Maŋtsɛyeli Jajelɔi Bɔ Amaniɛ

Tsuishiŋmɛɛ Kɛ Nyɔŋmɔ Jɔɔmɔ Baa yɛ Malawi

YOSEF ji Yehowa anɔkwa tsulɔ. (Hebribii 11:22) Eji nuu ko ni yɔɔ tsuishiŋmɛɛ ni nɔ bɛ hu. Eyɛ mli akɛ Yosef diɛŋtsɛ nyɛmimɛi lɛ kpa yɛ esɛɛ, ahɔɔ lɛ shii enyɔ awo nyɔŋyeli mli, ni sɛɛ mli lɛ awo lɛ tsuŋ yɛ amale naafolɔmɔi anaa moŋ, shi ewerɛ hooo ehe. Shi moŋ, ekɛ tsuishitoo ŋmɛ etsui shi afii babaoo yɛ amanehulu mli, ni ekɛ heshibaa mɛ Yehowa jɔɔmɔ.—1 Mose 37:23-28, 36; 39:11-20.

Nakai nɔŋŋ ŋmɛnɛ, Yehowa Odasefoi ni yɔɔ Malawi lɛ kɛ tsuishitoo emɛ Nyɔŋmɔ jɔɔmɔ. Nɛkɛ Kristofoi Odasefoi nɛɛ kɛ afii 26 eŋmɛ amɛtsui shi yɛ amɛnitsumɔ ni nɔyeli lɛ gu, shitee-kɛ-woo ni naa wa, kɛ amanehului babaoo mli. Shi sɛɛnamɔ eba amɛtsuishiŋmɛɛ lɛ he!

Beni yiwaa je shishi yɛ Malawi kɛmiiya afi 1967 naagbee lɛ, no mli lɛ Maŋtsɛyeli shiɛlɔi aaafee 18,000 yɔɔ jɛmɛ. Susumɔ bɔ ni Odasefoi lɛ baaná miishɛɛ aha, beni amɛná amɛle akɛ afi 1997 sɔɔmɔ afi lɛ kɛ shiɛlɔi ayifalɛ hee ni ji 38,393 je shishi lɛ he okwɛ—nɔ ni fa fe amɛyifalɛ lɛ toi enyɔ ni yɔɔ beni agu amɛnitsumɔ lɛ! Kɛfata he lɛ, mɛi ni tee “Nyɔŋmɔ Toiŋjɔlɛ He Bɔfoi” a-Kpokpaa Wulu nɔ Kpeei 13 ni afee yɛ Malawi lɛ tee hiɛ fe 117,000. Lɛɛlɛŋ, Yehowa ejɔɔ amɛnɔkwayeli kɛ tsuishiŋmɛɛ lɛ nɔ.

Jɔɔmɔ nɛɛ he nɔkwɛmɔnɔ ko ji gbekɛ nuu ko ni eye afii 14 ni atsɛɔ lɛ Machaka lɛ niiashikpamɔ. Beni Machaka kpɛlɛ Biblia lɛ ni Yehowa Odasefoi lɛ kɛɛ amɛkɛ lɛ baakase lɛ nɔ lɛ, egbá efɔlɔi lɛ anaa waa. Amɛkɛɛ akɛ: “Kɛ oosumɔ ni otsɔ Odasefonyo lɛ, belɛ shĩ shia ni oya.” Shi kɛlɛ nɛkɛ hegbeyeiwoo nɛɛ ejeee enijiaŋ wui yɛ nii ni eeeya nɔ ekase lɛ mli. Nɔ ni jɛ mli ba ji akɛ, Machaka fɔlɔi shɔ̃ etadei fɛɛ yɛ edɛŋ. Nyɛmimɛi lɛ tsu enɛ he nii kɛtsɔ ekrokomɛi babaoo ni amɛhe amɛha lɛ lɛ nɔ. Beni Machaka fɔlɔi ná amɛle enɛ lɛ, amɛkɛɛ lɛ akɛ: “Kɛ Odasefoi lɛ baaye amɛbua bo lɛ, belɛ esa akɛ oshĩ biɛ ni okɛ amɛ ayahi shi.” Beni Machaka esusu sane lɛ he jogbaŋŋ sɛɛ lɛ, eshĩ shia, ni Odasefoi aweku ko ni yɔɔ asafo ni yɔɔ jɛmɛ lɛ mli lɛ ha ekɛ amɛ bahi shi.

Machaka fɔlɔi lɛ amli wo la aahu akɛ amɛkpɛ amɛyiŋ akɛ amɛbaashĩ akutso lɛ mli bɔni afee ni amɛkɛ Odasefoi lɛ akaná sharamɔ ko kwraa. Yɛ anɔkwale mli lɛ, enɛ gba Machaka naa, shi emii shɛ ehe babaoo beni nyɛmimɛi lɛ kɛ lɛ gba Lala 27:10 he sane, ní kɛɛ akɛ: “Shi mitsɛ kɛ minyɛ eshi mi moŋ, shi Yehowa hereɔ mi atuu.”

Etsɛɛɛ ni shidaamɔ ni Machaka fɔlɔi kɔ lɛ naa ba shi, ni ekpɛ eyiŋ akɛ ebaaku esɛɛ kɛya shia. Eyɛ faŋŋ akɛ amɛbinuu lɛ fai shi ni etswa akɛ ebaasɔmɔ Yehowa lɛ ná amɛnɔ hewalɛ waa diɛŋtsɛ, ejaakɛ amɛ hu amɛbasumɔ akɛ Yehowa Odasefoi kɛ amɛ aaakase Biblia lɛ! Amɛtee “Nyɔŋmɔ Toiŋjɔlɛ He Bɔfoi” a-Kpokpaa Wulu nɔ Kpee lɛ gbii etɛ lɛ fɛɛ hu, ni no sɛɛ lɛ etsirɛ amɛ ni amɛjaje akɛ: “Lɛɛlɛŋ, Nyɔŋmɔ gbɛjianɔtoo lɛ nɛ.”

Hɛɛ, ekolɛ shitee-kɛ-woo baafee kaa ni naa wa, shi Nyɔŋmɔ anɔkwa bɔfoi anijiaŋ ejeee wui. Amɛkɛ ekãa yaa amɛhiɛ, ejaakɛ amɛle akɛ “amanehulu lɛ tsɛ́ɔ tsuishiŋmɛɛ kɛbaa, ni tsuishiŋmɛɛ lɛ hu tsɛ́ɔ nɔkpɛlɛmɔ kɛbaa.” (Romabii 5:3, 4, NW) Yehowa Odasefoi ni yɔɔ Malawi lɛ baanyɛ aye odase yɛ gbɛ ni ja nɔ akɛ tsuishiŋmɛɛ kɛ Nyɔŋmɔ jɔɔmɔ baa.