Mɛɛ Wɔsɛɛ Shihilɛ Otaoɔ Kɛhaa Obii?

ANI osusuɔ obii lɛ ahe akɛ amɛji gboshinii ko ni jara wa waa diɛŋtsɛ? (Lala 127:3) Aloo osusuɔ akɛ amɛkwɛmɔ ji tɔlɛ yɛ shika gbɛfaŋ ní omanyeyeli he hiɛnɔkamɔ ko kwraa bɛ mli? Yɛ nɔ̃ najiaŋ ni gbekɛbii akwɛmɔ aaafee nɔ ni kɛ shika baa moŋ lɛ, ebafee nɔ ni afiteɔ shika yɛ mli aahu kɛyashiɔ amɛ diɛŋtsɛ amɛnyɛɔ amɛkwɛɔ amɛhe. Taakɛ ebiɔ ni ato gbɛjianɔ jogbaŋŋ ni akɛbu nɔ ko ni aná lɛ he lɛ, nakai nɔŋŋ eji, kɛ́ aaaye omanye yɛ fɔlɔi anitsumɔ mli.

Fɔlɔi ni kwɛɔ amɛbii jogbaŋŋ lɛ miisumɔ ni amɛha amɛje shihilɛ shishi jogbaŋŋ. Eyɛ mli akɛ nibii fɔji kɛ saji ni yɔɔ mɔbɔ waa baaba yɛ jeŋ nɛŋ moŋ, shi fɔlɔi baanyɛ afee babaoo ni amɛkɛbu amɛshwiei lɛ ahe. Susumɔ Werner kɛ Eva ni atsĩ amɛtã yɛ sane ni tsɔ hiɛ lɛ mli lɛ ahe okwɛ.a

Be Mli ni Fɔlɔi Susuɔ Amɛbii Ahe Lɛɛlɛŋ

Werner bɔ amaniɛ akɛ, yɛ nɔ najiaŋ ni efɔlɔi aaaŋmɛ nibii agbɛ ni eya nɔ lɛ, amɛjie mɔ he susumɔ kpo amɛtsɔɔ yɛ anɔkwale mli yɛ nibii ni yaa nɔ yɛ skul lɛ he. “Mihiɛ sɔ ŋaawoi kpakpai ni amɛkɛha mi lɛ he waa diɛŋtsɛ, ni minuɔ he akɛ amɛsusuɔ mihe, ni amɛyeɔ amɛbuaa mi. Ákɛ fɔlɔi lɛ, amɛfee kpɛŋŋ waa, shi mile akɛ amɛji minanemɛi diɛŋtsɛ.” Ni kɛ́ skul nifeemɔ ha Eva fee basaa aahu akɛ ehao ni enyɛɛɛ ewɔ lɛ, efɔlɔi ni ji Francisco kɛ Inez hu kɛ lɛ gbaa sane bei saŋŋ, ni amɛyeɔ amɛbuaa lɛ bɔni afee ni ená hewalɛ ekoŋŋ yɛ jwɛŋmɔŋ kɛ mumɔŋ.

Mɛɛ gbɛ nɔ Francisco kɛ Inez tsɔ amɛbu amɛbii lɛ ahe, ni amɛsaa amɛ kɛha onukpatsɔmɔ shihilɛ? Ojogbaŋŋ, kɛjɛ beni gbekɛbii lɛ darako kwraa mli lɛ, fɔlɔi ni yɔɔ suɔmɔ nɛɛ haa amɛfataa amɛhe kɛtsuɔ nii daa gbi. Yɛ nɔ̃ najiaŋ ni Inez kɛ Francisco kɛ amɛ nanemɛi onukpai aaabɔ moŋ lɛ, amɛkɛ amɛbii lɛ yaa he fɛɛ he ni amɛyaa. Ákɛ fɔlɔi ni yɔɔ suɔmɔ lɛ, amɛkɛ gbɛtsɔɔmɔ kpakpa hu haa amɛbinuu kɛ biyoo lɛ. Inez kɛɔ akɛ: “Wɔtsɔɔ amɛ bɔ ni akulaa shia, ni amɛle bɔ ni alɛteɔ shika he, ni amɛ diɛŋtsɛ amɛkwɛ amɛtadei anɔ. Ni wɔyeɔ wɔbua amɛteŋ mɔ fɛɛ mɔ koni amɛhala nitsumɔ amɛha amɛhe, ni amɛŋmɛ pɛpɛɛpɛ yɛ amɛsɔ̃i kɛ mumɔŋ nibii amli.”

