Ahere Eyiwala yɛ Amanehului Abe Mli — Buu-Mɔɔ INTANƐT NƆ WOJIATOOHE

Ahere Eyiwala yɛ Amanehului Abe Mli

SHWAPO nsɔɔdoi enumɔ ni yɔɔ Seoul, yɛ Korea lɛ kumɔ shwie shi trukaa, ni etsĩ gbɔmɛi ohai

abɔ naa ewo mli! Nitsulɔi ni hereɔ gbɔmɛi ayiwala tsu nii jenamɔ kɛ jetsɛremɔ koni amɛkɛhere gbɔmɛi ayiwala bɔ ni amɛaanyɛ. Beni gbii lɛ hoɔ yaa lɛ, hiɛnɔkamɔ akɛ ekolɛ abaana gbɔmɛi ni yɔɔ wala mli lolo yɛ kɔnkrit kɛ dade ni bua shi tamɔ gɔŋ lɛ shishi lɛ bɔ̃i shibaa.

Beni hiɛnɔkamɔ fɛɛ etã akɛ aaana mɔ ko lɛ pɛ kɛkɛ ni nɔ ko ni yɔɔ naakpɛɛ ba. Anu yaafó ko ni naa waaa ni yɔɔ awerɛho he yɛ nibii ni ekumɔ ni bua shi lɛ ashishi. Nitsulɔi lɛ kɛ amɛniji tsa shi kɛ hiɛdɔɔ koni amɛkɛhere yoo ni eye afii 19 lɛ ni áfũ lɛ hiɛkãlɔ gbii 16 sɔŋŋ lɛ yiwala. Tsɔne atswere ko ni ekumɔ tsɔ̃ tamɔ fɔlɔ ko ni tamɔ hebuu nɔ̃ kɛha enɔ, ni etsĩ enɔ kɛjɛ kɔnkrit tɔn abɔ ni aaagbee enɔ lɛ he. Eyɛ mli akɛ egbɔmɔtso mli nui fɛɛ etã ni nɔ ko éfo lɛ moŋ, shi eje gbele mli!

Yɛ ŋmɛnɛŋmɛnɛ gbii nɛɛ amli lɛ, nyɔŋ ko hooo ni anuuu oshara ko he amaniɛbɔɔ, kɛ́ eji shikpɔŋhosomɔ, ahum ni fiteɔ nii, lasũ gɔŋ ko fɛmɔ, tsɔne mli oshara ko, loo hɔmɔ ko he. Ni naakpɛɛ jiemɔi kɛ yiwalaheremɔi ahe amaniɛbɔi lɛ haa akpekpei abɔ ni boɔ adafitswai atoi lɛ anaa kpɛɔ amɛhe diɛŋtsɛ. Shi kɛlɛ, amanehulu ko ni miiba lɛ he kɔkɔbɔɔ—nɔ ni da fe fɛɛ yɛ adesa yinɔsane mli lɛ—efee nɔ ni mɛi eku amɛhiɛ amɛshwie nɔ kwraa. (Mateo 24:21) Biblia lɛ tsɔɔ nii ni baa nɛɛ mli yɛ wiemɔi nɛɛ amli: “Naa, efɔŋ aaajɛ jeŋmaŋ nɔ aya jeŋmaŋ nɔ, ni ahum kpeteŋkpele aaate shi kɛaajɛ shikpɔŋ lɛ naagbeehe tɔ̃ɔ; ni mɛi ni Yehowa aaagbe yɛ nakai gbi lɛ nɔ lɛ aaakamɔ shi kɛaajɛ shikpɔŋ lɛ naagbeehe kome kɛaatee shikpɔŋ lɛ naagbeehe kroko lɛ; afeŋ amɛyara, abuaŋ amɛnaa, ni asaŋ afuŋ amɛ: amɛaatsɔ tumu yɛ shikpɔŋ lɛ nɔ.”—Yeremia 25:32, 33.

Wiemɔi ni hɛleɔ mɔ shi nɛ! Shi nɔ ni tamɔɔɔ adebɔɔ mli amanehului kɛ osharai lɛ, nɛkɛ amanehulu nɛɛ efeŋ gbɔmɔgbee ko kɛkɛ ni akwɛɛɛ mli. Yɛ anɔkwale mli lɛ, yiwalaheremɔ—bo oyiwalaheremɔ—baanyɛ aba!

