Ani Obaanyɛ Okɛ Ohe Afɔ̃ Ohenilee Nɔ?

YƐ SHIHILƐI ni hi jogbaŋŋ shishi lɛ, compass (tsɔne ni tsɔɔ mɔ gbɛ) lɛ bafeɔ dɛŋdade ni anyɛɔ akɛ he fɔ̃ɔ nɔ. Kɛ shikpɔŋ lɛ hewalɛ ni gbalaa nii kɛbaa lɛ tsɔɔ he ni esa akɛ emli abui lɛ atsɔɔ lɛ, bei pii lɛ etsɔɔ kooyigbɛ. No hewɔ lɛ, gbɛfãlɔi baanyɛ amɛkɛ amɛhiɛ afɔ̃ tsɔne ni tsɔɔ mɔ gbɛ lɛ nɔ kɛha gbɛtsɔɔmɔ, kɛ́ okadii bɛ shikpɔŋ nɔ ni baatsɔɔ amɛ gbɛ. Shi mɛni baaba, kɛ́ akɛ nɔ ko ni gbalaa nii kɛbaa fɔ̃ compass lɛ masɛi? Abui lɛ baaho kɛya nɔ ni gbalaa nii kɛbaa lɛ he moŋ fe nɔ ni eeetsɔɔ kooyigbɛ. Efeŋ gbɛtsɔɔmɔ ni anyɛɔ akɛ he fɔ̃ɔ nɔ dɔŋŋ.

Nɔ ko ni tamɔ nakai baanyɛ aba adesa henilee lɛ nɔ. Bɔlɔ lɛ kɛ jwɛŋmɔŋ nyɛmɔ nɛɛ wo wɔmli koni etsu nii akɛ gbɛtsɔɔmɔ ni anyɛɔ akɛ he fɔ̃ɔ nɔ. Akɛni abɔ wɔ yɛ Nyɔŋmɔ subaŋ nɔ hewɔ lɛ, bei pii lɛ, esa akɛ henilee lɛ akudɔ wɔ kɛtsɔ gbɛ ni ja lɛ nɔ kɛ́ ehe miihia ni wɔfee yiŋkpɛi. Esa akɛ etsirɛ wɔ koni wɔjie jeŋba he shishitoo tɛi ni Nyɔŋmɔ ewo lɛ kpo. (1 Mose 1:27) Bei pii lɛ, ebaa lɛ nakai. Ákɛ nɔkwɛmɔnɔ lɛ, Kristofonyo bɔfo Paulo ŋma akɛ, mɛi komɛi ni ajieko Nyɔŋmɔ mla lɛ atsɔko amɛ lɛ po “kɛ amɛfɔmɔŋ su lɛ tsuɔ mla naa nii.” Mɛni hewɔ? Ejaakɛ “amɛhenilee hu yeɔ odase.”—Romabii 2:14, 15.

Fɛɛ sɛɛ lɛ, jeee be fɛɛ be henilee lɛ wieɔ yɛ be mli ni esa akɛ ewie. Yɛ emuu ni adesa yeee hewɔ lɛ, wɔbafeɔ mɛi ni feɔ nii ni wɔle akɛ ejaaa. Paulo kpɛlɛ nɔ akɛ: “Mimligbɛ gbɔmɔ lɛ mii shɛɔ yɛ Nyɔŋmɔ mla lɛ he; shi minaa mla kroko yɛ mihenii lɛ amli ni kɛ mijwɛŋmɔ mla lɛ wuɔ ta ni eŋɔɔ mi nom ehaa esha mla lɛ ni yɔɔ mihenii lɛ amli lɛ.” (Romabii 7:22, 23) Kɛ bei pii lɛ wɔŋmɛɛ wɔhe wɔha susumɔi babaoo ni ejaaa lɛ, ekolɛ wɔhenilee lɛ hewalɛ lɛ naa baaba shi fiofio ni yɛ naagbee lɛ ebaakpa wɔ kɛɛmɔ akɛ jeŋba ni tamɔ nakai lɛ ejaaa.