Kwɛ bɔ ni ehe hiaa akɛ nyɛaale nyɛbii lɛ, ni nyɛkɛ fɔlɔi agbɛtsɔɔmɔ aha! Nyɛhaa wɔsusua gbɛ̀i etɛ ni aaatsɔ nɔ atsu enɛ he nii: (1) Ye obua obii lɛ koni amɛhala heloonaa nitsumɔ ko ni sa; (2) saamɔ amɛ koni amɛkpee henumɔŋ nɔnyɛɛ ni baa yɛ skul kɛ nitsumɔhe lɛ naa; (3) tsɔɔmɔ amɛ bɔni amɛaafee koni amɛnyɛ amɛtsu amɛmumɔŋ hiamɔ nibii ahe nii.

Ye Obua Amɛ Koni Amɛhala Nitsumɔ ni Sa

Akɛni mɔ ko heloonaa nitsumɔ esaaa bɔ ni ekɛ eshika tsuɔ nii ehaa pɛ he, shi moŋ eheɔ ebe babaoo hu hewɔ lɛ, gbekɛ fɛɛ gbɛkɛ suɔmɔnaa nii ahe susumɔ kɛ amɛnyɛmɔi fata nitsumɔi kpakpai ni fɔlɔi tsuɔ lɛ ahe. Akɛni mɔ ko ni susuɔ nii ahe waa sumɔŋ ni etsɔ jatsu eha mɛi krokomɛi hewɔ lɛ, esa akɛ fɔlɔi kɛ hiɛdɔɔ asusu bɔ ni amɛbaanyɛ amɛsaa amɛbi lɛ koni enyɛ ekwɛ ehe kɛ weku hu. Ani ehe baahia ni obiyoo loo obinuu lɛ akase nitsumɔ ko bɔni afee ni ená shihilɛ ni sa? Ákɛ fɔlɔ ni susuɔ ebii ahe lɛɛlɛŋ lɛ, bɔɔ mɔdɛŋ be fɛɛ be koni oye obua obi lɛ ni ená sui kpakpai, tamɔ suɔmɔ ni anáa akɛ afee he mɔ ni tsuɔ nii waa, suɔmɔ mli ni ajɛɔ koni akase nii, kɛ nyɛmɔ ni ayɔɔ ni akɛ mɛi krokomɛi hiɔ shi jogbaŋŋ.

Susumɔ Nicole he okwɛ. Ekɛɔ akɛ: “Mifɔlɔi haa mifataa amɛhe kɛtsuɔ amɛ falefalefeemɔ nitsumɔ lɛ. Amɛwo mi ŋaa koni mikɛ minyɔmɔwoo lɛ eko aha kɛha shia lɛ kwɛmɔ, koni mikɛ nɔ ni baashwɛ lɛ ahe mi diɛŋtsɛ mihewɔ nibii aloo mikɛto. Enɛ ha minu he diɛŋtsɛ akɛ sɔ̃ kã minɔ, ni sɛɛ mli lɛ, miná he sɛɛ waa yɛ mishihilɛ mli.”

