Sanebimɔi Ni Jɛ Kanelɔi Adɛŋ

Ani mɔ ‘kadimɔ’ ni atsĩ tã yɛ 2 Tesalonikabii 3:​14 lɛ ji asafo muu fɛɛ nifeemɔ, aloo eji nɔ ko ni Kristofoi aŋkroaŋkroi feɔ koni amɛkɛtsi amɛhe kɛjɛ toigbolɔi ahe?

Nɔ ni bɔfo Paulo ŋma eyaha Tesalonikabii lɛ tsɔɔ akɛ, asafoŋ onukpai lɛ yɛ nitsumɔ pɔtɛɛ ko tsumɔ yɛ ‘mɔ kadimɔ’ ni tamɔ nakai mli. Shi yɛ sɛɛ mli lɛ, Kristofoi aŋkroaŋkroi baaya nɔ amɛtsu he nii kɛ mumɔŋ otii yɛ amɛjwɛŋmɔi amli. Wɔhiɛ baanyɛ asɔ enɛ jogbaŋŋ kɛji akɛ wɔsusu nɔ ni ba diɛŋtsɛ ni ha Paulo kɛ ŋaawoo lɛ ha lɛ he lɛ.

Paulo ye ebua ni ato Tesalonika asafo lɛ ama shi, ni eye ebua hii kɛ yei ni amɛbatsɔmɔ heyelilɔi. (Bɔfoi lɛ Asaji 17:​1-⁠4) Sɛɛ mli lɛ, eŋma wolo kɛjɛ Korinto ni ekɛjie amɛyi, ni ewo amɛ hewalɛ. Paulo kɛ ŋaawoo ni he hiaa hu ha. Ewo amɛ ŋaa koni ‘amɛhi shi dioo, ni amɛhiɛ amɛ diɛŋtsɛ amɛnitsumɔ mli ni amɛkɛ amɛniji atsu nii.’ Akɛni mɛi komɛi efeee nakai hewɔ lɛ, Paulo kɛfata he akɛ: “Wɔmiikpa nyɛ fai, anyɛmimɛi, nyɛwiea nyɛtsɔa mɛi ni bɛ gbɛjianɔtoo lɛ; nyɛshɛjea mɛi ni tsui faa lɛ amii; nyɛherea mɛi ni feɔ gbedee lɛ.” Eyɛ faŋŋ akɛ, mɛi komɛi yɛ ni “bɛ gbɛjianɔtoo”a ni ehe miihia ni awo amɛ ŋaa.​—⁠1 Tesalonikabii 1:​2-​10; 4:​11; 5:⁠14.

Nyɔji komɛi asɛɛ lɛ, Paulo ŋma ewolo ni ji enyɔ lɛ eha Tesalonikabii lɛ, ni ekɛ saji krokomɛi ni kɔɔ ba ni Yesu baaba wɔsɛɛ lɛ he lɛ fata he. Paulo kɛ gbɛtsɔɔmɔi hu ni tsɔɔ bɔ ni esa akɛ akɛ mɛi ni bɛ gbɛjianɔtoo ‘ni amɛtsuuu nii ni amɛyeee amɛ diɛŋtsɛ amɛdɛŋ ŋmaa’ lɛ aye aha. Amɛ nifeemɔi lɛ kɛ Paulo nɔkwɛmɔnɔ ákɛ mɔ ni tsuɔ ni waa, kɛ mɔ ni yɔɔ gbɛjianɔtoo yɛ nitsumɔ mli ni ekɛyeɔ ebuaa ehe lɛ kpãaa gbee. (2 Tesalonikabii 3:​7-12) Paulo tsɔɔ akɛ esa akɛ atsu nibii komɛi ahe nii. Atsu nɛkɛ nibii nɛɛ ahe nii beni onukpai lɛ etsu nii kɛwo mɔ ni bɛ gbɛjianɔtoo lɛ ŋaa lɛ sɛɛ. Paulo ŋma akɛ:

