Mɔ Fɛɛ Mɔ Miisumɔ Ni Eye ehe

“Afɔ́ gbɔmɔ akɛ mɔ ni yeɔ ehe, ni be fɛɛ be nɛɛ awo lɛ kɔsɔŋkɔsɔ,” French jeŋ nilelɔ Jean-Jacques Rousseau ŋma yɛ afi 1762 lɛ mli. Afɔ́ gbɔmɔ akɛ mɔ ni eye ehe. Mɛɛ susumɔ ni yɔɔ naakpɛɛ nɛ! Shi taakɛ Rousseau tsɔɔ mli lɛ, gbɔmɛi akpekpei abɔ ni ehi shi yɛ yinɔsane mli lɛ yeko amɛhe dã. Yɛ no najiaŋ lɛ, amɛhi shi moŋ ákɛ mɛi ni awo amɛ “kɔsɔŋkɔsɔ,” ní awo amɛ tsũŋ yɛ gbɛjianɔtoo ko ni haaa amɛná miishɛɛ ní amɛtsui anyɔ amɛmli daa yɛ shihilɛ mli lɛ mli.

ŊMƐNƐ, gbɔmɛi akpekpei abɔ miina lolo akɛ, “gbɔmɔ eye enaanyo gbɔmɔ nɔ ni ekɛye ehe awui.” (Jajelɔ 8:9) Yɛ be mli ni hii kɛ yei ni sumɔɔ ni amɛná nɔyeli hegbɛi lɛ tiuɔ sɛɛ lɛ, belɛ amɛyaa nɔ amɛsusuuu naagbai ni baajɛ mɛi krokomɛi aheyeli ni eeefite lɛ mli aba lɛ he kwraa po. Amaniɛbɔɔ ko tsɔɔ akɛ: “Gbɔmɔ gbelɔi akuu ko gbe gbɔmɛi 21.” Ni amaniɛbɔɔ kroko hu wie bɔ ni asraafoi “bamɔɔ” mɛi ni bɛ hefãmɔ nɔ̃ ko kwraa, ní ‘amɛgbeɔ yei, gbekɛbii, kɛ mɛi ni egbɔlɔ, ni amɛfolɔɔ amɛyitsei, ni amɛtswaa gboklɛfoi ayitsei tui, ni no sɛɛ lɛ, amɛkpataa akrowai ahiɛ, ni amɛtswaa okplɛmii kɛkɛ lɛ’ hu he.

Belɛ ebɛ naakpɛɛ mɔ akɛ, gbɔmɛi sumɔɔ waa ní yɛ anɔkwale mli lɛ, amɛwuu koni amɛye amɛhe kɛjɛ nɔnyɛɛ shihilɛ mli! Shi anɔkwale ko ni yɔɔ dɔlɛ ji akɛ, nɔ ni jɛɔ nakai ta ni awuɔ bɔni afee ni gbɔmɔ aná heyeli lɛ mli baa ji, fitemɔ ni afiteɔ hegbɛ kɛ heyeli ni mɛi krokomɛi yɔɔ lɛ. Yɛ nakai nifeemɔ lɛ mli lɛ, agbeɔ hii, yei, kɛ gbekɛbii ni efeko nɔ ko lɛ yaka ni anyɛɛɛ atsĩ naa, ni abuɔ amɛgbele lɛ akɛ nɔ ni “mla ŋmɛɔ efeemɔ gbɛ” kɛtsɔ nifeemɔ lɛ ni amɛbuɔ lɛ akɛ sɛɛnamɔ yɛ he ni eja lɛ nɔ. Ákɛ nɔkwɛmɔnɔ lɛ, yɛ nyɛsɛɛ afi lɛ mli yɛ Ireland lɛ “heyeli namɔ he tawulɔi” kɛ okplɛm yawo kar ko mli yɛ maŋ bibioo ko ni atsɛɔ lɛ Omagh lɛ mli, ni egbe gbɔmɛi 29 ni leee sane lɛ he eko ni damɔ sɛɛ fɛlɛŋŋ lɛ, ni eye mɛi ohai abɔ awui.

Áwo Amɛ “Kɔsɔŋkɔsɔ” Lolo

Kɛ agbe ta lɛ naa lɛ, mɛni ji sɛɛnamɔ ni jɛɔ mli kɛbaa? Kɛji akɛ “heyeli he tawulɔi” lɛ ye kunim lɛ, heyeli fioo ko pɛ amɛnáa. Shi, ani amɛyeɔ amɛhe lɛɛlɛŋ? Yɛ maji ni ená heyeli babaoo ni yɔɔ hei ni atsɛɔ jɛmɛ akɛ jeŋ ni eye ehe lɛ mli lɛ, ani ejeee anɔkwale akɛ áwo gbɔmɛi “kɔsɔŋkɔsɔ” lolo ni amɛyɛ nuŋtsɔmɛi yiwalɔi tamɔ ohia, emuu ni ayeee, hela, kɛ gbele shishi? Te aaafee tɛŋŋ ni mɔ ko aaakɛɛ akɛ eye ehe yɛ be mli ni nibii ni tamɔ enɛɛmɛi miiya nɔ ni eeye lɛ nyɔŋ lɛ?

Blema Biblia ŋmalɔ Mose tsɔɔ bɔ ni shihilɛ ji ha lɛ mli yɛ gbɛ ni ja nɔ taakɛ eji kɛha mɛi babaoo yɛ yinɔsane mli kɛ ŋmɛnɛ hu lɛ. Ekolɛ wɔbaahi shi afii 70 loo 80, ni ekɛɛ, “amɛmli shwãanii lɛ, tɔlɛ kɛ yaka nii ni.” (Lala 90:10) Ani enɛ baatsake gbi ko? Ani wɔteŋ mɔ fɛɛ mɔ baanyɛ ahi shi ni etsui anyɔ emli kɛmɔ shi ni piŋmɔ kɛ gbeyeishemɔ ni mɛi babaoo kɛkpeɔ ŋmɛnɛ lɛ bɛ mli?

Biblia lɛ kɛɔ akɛ, hɛɛ! Ewieɔ “Nyɔŋmɔ bii lɛ anunyam heyeli lɛ” he. (Romabii 8:​21) Nyɛhaa wɔsusua nakai heyeli ni bɔfo Paulo wie he yɛ wolo ko ni eŋma eyaha Kristofoi ni yɔɔ Roma yɛ klɛŋklɛŋ afii oha lɛ mli lɛ he jogbaŋŋ wɔkwɛa. Yɛ nɛkɛ wolo nɛɛ mli lɛ, Paulo tsɔɔ bɔ ni wɔteŋ mɔ fɛɛ mɔ baanyɛ aná anɔkwa “anunyam heyeli” ni sɛɛ tsɛɔ lɛ he sɛɛ lɛ mli faŋŋ.

[Caption on page 3]

Ajie kɛjɛ wolo ni ji Beacon Lights of History, Kpo XIII lɛ mli