Nyɔŋmɔ Wiemɔ ni ji Biblia lɛ etsɔɔɔ heloonaa nitsumɔ pɔtɛɛ ni esa akɛ mɔ ko ahala. Shi moŋ ekɛ gbɛtsɔɔmɔ ni sa haa. Ákɛ nɔkwɛmɔnɔ lɛ, bɔfo Paulo kɛɛ akɛ: “Kɛ́ mɔ ko sumɔɔɔ akɛ etsuɔ nii lɛ, belɛ ekaye nii hu.” Beni eŋmaa wolo kɛyaha Kristofoi ni yɔɔ Tesalonika lɛ ekɛɛ hu akɛ: “Wɔnuɔ akɛ mɛi komɛi yɛ nyɛteŋ ni enyiɛɛɛ gbɛjianɔ, ni amɛtsuuu nii, shi moŋ tsoŋtsoŋ amɛnyiɛɔ. Nɛkɛ mɛi nɛɛ wɔmiiwo amɛ kita ni wɔmiiwo amɛ ŋaa yɛ wɔ-Nuntsɔ Yesu Kristo mli akɛ amɛtsu nii dioo ni amɛye amɛ diɛŋtsɛ amɛdeŋ ŋmaa.”—2 Tesalonikabii 3:10-12.

Shi kɛlɛ, jeee nitsumɔ ni aaaná kɛ shika ni aaaná lɛ ji nɔ pɛ ni yɔɔ shihilɛ mli. Yɛ naagbee lɛ, etamɔ nɔ ni nakai gbɔmɛi ni tiuɔ nii asɛɛ babaoo lɛ amii shɛɛɛ nii ni amɛyɔɔ lɛ he, ni ekolɛ, amɛbaana akɛ ‘amɛmiihaku kɔɔyɔɔ.’ (Jajelɔ 1:14) Yɛ nɔ najiaŋ ni fɔlɔi aaawo amɛbii lɛ hewalɛ ni amɛha ale amɛ waa, ni amɛná nii babaoo moŋ lɛ, amɛfeɔ jogbaŋŋ moŋ akɛ amɛyeɔ amɛbuaa amɛ ni amɛnaa nilee ni yɔɔ bɔfo Yohane wiemɔi ni jɛ mumɔŋ lɛ akɛ: “Nyɛkasumɔa je lɛ aloo nibii hu ni yɔɔ je lɛŋ. Kɛji mɔ ko miisumɔ je lɛ, belɛ tsɛ lɛ suɔmɔ lɛ bɛ emli; ejaakɛ nɔ fɛɛ nɔ ni yɔɔ je lɛŋ lɛ, heloo lɛ sɛɛdiinii lɛ kɛ hiŋmɛii lɛ asɛɛdiinii lɛ kɛ shihilɛ lɛ mli hewoo lɛ, ejɛɛɛ tsɛ lɛ mli, shi moŋ je lɛ mli ejɛ; ni je lɛ hoɔ eyaa kɛ emli sɛɛdiinii lɛ; shi mɔ ni feɔ Nyɔŋmɔ suɔmɔnaa nii lɛ hiɔ shi kɛyaa naanɔ.”—1 Yohane 2:15-17.

Mɛɛ Gbɛ Nɔ Obaanyɛ Otsɔ Otsu Amɛhenumɔŋ Hiamɔ Nii Ahe Nii?

Ákɛ fɔlɔ lɛ, mɛni hewɔ ofeee ohe tamɔ mɔ ko ni tsɔseɔ akaŋshilɔi? Egbalaaa ejwɛŋmɔ kɛyaaa gbɔmɔtsoŋ nyɛmɔi ni ji foijee oya aloo nɔ ko ni kwɔ waa ni ekaŋshilɔi lɛ aaanyɛ ahuru kɛteke lɛ anɔ pɛ kɛkɛ. Etamɔ nɔ ni ebɔɔ mɔdɛŋ hu koni eye ebua amɛ ni amɛye jwɛŋmɔi ni ejaaa fɛɛ nɔ kunim, ni kɛtsɔ enɛ nɔ lɛ, ekanyaa amɛ henumɔŋ nyɛmɔi. Yɛ ogbɛfaŋ lɛ, mɛɛ gbɛ nɔ obaanyɛ otsɔ owo obii lɛ hewalɛ, otswa amɛ oma shi, ni okanya amɛ?

