Ani Obaanyɛ Ole Srɔtofeemɔ ni Yɔɔ Ekpakpa kɛ Efɔŋ Teŋ?

“Mi diɛŋtsɛ migbe gbɔmɛi aaafee 25. . . . Ehe mfonirifeemɔ bayiɔ mijwɛŋmɔŋ daa gbɛkɛ, daa gbi. Milàa lamɔi gbeyeigbeyei. . . . Miyaa he ko ni minyɛɔ minaa mɔ ko, ni ekaiɔ mi gbɔmɛi ni migbe amɛ lɛ. Minyɛɔ minaa lɛ jogbaŋŋ diɛŋtsɛ, tamɔ nɔ ni ŋmɛnɛ nɔŋŋ mifee, bianɛ nɔŋŋ. . . . Minyɛŋ mikɛ nibii ni mifee lɛ he nɔsha lɛ ake mihe.”—V.S.

“Akɛ fãmɔ ha mi akɛ miya jɛmɛ koni miyakpata henyɛlɔ lɛ hiɛ. . . . Mitaaa shi ni masusu he akɛ amɛji hii, yei kɛ gbekɛbii. . . . Minu he yɛ nakai beaŋ ni amrɔ nɛɛ minuɔ he lolo akɛ, mifee taakɛ afã mi lɛ, ni mitsu fãmɔi ni akɛha mi lɛ he nii, ni minuuu he akɛ mitɔ̃ akɛ mifee nakai.”—W.C.

YƐ March 16, afi 1968 lɛ, hii enyɔ ni atsĩ amɛ tã kɛtsɔ hiɛ lɛ kɛ amɛhe wo nɔ ni abaanyɛ atsɛ yɛ sɛɛ mli akɛ eji tawuu mli awuiyeli ni shwieɔ mɔ hiɛaŋ shi lɛ mli. Amɛ kɛ asraafoi krokomɛi hu bote Vietnambii akrowa bibioo ko mli ni amɛgbe mɛi ohai abɔ ni jeee asraafoi—ni yei, gbekɛbii, kɛ hii onukpai fata he. Shi kadimɔ srɔtofeemɔ ni yɔɔ bɔ ni asraafoi enyɔ nɛɛ fee amɛnii yɛ he amɛha lɛ mli. Nɔ ni klɛŋklɛŋ asraafonyo lɛ fee lɛ haoɔ lɛ waa diɛŋtsɛ yɛ faŋŋ mli. Mɔ ni ji enyɔ lɛ nuɔ he akɛ esane ja yɛ mla naa. Te eba lɛ tɛŋŋ ni gbɔmɛi enyɔ ni efee nɔ kome too lɛ nɔŋŋ lɛ nuɔ he nakai yɛ gbɛ̀i srɔtoi anɔ lɛ?

Hetoohamɔ lɛ kɔɔ henilee he—jwɛŋmɔŋ nyɛmɔ ni Nyɔŋmɔ kɛha ni yeɔ ebuaa koni wɔkwɛ bɔ ni wɔyɔɔ lɛ jogbaŋŋ diɛŋtsɛ, ni ekojoɔ wɔ yɛ wɔnifeemɔi kɛ wɔyiŋtoi ahewɔ. Henilee ji ekpakpa kɛ efɔŋ henumɔ ni yɔɔ wɔmli.

Kɛ mɛi komɛi miikpɛ amɛyiŋ yɛ nɔ ko he lɛ, amɛtsɔɔ amɛhe kɛyaa abɛbua nɛɛ nɔ, ni ji, “Ha ohenilee afee ogbɛtsɔɔlɔ.” Shi, mɔbɔ sane ji akɛ, anyɛɛɛ akɛ he afɔ̃ henilee lɛ nɔ be fɛɛ be. Yɛ anɔkwale mli lɛ, mɛi babaoo ekpɛlɛ yiwalɛ nifeemɔi ni yɔɔ gbeyei waa nɔ ni amɛkɛ amɛhe ewo mli po, ni amɛhenileei gbako amɛnaa kwraa. (Yohane 16:2; Bɔfoi lɛ Asaji 8:1) Taakɛ Ŋleshi adesã woji aŋmalalɔ Samuel Butler wie be ko lɛ, henilee lɛ “kpaa mɛi ni sumɔɔɔ ni amɛnuɔ lɛ kɛ wiemɔ amrɔ nɔŋŋ.”

Ani obaanyɛ okɛ ohe afɔ̃ ohenilee nɔ? Hetoohamɔ lɛ damɔ bɔ ni atsɔse lɛ jogbaŋŋ aha lɛ nɔ titri, taakɛ sane ni nyiɛ sɛɛ lɛ baatsɔɔ lɛ.

[He ni Mfoniri ni yɔɔ baafa 3 lɛ Jɛ]

Upper war scene: U.S. Signal Corps photo