Shi yɛ emuu ni ayeee lɛ fɛɛ sɛɛ lɛ, wɔbaanyɛ wɔha wɔhenilee kɛ Nyɔŋmɔ shishitoo tɛi ní efolɔ eshwie shi lɛ akpã gbee. Yɛ anɔkwale mli lɛ, ehe miihia ni wɔfee nakai. Jeee akɛ henilee ni he tse, ni atsɔse lɛ jogbaŋŋ lɛ haa mɔ náa ekɛ Nyɔŋmɔ teŋ wekukpaa ni miishɛɛ yɔɔ mli kɛkɛ, shi ehe miihia kɛha wɔyiwalaheremɔ. (Hebribii 10:22; 1 Petro 1:15, 16) Kɛfata he lɛ, henilee kpakpa baaye ebua wɔ koni wɔfee yiŋkpɛi ni nilee yɔɔ mli yɛ shihilɛ mli, ní baaha wɔná toiŋjɔlɛ kɛ miishɛɛ. Lalatsɛ lɛ wie gbɔmɔ ni yɔɔ henilee ni tamɔ nɛkɛ he akɛ: “E-Nyɔŋmɔ lɛ mla lɛ yɛ etsui mli; enajifamɔi lɛ eko eko shaneŋ.”—Lala 37:31.

Henilee lɛ Tsɔsemɔ

Nibii babaoo fata henilee lɛ tsɔsemɔ he fe mlai ni ato naa sɛrɛnɛɛ ni aaakase awo yitsoŋ kɛkɛ, koni no sɛɛ lɛ akpɛtɛ nomɛi ahe gbagbalii. Nakai ji nɔ ni Farisifoi ni yɔɔ Yesu gbii lɛ amli lɛ fee. Nɛkɛ jamɔŋ hiɛnyiɛlɔi nɛɛ le Mla lɛ ni amɛfee blema saji babaoo ni asusuɔ akɛ ebaaye ebua gbɔmɛi lɛ koni amɛkatɔ̃ Mla lɛ nɔ. No hewɔ lɛ, amɛfee oya ni amɛwie amɛshi Yesu kaselɔi lɛ beni amɛkumɔ abele yɛ Hejɔɔmɔ Gbi lɛ nɔ, ní amɛye emli nii lɛ. Ni amɛwie amɛshi Yesu yɛ Hejɔɔmɔ Gbi lɛ nɔ beni etsá nuu ko ni enine egbo lɛ. (Mateo 12:1, 2, 9, 10) Taakɛ Farisifoi ablemasane lɛ tsɔɔ lɛ, nifeemɔi enyɔ nɛɛ fɛɛ feɔ kita lɛ mli nɔ ni ji ejwɛ lɛ mlikuu.—2 Mose 20:8-11.

Eka shi faŋŋ akɛ, Farisifoi lɛ kase Mla lɛ. Shi ani amɛhenileei kɛ Nyɔŋmɔ shishitoo tɛi ní efolɔ eshwie shi lɛ kpãa gbee? Dabida! Shi beni Farisifoi lɛ wie amɛshi lɛ yɛ gbɛ ni ejaaa nɔ yɛ nɔ ni amɛsusu akɛ eji Hejɔɔmɔ Gbi lɛ mla lɛ mlikuu ni mli wa lɛ sɛɛ nɔŋŋ pɛ lɛ, amɛtee Yesu yinɔ apam “bɔ ni amɛaafee ni amɛkpata ehiɛ.” (Mateo 12:14) Susumɔ he okwɛ—nɛkɛ jamɔŋ hiɛnyiɛlɔi ni feɔ amɛhe jalɔi nɛɛ fee kpɛŋŋ yɛ abele ŋmɔ́ŋ ni aku ni aye kɛ tsá ni atsá mɔ yɛ Hejɔɔmɔ Gbi nɔ lɛ hewɔ; shi nɔ ko kwraa gbaaa amɛnaa yɛ Yesu ni amɛtee eyinɔ apam koni amɛgbe lɛ lɛ he!