“Shi, anyɛmimɛi, wɔmiiwo nyɛ kita . . . akɛ nyɛkɛ nyɛmi fɛɛ nyɛmi ni enyiɛɛɛ gbɛjianɔ yɛ nii ni wɔtuu wɔwo nyɛdɛŋ lɛ anaa lɛ agbala mli. Shi nyɛ lɛ, anyɛmimɛi, nyɛkahaa ejurɔfeemɔ miitɔa nyɛ. Shi kɛ mɔ ko booo wɔwiemɔ ni yɔɔ wolo lɛ mli lɛ toi lɛ, nyɛkadia lɛ, ni nyɛkɛ lɛ akabɔa, koni ehiɛ agbo.”​—⁠2 Tesalonikabii 3:​6, 13-​15.

No hewɔ lɛ, nɔ ni fata mli ni akɛ mɛi ni bɛ gbɛjianɔtoo lɛ gbalaa lɛ he ji, amɛ kadimɔ, amɛ ni akɛaakpa bɔɔ, shi kɛlɛ, abaawo amɛ ŋaa lolo akɛ nyɛmimɛi. Mɛni baatsirɛ asafo lɛ mli bii lɛ koni amɛtsu nakai nibii lɛ ahe nii? Nyɛhaa wɔkwɛa shihilɛi etɛ ni Paulo gbalaaa jwɛŋmɔ kɛyaaa nɔ, koni eye ebua wɔ ni wɔnu shishi.

1. Wɔle akɛ Kristofoi yeee emuu, ni amɛyɛ fãtɔi. Fɛɛ sɛɛ lɛ, suɔmɔ ji nɔ ni kadiɔ anɔkwa Kristojamɔ, ni ebiɔ ni wɔnu mɛi krokomɛi ashishi, ni wɔkɛ amɛtɔ̃mɔi ake amɛ. Ákɛ nɔkwɛmɔnɔ lɛ, Kristofonyo ko mli baafu waa, taakɛ eba lɛ yɛ Barnaba kɛ Paulo teŋ lɛ. (Bɔfoi lɛ Asaji 15:​36-40) Aloo ekolɛ, yɛ tɔlɛ hewɔ lɛ, mɔ ko kɛ mɔ ko baawie bambam, aloo ebaajɛ mɔ ko. Yɛ nɛkɛ shihilɛi amli lɛ, suɔmɔ kɛ Biblia ŋaawoo kɛ nitsumɔ baanyɛ eha wɔha tɔ̃mɔ lɛ nɔ, ni wɔya nɔ wɔkɛ wɔnaanyo Kristofonyo lɛ ahi shi, wɔkɛ lɛ abɔ, ni wɔkɛ lɛ atsu nii. (Mateo 5:​23-25; 6:​14; 7:​1-⁠5; 1 Petro 4:⁠8) Eyɛ faŋŋ akɛ, jeee fãtɔi nɛɛ ahe Paulo wieɔ yɛ 2 Tesalonikabii lɛ.

2. Jeee shihilɛ ni Kristofonyo ko diɛŋtsɛ ehala akɛ ekɛ mɔ ko ni egbɛ̀i aloo esubaŋ ehiii ebɔŋ naanyo gbagbalii lɛ ahe Paulo wieɔ​—⁠ákɛ nɔkwɛmɔnɔ lɛ, mɔ ko ni etamɔ nɔ ni ekɛ ejwɛŋmɔ fɛɛ fɔ̃ɔ hiɛtserɛjiemɔ aloo heloonaa nibii anɔ. Aloo ekolɛ, fɔlɔ ko haŋ ebi ko kɛ gbekɛbii ni ebuuu amɛfɔlɔi, ni shwɛɔ basabasa aloo amɛshwɛɔ shwɛmɔi ni yɔɔ oshara, aloo amɛkɛ hiɛdɔɔ susuuu Kristojamɔ he abɔ gbagbalii. Yɛ nɔ ni wɔkaneɔ yɛ Abɛi 13:​20 lɛ kɛ gbeekpamɔ naa lɛ, enɛ ji mɔ aŋkro yiŋkpɛɛ kɛkɛ, he ni kɛɔ akɛ: “Mɔ ni kɛ nilelɔi nyiɛɔ lɛ, eetsɔ nilelɔ; shi mɔ ni kɛ kwashiai bɔɔ lɛ, eeená amane.”​—⁠Okɛto 1 Korintobii 15:​33 he.

