŋ fɛɛ lɛ ayinɔsane ni akɛ naabu gbaa lɛ amli. Moussaye akutso ni yɔɔ Afrika maŋ ni ji Chad mli lɛ tsɔɔ Nu Afua lɛ mli yɛ nɛkɛ gbɛ nɔ:

‘Weku ko hi shi, yɛ be ko mli, yɛ he ko ni yɔɔ shɔŋŋ. Gbi ko lɛ, weku nɛɛ nyɛ̃ lɛ miisumɔ ni ehoo niyenii ko ni ŋɔɔ eha esuɔlɔi lɛ. No hewɔ lɛ, ewo efufuitso kɛ emlibi lɛ koni eshi ŋmaa ni ekɛfee shikishaŋ. No mli lɛ ŋwɛi bɛŋkɛ fe bɔ ni eji bianɛ lɛ. Yɛ anɔkwale mli lɛ, kɛ okpa onine mli lɛ, onyɛɔ otaa he. Ekɛ ehewalɛ fɛɛ shi ŋmaa lɛ, ni etsɛɛɛ ni akoko ni eshi lɛ tsɔ shikishaŋ. Shi beni eshiɔ lɛ, yoo lɛ kwɛɛɛ jogbaŋŋ ni ewo fufuitso mlibi lɛ nɔ kɛtee ŋwɛi tsɔ̃, ni ekɛgbu fɔlɔ yɛ atatu lɛ mli! Amrɔ nɔŋŋ ni nui babaoo diɛŋtsɛ bɔi shikpɔŋ nɔ shwiemɔ. Enɛ jeee nugbɔnɛmɔ ko kɛkɛ. Enɛ gbii kpawo kɛ jenamɔi kpawo kɛyashi be mli ni nu ha shikpɔŋ lɛ fɛɛ nɔ. Beni nugbɔ lɛ nɛɔ lɛ, atatu lɛ bɔi ehe nɔ womɔ aahu kɛyashi be mli ni eyashɛ he ni eyɔɔ bianɛ—shɔŋŋ ni nine shɛɛɛ nɔ lɛ. Mɛɛ oshara po enɛ ji kɛha adesai nɛkɛ! Kɛjɛ nakai be lɛ mli kɛbaa nɛɛ, wɔlaaje hegbɛ ni haa wɔkɛ wɔniji taa ŋwɛi he lɛ.’

Miishɛɛ sane ji akɛ, abaanyɛ ana blema saji ni gbaa jeŋ muu fɛɛ nu afua he sane lɛ yɛ jeŋ fɛɛ. Amerika jakumaŋbii ahiŋmɛigbelemɔi kɛ agbɛnɛ Australia Shikwɛ̃ɛbii lɛ fɛɛ yɛ adesãi ni atãa yɛ enɛ he. Emlitsɔɔmɔ lɛ baanyɛ afee sɔrɔto, shi saji lɛ titri hiɛ susumɔ ni tsɔɔ akɛ, nu baha shikpɔŋ lɛ nɔ, ni mɛi fioo ko pɛ tsɔ lɛlɛ ko ni gbɔmɔ fee nɔ amɛje mli. Saneyitso ni egbɛ eshwã nɛɛ fiɔ anɔkwale ni eji akɛ jeŋ muu fɛɛ Nu Afua ko ba lɛ sɛɛ, taakɛ abɔ he amaniɛ yɛ Biblia lɛ mli lɛ.—1 Mose 7:11-20.