Osɔfonukpai lɛ jie susumɔ ni ekɔdɔ ni tamɔ nakai nɔŋŋ kpo. Nɛkɛ hii ni bɛ jeŋba nɛɛ nuuu fɔyeli bibioo ko kwraa he beni amɛjie jwiɛtɛi kukuji 30 kɛjɛ sɔlemɔwe lɛ shikatoohe lɛ mli ni amɛkɛha Yuda koni etsɔɔ Yesu sɛɛgbɛ lɛ. Shi beni Yuda kɛ shika lɛ ku sɛɛ kɛtee ni akpaaa gbɛ, ni eyashɛrɛ eshwie sɔlemɔwe lɛ, osɔfonukpai lɛ gba amɛnaa yɛ mla ko hewɔ. Amɛkɛɛ: ‘Ejaaa akɛ aŋɔɔ [kapɛji lɛ] awoɔ (sɔlemɔwe lɛ) nitoohe lɛ mli; ejaakɛ lá-hemɔnii ni.’ (Mateo 27:3-6) Odaseyeli tsɔɔ akɛ, osɔfonukpai lɛ ehao akɛ Yuda shika lɛ he tseee dɔŋŋ. (Okɛto 5 Mose 23:18 he.) Ni kɛlɛ, nɛkɛ gbɔmɛi akuu nɛɛ nɔŋŋ enaaa nɔ fɔŋ ko kwraa yɛ shika ni afiteɔ ni akɛhe Nyɔŋmɔ Bi lɛ sɛɛgbɛtsɔɔmɔ lɛ!

Nyɔŋmɔ Susumɔ ni Wɔkɛaakpã Gbee

Nɔkwɛmɔnii ni yɔɔ yiteŋgbɛ lɛ tsɔɔ akɛ henilee lɛ tsɔsemɔ biɔ nɔ ni fe mlai ni awo ni aaaha eyi jwɛŋmɔ lɛ mli obɔ kɛkɛ. Akpɛlɛɔ nɔ akɛ, Nyɔŋmɔ mlai ahe nilee he miihia, ni amɛtoiboo he miihia kɛha yiwalaheremɔ. (Lala 19:8-12) Shi kɛlɛ, kɛfata Nyɔŋmɔ mlai ni wɔɔkase lɛ ahe lɛ, esa akɛ wɔha wɔtsui afee nɔ ni kɛ Nyɔŋmɔ susumɔ baakpã gbee. Kɛkɛ lɛ, wɔbaanyɛ wɔná Yehowa gbalɛ ni egba kɛtsɔ Yesaia nɔ lɛ mli niiashikpamɔ, he ni kɛɔ akɛ: “Ohiŋmɛii aaana [Otsɔɔlɔ Kpeteŋkpele lɛ, NW] ni otoii hu aaanu wiemɔ ko yɛ osɛɛ akɛ: Gbɛ lɛ nɛ! nyɛnyiɛa nɔ! ninejurɔgbɛ nyɛtsɔ jio, abɛkugbɛ nyɛtsɔ jio.”—Yesaia 30:20, 21; 48:17.

Yɛ anɔkwale mli lɛ, enɛ etsɔɔɔ akɛ kɛ wɔkɛ yiŋkpɛɛ ni mli wa waa kpe lɛ, gbee ko diɛŋtsɛ baakɛɛ wɔ nɔ ni esa akɛ wɔfee. Yɛ fɛɛ sɛɛ lɛ, kɛ́ wɔsusumɔ kɛ Nyɔŋmɔ susumɔ yɛ saji ahe lɛ kpãa gbee lɛ, ebaawaje wɔhenilee jogbaŋŋ koni eye ebua wɔ ní wɔfee yiŋkpɛi ni baasa ehiɛ.—Abɛi 27:11.