3. Yɛ gbɛ ni yɔɔ srɔto nɔ lɛ, Paulo kɛ hiɛdɔɔ ŋma Korintobii lɛ yɛ nɔ ni kɔɔ mɔ ko ni feɔ eshai wuji ni etsakeee etsui lɛ he. Esa akɛ ajie eshafeelɔi ni tamɔ mɛnɛɛmɛi ni tsakeee amɛtsui lɛ kɛjɛ asafo lɛ mli. Yɛ shishinumɔ ko naa lɛ, esa akɛ atuu “mɔfɔŋ” lɛ awo Satan dɛŋ. Yɛ no sɛɛ lɛ, esaaa akɛ Kristofoi anɔkwafoi lɛ kɛ efɔŋfeelɔi ni tamɔ mɛnɛɛmɛi bɔɔ; bɔfo Yohane wo Kristofoi lɛ ŋaa koni amɛkaŋa amɛ po. (1 Korintobii 5:​1-13; 2 Yohane 9-11) Shi kɛlɛ, enɛ hu kɔɔɔ ŋaawoo ni yɔɔ 2 Tesalonikabii 3:​14 lɛ he.

Taakɛ atsɔɔ mli yɛ 2 Tesalonikabii lɛ mli lɛ srɔtofeemɔ ni yɔɔ shihilɛi etɛ lɛ amli ji ‘gbɛjianɔtoo ni abɛ.’ Paulo ŋma akɛ, mɛnɛɛmɛi ji ‘nyɛmimɛi’ lolo ni esa akɛ awo amɛ ŋaa ni akɛ amɛ aye yɛ nakai gbɛ nɔ hu. Enɛ hewɔ lɛ, naagba ni tsɔɔ “gbɛjianɔtoo” ni nyɛmimɛi “bɛ” lɛ kɔɔɔ Kristofoi aŋkroaŋkroi asaji kɛkɛ ahe, ni asaŋ ekɔɔɔ naagba wulu ko ni ehe miihia ni asafoŋ onukpai akɔ amɛhe awo mli koni amɛtsu mɔ shwiemɔ he nii, taakɛ Paulo fee yɛ nɔ ni kɔɔ jeŋba shara shihilɛ ni tee nɔ yɛ Korinto lɛ. Mɛi ni “bɛ gbɛjianɔtoo” lɛ yeee eshafeemɔ wulu ko mli fɔ́, taakɛ eji yɛ nuu ni ashwie lɛ yɛ Korinto lɛ gbɛfaŋ lɛ.