Susumɔ Rogério ni ji gbekɛ ni eye afii 13 lɛ he okwɛ. Kɛfata naagbai ni ená yɛ gbɔmɔtsoŋ tsakemɔ mli hewɔ lɛ he lɛ, ehao yɛ henumɔŋ, yɛ ekomefeemɔ ni bɛ efɔlɔi ateŋ, ni amɛkwɛɛɛ lɛ lɛ hewɔ. Mɛni abaanyɛ afee aha gbekɛbii ni tamɔ lɛ? Eyɛ mli akɛ onyɛŋ obu obii lɛ ahe kɛjɛ yeyeeyefeemɔi kɛ nibii fɔji ni náa mɔ nɔ hewalɛ lɛ fɛɛ he moŋ, shi kaaŋmɛɛ hegbɛ ni oyɔɔ akɛ fɔlɔ lɛ he kɔkɔɔkɔ. Eyɛ mli akɛ esaaa ni ofeɔ kpɛŋŋ yɛ amɛnɔ moŋ, shi tsɔsemɔ obii lɛ kɛ nilee, ni okai daa gbi akɛ, esoro gbekɛbii lɛ fɛɛ kɛ amɛsu. Kɛtsɔ mlihilɛ kɛ suɔmɔ kpojiemɔ nɔ lɛ, obaanyɛ ofee babaoo ni oha gbekɛ lɛ anu he akɛ eyɛ shweshweeshwe. Enɛ hu baaha eda, ni efeŋ ehe mɔ ni bɛ ekãa kɛ mɔ ni abuuu.

Ekɔɔɔ he eko bɔ ni bo diɛŋtsɛ ofɔlɔi nyɛ amɛtsu ohenumɔŋ hiamɔ nii ahe nii amɛha, nibii etɛ yɛ ni baaye ebua bo ákɛ fɔlɔ ni yeɔ ebuaa mɔ lɛɛlɛŋ: (1) Kaaha bo diɛŋtsɛ onaagbai ahe nitsumɔ miihe obe fɛɛ, ni oku ohiɛ ofɔ̃ obii lɛ anaagbai ni kɛ akɛto he lɛ edaaa lɛ nɔ; (2) bɔɔ mɔdɛŋ ni okɛ amɛ aná sanegbaa ni ŋɔɔ ni shishinumɔ yɔɔ mli daa; (3) ha su kpakpa ni kɔɔ bɔ ni atsuɔ naagbai ahe nii ahaa, kɛ bɔ ni akɛ gbɔmɛi yeɔ haa lɛ aya hiɛ.

Kɛ Birgit miisusu beni eji gbekɛ ni eye afii nyɔŋma kɛ etɛ kɛyaa lɛ he lɛ ekɛɔ akɛ: “Ehe bahia ni makase akɛ, onyɛŋ otsake gbɔmɛi ni amɛtsɔmɔ tamɔ bɔ ni osumɔɔ. Minyɛ kɛ mi susu nii ahe ni ekɛɛ mi akɛ, kɛ́ mina nɔ ko ni misumɔɔɔ yɛ mɛi krokomɛi ahe lɛ, nɔ ni manyɛ mafee ji, ni mikatamɔ amɛ. Ekɛɛ hu akɛ, be mli ni miji gbekɛ nɛɛ ji be ni hi fe fɛɛ ni manyɛ matsake.”

Shi kɛlɛ, babaoo he miihia obii lɛ fe nitsumɔ kɛ henumɔ ni yɔɔ shiŋŋ. Bi ohe akɛ, ‘Ani minaa fɔlɔi anitsumɔ akɛ eji sɔ̃ ni Nyɔŋmɔ kɛha?’ Kɛ onaa lɛ nakai lɛ, belɛ obaasumɔ ni osusu obii lɛ amumɔŋ hiamɔ nii ahe.