Susumɔ Yosef ni hi shi yɛ afii ohai 18 D.Ŋ.B. lɛ he okwɛ. Beni Potifar ŋa lɛ wo lɛ hewalɛ ni ekɛ lɛ afite gbala lɛ, Yosef ekpɛlɛɛɛ, ni ekɛɛ: “Te aaafee tɛŋŋ ni mafee efɔŋ kpeteŋkpele ni tamɔ nɛkɛ nɛɛ, ni mafee esha mashi Nyɔŋmɔŋ?” (1 Mose 39:9) Yɛ Yosef gbii lɛ amli lɛ, no mli lɛ mla ko kwraa bɛ ni aŋma ni jɛ Nyɔŋmɔ ŋɔɔ ni buɔ gbalafitemɔ nifeemɔ fɔ́. Kɛfata he lɛ, no mli lɛ Mizraim ji he ni Yosef yɔɔ, ni ejeee he ko kwraa ni ebaaná weku mli tsɔsemɔ loo blematsɛmɛi amlai kɛaajɛ. Belɛ, mɛni ye ebua Yosef ni ete shi eshi kaa lɛ mɔ̃? Yɛ kukufoo mli lɛ, ehenilee ni etsɔse lɛ jogbaŋŋ lɛ ni. Yosef ná Nyɔŋmɔ susumɔ ni tsɔɔ akɛ esa akɛ wu kɛ ŋa afee “heloo kome” lɛ. (1 Mose 2:24) No hewɔ lɛ, ena akɛ ejaaa akɛ aaaŋɔ nuu kroko ŋa. Yosef susumɔ lɛ kɛ Nyɔŋmɔ susumɔ yɛ sane lɛ he lɛ kpãa gbee. Gbalafitemɔ baafite ejeŋba henumɔ.

Gbɔmɛi fioo ko ni tamɔ Yosef yɔɔ ŋmɛnɛ. Bɔlɛnamɔ mli jeŋba shara efa babaoo, ni mɛi babaoo nuuu he akɛ gbɛnaa nii ko kwraa kã amɛnɔ kɛha amɛ Bɔlɔ, kɛ amɛhe, loo kɛha amɛ gbalashihilɛ mli hefatalɔi po koni amɛya nɔ amɛhi shi yɛ jeŋba hetsemɔ mli. Shihilɛ lɛ tamɔ nɔ ni atsɔɔ mli yɛ Yeremia wolo lɛ mli lɛ pɛpɛɛpɛ akɛ: “Mɔ ko mɔ ko bɛ ni shwaa ehe yɛ enifɔjianifeemɔ lɛ he akɛ: Mɛni mifee nɛɛ? mɔ fɛɛ mɔ ewó ŋmɔi tamɔ okpɔŋɔ shaa foi kitikiti kɛboteɔ ta mli.” (Yeremia 8:6) No hewɔ lɛ, ehe ebahia waa diɛŋtsɛ fe bei fɛɛ ni eho akɛ wɔnifeemɔ kɛ Nyɔŋmɔ susumɔ aaakpã gbee. Wɔyɛ gbɛjianɔtoo ni yɔɔ naakpɛɛ ni baaye ebua wɔ koni wɔfee nakai.

Yelikɛbuamɔ Kɛha Henilee lɛ Tsɔsemɔ

Ŋmalɛi ni jɛ mumɔŋ lɛ, “ehi ha nitsɔɔmɔ kɛ hiɛkãmɔ kɛ mɔsaamɔ kɛ tsɔsemɔ ni yɔɔ jalɛ mli lɛ, koni Nyɔŋmɔ gbɔmɔ lɛ aye emuu, ni asaa lɛ pɛpɛɛpɛ aha nitsumɔ kpakpa fɛɛ nitsumɔ kpakpa.” (2 Timoteo 3:16, 17) Biblia lɛ kasemɔ baaye ebua wɔ koni wɔtsɔse nɔ ni Biblia lɛ tsɛɔ lɛ akɛ ‘wɔhenumɔnii’ lɛ, bɔni afee ni wɔle srɔtofeemɔ ni yɔɔ ekpakpa kɛ efɔŋ teŋ. (Hebribii 5:14) Ebaaha wɔná suɔmɔ wɔha nibii ni Nyɔŋmɔ sumɔɔ, ni wɔná nyɛɛ wɔha nibii ni enyɛɛɔ lɛ.—Lala 97:10; 139:21.