Mɛi ni “bɛ gbɛjianɔtoo” yɛ Tesalonika lɛ yeɔ fɔ́ yɛ afã ni amɛgba ni hiɛdɔɔ yɔɔ mli kɛjɛ Kristojamɔ he lɛ mli. Amɛsumɔɔɔ ni amɛtsu nii, akɛni amɛsusuɔ akɛ Kristo sɛɛkuu lɛ etsɛŋ kwraa, aloo akɛni amɛji anihaolɔi lɛ hewɔ. Kɛfata he lɛ, akɛni ‘amɛyeee amɛ diɛŋtsɛ amɛdɛŋ ŋmaa’ hewɔ lɛ, amɛkɛ naagbai wuji miiba. Yɛ ŋaawoo ni Paulo kɛha yɛ eklɛŋklɛŋ wolo lɛ kɛ ŋwɛi ŋaawoo krokomɛi lɛ kɛ gbeekpamɔ naa lɛ, ekolɛ asafoŋ onukpai lɛ ewo amɛ ŋaa shii abɔ. (Abɛi 6:​6-​11; 10:​4, 5; 12:​11, 24; 24:​30-​34) Fɛɛ sɛɛ lɛ, amɛtee nɔ amɛfee nibii kɛgbe asafo lɛ he guɔ ní baanyɛ agbɛ ashwa Kristofoi krokomɛi ateŋ. No hewɔ lɛ, Paulo, ni ji Kristofonyo onukpa lɛ, etsĩii mɛi lɛ agbɛi atã moŋ, shi eha ale gbɛjianɔtoo ni amɛbɛ lɛ yɛ mɛi ahiɛ, ni ekɛjie gbɛ ni ejaaa ni amɛkɔ lɛ kpo.

Eha asafo lɛ hu le akɛ, eja gbɛ akɛ amɛ, ni amɛji Kristofoi aŋkroaŋkro lɛ ‘aaakadi’ mɛi ni bɛ gbɛjianɔtoo lɛ. Enɛ tsɔɔ akɛ esa akɛ aŋkroaŋkroi ayɔse mɛi ni amɛ nifeemɔi kɔɔ nɔ ni asafo lɛ hɛleɔ mɛi ashi yɛ he yɛ faŋŋ mli lɛ. Paulo wo ŋaa akɛ, “amɛkɛ nyɛmi fɛɛ nyɛmi ni enyiɛɛɛ gbɛjianɔ lɛ . . . agbala mli.” No etsɔɔɔ akɛ amɛbaakpoo gbɔmɔ ni tamɔ nɛkɛ kwraa, ejaakɛ esa akɛ “amɛya nɔ amɛwo lɛ ŋaa lolo akɛ nyɛmi.” Amɛbaaya nɔ amɛkɛ lɛ baabɔ akɛ Kristofonyo yɛ kpeei ashishi, kɛ ekolɛ yɛ sɔɔmɔ nitsumɔ lɛ mli. Amɛbaanyɛ amɛná hiɛnɔkamɔ akɛ amɛ nyɛmi lɛ baabo amɛ ŋaawoo lɛ toi ni eje gbɛ ni kɛ naagba baa lɛ nɔ.

‘Amɛkɛ lɛ baagbala mli’ yɛ mɛɛ shishinumɔ naa? Eka shi faŋŋ akɛ yɛ mɔ kɛ sharamɔ shishinumɔ ko naa. (Okɛto Galatabii 2:​12 he.) Kɛji akɛ amɛkɛ lɛ kpa bɔɔ kɛ shwɛmɔ lɛ, ebaaha ena akɛ gbɔmɛi ni kɛ shishitoo mla tsuɔ nii lɛ sumɔɔɔ gbɛ ni ekɔ lɛ. Kɛji akɛ ehiɛ gbooo ni etsakeee po lɛ, kɛhoo lɛ, mɛi krokomɛi ekaseŋ egbɛ̀i lɛ koni amɛtamɔ lɛ. Yɛ nakai beaŋ nɔŋŋ lɛ, esa akɛ nɛkɛ Kristofoi aŋkroaŋkroi nɛɛ agbala amɛjwɛŋmɔ kɛya nibii ni baatswa lɛ ema shi nɔ. Paulo wo ŋaa akɛ: “Shi nyɛ lɛ, anyɛmimɛi, nyɛkahaa ejurɔfeemɔ miitɔa nyɛ.”​—⁠2 Tesalonikabii 3:⁠13.