Be ni Biɔ Oyaiyeli

Bɔni afee ni anu anɔkwa sane nɛɛ shishi jogbaŋŋ lɛ, klɛŋklɛŋ lɛ, ehe miihia ni mɔ anu nɔ hewɔ ni jeŋ muu fɛɛ amanehulu nɛɛ baaba lɛ shishi klɛŋklɛŋ dã. Yɛ anɔkwale mli lɛ, no pɛ ji adesai anaagbai lɛ anaa tsabaa diɛŋtsɛ. Ŋmɛnɛ mɛi fioo ko pɛ nuɔ he akɛ amɛyɛ shweshweeshwe. Yɛ jeŋ nilee he mɔdɛŋbɔi ni hi fe fɛɛ lɛ fɛɛ sɛɛ lɛ, tsɛŋemɔ helai miikpatã shikpɔŋ nɔ bii ahiɛ kɛmiiya lolo. Tai ni jɛ Nyɔŋmɔjamɔ, weku mligbalamɔ, kɛ maŋkwramɔŋ sɔrɔtofeemɔi amli lɛ kpatãa gbɔmɛi akpei abɔ awala hiɛ. Hɔmɔ kɛ eko fataa hii, yei, kɛ gbekɛbii ni leee mli eko lɛ ahaomɔ kɛ piŋmɔ lɛ he. Jeŋba shara kpatãa gbɔmɛi agbɛjianɔtoo lɛ shishitoo diɛŋtsɛ lɛ hiɛ; ni áfite gbekɛbii diɛŋtsɛ po.

Biblia mli gbalɛ ni aŋma afɔ̃ shi fe afii 1,900 ni eho nɛ lɛ tsɔɔ wɔshihilɛ lɛ mli pɛpɛɛpɛ yɛ naakpɛɛ gbɛ nɔ. Ekɛɔ akɛ: “Esa akɛ oyoo akɛ yɛ naagbee gbii lɛ amli lɛ, bei lɛ amli baayi obɔ kɛ osharai.”—2 Timoteo 3:1, The New Testament in Modern English, ni J. B. Phillips fee; okɛto Mateo 24:3-22 he.

Ani osusuɔ akɛ jwɛŋmɔ yɛ mli kɛha bo akɛ Nyɔŋmɔ ni yɔɔ suɔmɔ lɛ aaafee mɔ ni wɔ haomɔi nɛɛ jeee ehe sane ko? Biblia lɛ kɛɔ akɛ: “Nyɔŋmɔ, mɔ ni shɔ̃ shikpɔŋ lɛ ni efee . . . ni ebɔɔɔ lɛ efolo, shi eshɔ̃ lɛ ni ahi nɔ.” (Yesaia 45:18) Hɛɛ, yɛ nɔ najiaŋ ni eeeha afite shibɔlemɔ ŋulami fɛfɛo nɛɛ, ni enɔ bii fɛɛ aba naagbee lɛ, Nyɔŋmɔ kɛ ehe baawo mli. Sanebimɔ lɛ ji, Mɛɛ gbɛ nɔ eeetsɔ efee nakai?

Halamɔ Wala!

Biblia lɛ haa hetoo yɛ Lala 92:8: “Kɛ mɛi fɔji miifũ gbɔ̃lɔgbɔ̃lɔ tamɔ jwɛi, ni mɛi ni tsuɔ nishaianii lɛ miifrɔke lɛ, afee koni akpatã amɛhiɛ kwrakwra.” Nyɔŋmɔ tsabaa kɛha shikpɔŋ lɛ nɔ naagbai ji efɔŋfeemɔ diɛŋtsɛ ni aaajie kɛya. Yɛ miishɛɛ mli lɛ, enɛ etsɔɔɔ akɛ ehe miihia ni akpatã gbɔmɛi fɛɛ hiɛ. Lala 37:34 maa nɔ mi kɛhaa wɔ akɛ: “Kwɛmɔ Yehowa gbɛ ni onyiɛ egbɛ lɛ nɔ, ni eeewo onɔ, koni shikpɔŋ lɛ atsɔ onɔ; beni aaafolɔ mɛi fɔji lɛ, ooona.”

Nɛkɛ wiemɔi nɛɛ tsɔ̃ɔ akɛ, hegbɛ yɛ akɛ aaanyɛ ahere oyiwala kɛtsɔ amanehulu ni da fe fɛɛ eko ni eba adesai anɔ pɛŋ lɛ mli. Nyɔŋmɔ kɛ nɔ ni wɔbaahala eha wɔ. Hewalɛwoo wiemɔi ni Mose kɛwo Israelbii lɛ ŋaa beni amɛsaa amɛhe koni amɛbote Shiwoo Shikpɔŋ lɛ nɔ lɛ hu kɔɔ wɔhe ŋmɛnɛ: “Mikɛ wala kɛ gbele, jɔɔmɔ kɛ loomɔ eshwie nyɛhiɛ; no hewɔ lɛ kɔ wala, koni bo kɛ oseshi fɛɛ ayi aná wala.” (5 Mose 30:19) Shi, mɛɛ gbɛ nɔ mɔ ko aaatsɔ ‘akɔ wala’ koni ahere eyiwala? Mɛni ji nɔ ni anɔkwa yiwalaheremɔ tsɔ̃ɔ diɛŋtsɛ?

[He ni Mfoniri ni yɔɔ baafa 2 lɛ Jɛ]

[He ni Mfoniri ni yɔɔ baafa 3 lɛ Jɛ]

Yunhap News Agency/Sipa Press