Belɛ, oti ni ma hiɛ yɛ Biblia kasemɔ mli ji, koni aná shishinumɔ diɛŋtsɛ kɛ nɔ ni he hiaa diɛŋtsɛ yɛ anɔkwale lɛ mli moŋ, fe emli nilee babaoo ni aaaná kɛkɛ. Yɛ September 1, 1976 lɛ, The Watchtower ni je kpo lɛ kɛɛ: “Yɛ be mli ni wɔkaseɔ Ŋmalɛi lɛ, esa akɛ wɔbɔ mɔdɛŋ koni wɔná shishinumɔ ko ni tsɔɔ Nyɔŋmɔ jalɛsaneyeli, suɔmɔ kɛ jalɛ nifeemɔ ni wɔdu enɛɛmɛi wɔwo wɔtsuii amli tɔ̃ɔ bɔni afee ni amɛfee wɔgbɔmɔtso lɛ fã tamɔ niyenii kɛ mu ni amuɔ. Esa akɛ wɔbɔ mɔdɛŋ koni wɔhiɛ ahi wɔhe nɔ jogbaŋŋ diɛŋtsɛ yɛ gbɛnaa nii ni kã wɔnɔ yɛ jeŋba gbɛfaŋ lɛ he kɛtsɔ le ni wɔɔle nɔ ni ja kɛ nɔ ni ejaaa lɛ jogbaŋŋ diɛŋtsɛ. Nɔ ni fe enɛ lɛ, esa akɛ wɔha wɔhenilee anu gbɛnaa nii ni kã enɔ waa yɛ Mla-Halɔ kɛ Kojolɔ ni eye emuu lɛ gbɛfaŋ. (Yes. 33:22) No hewɔ lɛ, yɛ be mli ni wɔkaseɔ nibii ni kɔɔ Nyɔŋmɔ he lɛ, esa akɛ wɔbɔ mɔdɛŋ ni wɔkase lɛ yɛ wɔ shihilɛ fɛɛ mli.”

Ní Aaaná “Kristo Jwɛŋmɔ” Lɛ

Biblia lɛ kasemɔ hu baaye ebua wɔ koni wɔná “Kristo jwɛŋmɔ” lɛ, ni ji jwɛŋmɔŋ su ni tsɔɔ toiboo kɛ heshibaa ni Yesu jie lɛ kpo lɛ. (1 Korintobii 2:16) Etsɛ suɔmɔnaa nifeemɔ lɛ bafee miishɛɛ, jeee nifeemɔ ko kɛkɛ ni esa akɛ anyiɛ sɛɛ bɔ fɛɛ bɔ ni fee, ní niiahesusumɔ fataaa he. Lalatsɛ David tsɔɔ esubaŋ lɛ mli yɛ gbalɛ naa, mɔ ni ŋma akɛ: “Mi-Nyɔŋmɔ, eŋɔɔ minaa akɛ mafee osuɔmɔnaa nii ni omla lɛ yɛ mitsui mli.”a—Lala 40:9.

Ní aaaná “Kristo jwɛŋmɔ” lɛ he miihia kɛha henilee lɛ tsɔsemɔ. Beni Yesu yɔɔ shikpɔŋ nɔ akɛ gbɔmɔ ni eye emuu lɛ, ejie e-Tsɛ sui kɛ esubaŋ kpo etsɔɔ waa diɛŋtsɛ kɛyashi he ni ebaanyɛ akɛ adesa. No hewɔ lɛ, enyɛ ekɛɛ akɛ: “Mɔ ni ena mi lɛ, ena tsɛ lɛ.” (Yohane 14:9) Yɛ shihilɛ fɛɛ shihilɛ ni Yesu kɛkpe yɛ shikpɔŋ nɔ lɛ mli lɛ, efee bɔ ni e-Tsɛ taoɔ akɛ efee lɛ pɛpɛɛpɛ. No hewɔ lɛ, kɛ́ wɔkase Yesu shihilɛ he nii lɛ, belɛ wɔmiiná bɔ ni Yehowa Nyɔŋmɔ yɔɔ ha diɛŋtsɛ lɛ he shishinumɔ ni yɔɔ faŋŋ.

Wɔkaneɔ akɛ Yehowa ji “musuŋtsɔlɔ kɛ durolɔ ni toɔ tsui, ni mɔbɔnalɛ . . . fá pii.” (2 Mose 34:6) Yesu jie nɛkɛ sui nɛɛ akpo shii abɔ beni ekɛ ebɔfoi lɛ yeɔ lɛ. Beni amɛje ŋwane shii abɔ yɛ mɔ ni ji agbo fe fɛɛ yɛ amɛteŋ lɛ he lɛ, Yesu kɛ tsuishitoo tsɔɔ amɛ kɛtsɔ wiemɔ kɛ nɔkwɛmɔnɔ nɔ akɛ, “mɔ fɛɛ mɔ ni sumɔɔ akɛ etsɔ agbo yɛ nyɛteŋ lɛ, lɛ moŋ etsɔ nyɛsɔɔlɔ. Ni mɔ fɛɛ mɔ ni sumɔɔ akɛ etsɔ onukpa yɛ nyɛteŋ lɛ, lɛ moŋ etsɔ nyɛtsulɔ.” (Mateo 20:26, 27) Enɛ ji nɔkwɛmɔnɔ kome pɛ ni tsɔɔ akɛ wɔbaanyɛ wɔha wɔnifeemɔ kɛ Nyɔŋmɔ susumɔ akpã gbee kɛtsɔ Yesu wala shihilɛ hesusumɔ nɔ.