Gbɛi Anɔ ni Aaatsɔ Atsu Amɛmumɔŋ Hiamɔ Nii Ahe Nii

Yesu Kristo wie yɛ e-Gɔŋ nɔ Shiɛmɔ lɛ mli akɛ: “Miishɛɛ ji mɛi ni hiɛ yɔɔ amɛmumɔŋ hiamɔ nii anɔ lɛ, ejaakɛ amɛnɔ ji ŋwɛi maŋtsɛyeli lɛ.” (Mateo 5:3, NW) Mɛni fata mumɔŋ nibii ni aaatsu he nii lɛ he? Kɛ́ fɔlɔi fee Yehowa Nyɔŋmɔ mli hemɔkɛyeli kpojiemɔ he nɔkwɛmɔnɔ kpakpa amɛfɔ̃ shi lɛ, gbekɛbii náa he sɛɛ babaoo diɛŋtsɛ. Bɔfo Paulo ŋma akɛ: “Kɛ́ hemɔkɛyeli bɛ lɛ, anyɛŋ Nyɔŋmɔ hiɛ asa; ejaakɛ mɔ ni baa Nyɔŋmɔ ŋɔɔ lɛ, ja ehe eye akɛ eyɛ, ni eji mɛi ni taoɔ esɛɛgbɛ lɛ anyɔmɔwolɔ hu.” (Hebribii 11:6) Sɔlemɔ he miihia, kɛji akɛ shishinumɔ diɛŋtsɛ aaaba hemɔkɛyeli he. (Romabii 12:12) Kɛ́ okpɛlɛ bo diɛŋtsɛ omumɔŋ hiamɔ nii anɔ lɛ, belɛ obaatao ŋwɛi gbɛtsɔɔmɔ, taakɛ gbekɛ ni batsɔ Israel Kojolɔ Samson ni ale lɛ waa lɛ tsɛ fee lɛ. (Kojolɔi 13:8) Jeee sɔlemɔ pɛ obaasɔle, shi moŋ obaabote Nyɔŋmɔ Wiemɔ ni jɛ mumɔŋ ni ji Biblia lɛ mli kɛha yelikɛbuamɔ.—2 Timoteo 3:16, 17.b

Yɛ nitsumɔ ni wa ni yɔɔ gbɛtsɔɔmɔ kpakpa, sɛɛfimɔ yɛ henumɔŋ kɛ mumɔŋ yelikɛbuamɔ ni akɛaaha lɛ mli lɛ fɛɛ sɛɛ lɛ, fɔlɔi anitsumɔ baanyɛ afee nɔ ni nyɔmɔwoo yɔɔ mli. Tsɛ ko ni yɔɔ Brazil ni yɔɔ bii enyɔ lɛ kɛɔ akɛ: “Minyɛɛɛ makai be ko po ni mibii lɛ bɛ mimasɛi. Nibii kpakpai pii yɛ ni wɔbaanyɛ wɔkɛ amɛ aná mli gbɛfaŋnɔ.” Beni gbekɛbii lɛ anyɛ tsɔɔ nɔ hewɔ ni gbekɛbii lɛ shwereɔ lɛ, ekɛfata he akɛ: “Wɔbuaa wɔhe naa daa gbi, ni wɔbɔɔ mɔdɛŋ koni wɔha nibii afee miishɛɛ waa. Ni nɔ ni fe fɛɛ lɛ, wɔsɔleɔ wɔhaa gbekɛbii lɛ daa gbi.”