Kɛ wɔkase Yesu he nii babaoo lɛ, no baawaje wɔ jogbaŋŋ koni wɔkase wɔŋwɛi Tsɛ, Yehowa. (Efesobii 5:1, 2) Henilee ni kɛ Nyɔŋmɔ susumɔ kpãa gbee lɛ baakudɔ wɔ kɛya gbɛ ni ja lɛ nɔ. Yehowa wo mɛi ni kɛ amɛhiɛ fɔ̃ɔ enɔ lɛ shi akɛ: “Magbele ojwɛŋmɔ mli ni matsɔɔo gbɛ ni onyiɛ nɔ; mawoo ŋaa, mihiŋmɛi kã ohe.”—Lala 32:8.

Sɛɛnamɔ ni Jɛɔ Henilee ni Atsɔse Lɛ lɛ Mli Kɛbaa

Akɛni Mose le bɔ ni adesai ni yeee emuu lɛ duɔ gbɛ hewɔ lɛ, ebɔ Israelbii lɛ kɔkɔ akɛ: “Nyɛŋɔa nyɛtsuii nyɛfɔ̃a wiemɔi nɛɛ fɛɛ ni miye he odase mitsɔɔ nyɛ ŋmɛnɛ gbi nɛɛ lɛ nɔ, ní nyɛwo nyɛbii lɛ akita, ní amɛjwɛŋ nɛkɛ mla nɛɛ mli wiemɔi lɛ fɛɛ nɔ ní amɛye nɔ.” (5 Mose 32:46) Esa akɛ wɔ hu wɔŋma Nyɔŋmɔ mla lɛ wɔwo wɔtsuii amli. Kɛ wɔfee nakai lɛ, wɔhenilee lɛ baakudɔ wɔ najifaamɔi babaoo ni eye ebua wɔ koni wɔfee yiŋkpɛi ni ja.

Yɛ fɛɛ sɛɛ lɛ, esa akɛ wɔkwɛ jogbaŋŋ. Biblia abɛbua lɛ kɛɛ: “Gbɛ ko yɛ ni ja yɛ gbɔmɔ hiɛ; shi enaagbee lɛ gbele gbɛ̀i ni.” (Abɛi 14:12) Mɛni hewɔ enɛ baa lɛ nakai bei pii? Ejaakɛ, taakɛ Biblia lɛ tsɔɔ mli lɛ: “Tsui yɔɔ nɛɛ, eyi tɔ kɛ kutumpɔo fe nii fɛɛ, ni esane ehiii kwraa; namɔ aaanyɛ ale?” (Yeremia 17:9) No hewɔ lɛ, ehe miihia ni wɔ fɛɛ wɔbo ŋaawoo ni yɔɔ Abɛi 3:5, 6 lɛ toi akɛ: “Okɛ ohiɛ afɔ̃ Yehowa nɔ kɛ otsui fɛɛ, ni okɛ ohe akakpasa bo diɛŋtsɛ ojwɛŋmɔ; kaimɔ lɛ yɛ ogbɛ̀i fɛɛ mli, ni lɛ eeejaje otempɔŋi lɛ!”

[Shishigbɛ niŋmaa]

[Mfoniri ni yɔɔ baafa 7]

Taakɛ tsɔne ni tsɔɔ mɔ gbɛ ji lɛ, henilee ni Biblia etsɔse lɛ lɛ baanyɛ aha wɔnyiɛ gbɛ ni ja lɛ nɔ

[He ni Sane lɛ Jɛ]

Compass: Courtesy, Peabody Essex Museum, Salem, Mass.