Priscilla kaiɔ suɔmɔ kɛ tsuishitoo ni efɔlɔi jieɔ kpo amɛtsɔɔ lɛ be fɛɛ be ni enáa naagba lɛ. Ekɛɛ akɛ: “Amɛji minanemɛi diɛŋtsɛ, ni amɛyeɔ amɛbuaa mi yɛ nɔ fɛɛ nɔ mli. Ákɛ gbekɛ lɛ minu he yɛ anɔkwale mli akɛ aakwɛ mi tamɔ ‘gboshinii ni jɛ Yehowa ŋɔɔ.’ ” (Lala 127:3) Taakɛ fɔlɔi krokomɛi pii feɔ lɛ, mɛni hewɔ okɛ obii lɛ etooo be he gbɛjianɔ koni nyɛfee ekome kɛkane Biblia lɛ kɛ Kristofoi awoji? Ní aaasusu Biblia mli saji kɛ shishitoo mlai lɛ ahe yɛ shihilɛ kpakpa mli lɛ, baanyɛ aye abua obii lɛ koni amɛfee ekãa, ni amɛná hiɛnɔkamɔ diɛŋtsɛ kɛha wɔsɛɛ be.

Be Mli ni Gbekɛbii Fɛɛ Baahi Shi Shweshweeshwe

Eyɛ mli akɛ aleee nɔ ni baaba gbekɛbii pii ni yɔɔ ŋmɛnɛ lɛ anɔ yɛ wɔsɛɛ be mli moŋ, shi Nyɔŋmɔ Wiemɔ lɛ maa nɔ mi akɛ, etsɛŋ ni shikpɔŋ lɛ baafee shia ni yɔɔ shweshweeshwe kɛha adesai. Bo lɛ susumɔ bɔ ni jeŋ hee ni Nyɔŋmɔ ewo shi yɛ he lɛ baatamɔ aha lɛ he okwɛ, be mli ni ehe ebahiaŋ ni fɔlɔi aye amɛtsui yɛ amɛbii lɛ ashweshweeshwe shihilɛ he lɛ! (2 Petro 3:13) Bo lɛ feemɔ tamɔ oofee gbalɛ nɛɛ mlibaa ni da waa lɛ he mfoniri yɛ ojwɛŋmɔ mli: “Klaŋ kɛ gwantɛŋbi aaahi shi, ni kootsɛ kɛ abotiabi aaabu shi; ni tsinabi kɛ jatabi kɛ kooloo ni ewo fɔ fɛɛ aaahi hekome, ni gbekɛ bibioo aaakpala amɛ.” (Yesaia 11:6) Ŋmɛnɛ po, mumɔŋ shweshweeshwe shihilɛ ni atsɔɔ mli yɛ nɛkɛ wiemɔi nɛɛ amli lɛ ená emlibaa yɛ okadi gbɛ nɔ yɛ gbɔmɛi ni jáa Yehowa lɛ ateŋ. Obaanu Nyɔŋmɔ suɔmɔ kwɛmɔ lɛ he yɛ amɛteŋ. Kɛ́ ojie suɔmɔ kɛha Nyɔŋmɔ kpo lɛ, no lɛ, obaanyɛ oná nɔmimaa akɛ enuɔ bɔ ni onuɔ nii ahe ohaa lɛ shishi ákɛ fɔlɔ, ni ebaaye ebua bo koni okpee yeyeeyefeemɔi kɛ kaai ni baanyɛ aba ogbɛ nɔ lɛ naa. Kasemɔ e-Wiemɔ lɛ, ni oŋɔ ohiɛ ofɔ̃ e-Maŋtsɛyeli lɛ nɔ.

Ye obua obii lɛ koni amɛnyiɛ naanɔ wala gbɛ lɛ nɔ, kɛtsɔ nɔkwɛmɔnɔ kpakpa ni ooofee ofɔ̃ shi lɛ nɔ. Kɛ́ oyaba Yehowa Nyɔŋmɔ abo lɛ, bo kɛ obii lɛ awɔsɛɛ shihilɛ baaya hiɛ fe bɔ ni okpaa gbɛ. Obaanyɛ oná hekɛnɔfɔɔ ni lalatsɛ lɛ ná lɛ pɛpɛɛpɛ, mɔ ni la akɛ: “Omii ashɛ Yehowa he, ni eeehao nii ni otsui taoɔ lɛ.”—Lala 37:4.

[Shishigbɛ niŋmai]