Eka shi faŋŋ akɛ, ŋaawoo nɛɛ ni bɔfo lɛ kɛhaa lɛ jeee nɔdaamɔnɔ ni wɔkɛaaba wɔnyɛmimɛi ni tɔ̃ɔ tɔ̃mɔi bibii lɛ ashi aloo ni wɔɔkojo amɛ. Shi moŋ jwɛŋmɔ ni yɔɔ sɛɛ lɛ ji ni aye abua mɔ ni ekɔ gbɛ ni kɛ naagba ni hiɛdɔɔ yɔɔ mli baa ni teɔ shi ewoɔ Kristojamɔ.

Paulo etsɔɔɔ nibii ni esa akɛ afee lɛ amli fitsofitso tamɔ nɔ ni eebɔ mɔdɛŋ ni ekɛ nifeemɔ gbɛ ko ni yɔɔ ŋwanyaŋŋ aha. Shi eyɛ faŋŋ akɛ, esa akɛ klɛŋklɛŋ lɛ, onukpai lɛ awo mɛi ni bɛ gbɛjianɔtoo lɛ ŋaa ni amɛbɔ mɔdɛŋ amɛye amɛbua lɛ. Kɛ amɛyeee omanye, ni mɔ lɛ miiya nɔ eenyiɛ gbɛ ni kɛ naagba baa lɛ nɔ lolo lɛ, amɛbaanyɛ amɛmu sane naa akɛ, esa akɛ ahɛle asafo lɛ shi yɛ he. Amɛbaanyɛ amɛto maŋshiɛmɔ he gbɛjianɔ koni amɛkɛtsɔɔ nɔ hewɔ ni esa akɛ amɛtsi amɛhe kɛjɛ gbɔmɛi ni tamɔ nɛkɛ ni bɛ gbɛjianɔtoo lɛ ahe lɛ. Amɛtsĩŋ mɛi lɛ agbɛi atã moŋ, shi kɔkɔbɔɔ ni baajɛ maŋshiɛmɔ lɛ mli lɛ baaye ebua koni akɛbu asafo lɛ he, ejaakɛ ebaaha mɛi ni feɔ toiboo lɛ ale amɛhe nɔ kwɛmɔ koni amɛkɛ mɔ fɛɛ mɔ ni enifeemɔ tsɔɔ akɛ ebɛ gbɛjianɔtoo ni tamɔ nakai lɛ akabɔ tsɔ̃.

Hiɛnɔkamɔ yɛ akɛ, yɛ be ni sa mli lɛ, mɔ ni bɛ gbɛjianɔtoo lɛ hiɛ baagbo yɛ gbɛ ni ekɔ lɛ hewɔ, ni ebaatsake. Yɛ be mli ni onukpai lɛ kɛ mɛi krokomɛi ni yɔɔ asafo lɛ mli lɛ naa tsakemɔ lɛ, aŋkroaŋkroi baanyɛ akpɛ amɛyiŋ koni amɛkɛ lɛ abɔ gbagbalii agbɛnɛ.

Belɛ, yɛ sane naamuu mli lɛ: Asafoŋ onukpai lɛ ji mɛi ni nyiɛɔ hiɛ yɛ yelikɛbuamɔ kɛ ŋaawoo ni akɛhaa mɔ ko ni bɛ gbɛjianɔtoo lɛ mli. Kɛji akɛ enaaa tɔ̃mɔ ni yɔɔ gbɛ ni ekɔ lɛ he, ni eeya nɔ eená mɛi anɔ hewalɛ ni esaaa lɛ, no lɛ onukpai lɛ baanyɛ abɔ asafo lɛ kɔkɔ kɛtsɔ wiemɔ ko ni baaha jwɛŋmɔ ni Biblia lɛ yɔɔ yɛ he lɛ afee faŋŋ​—⁠kɛ ekɔɔ nuu kɛ yoo kpojee he, ni mɔ kroko lɛ ji mɔ ko ni heee yeee, aloo bɔ fɛɛ bɔ ni gbɛ gbonyo ni ekɔ lɛ ji ha lɛ fɛɛ sɛɛ. (1 Korintobii 7:​39; 2 Korintobii 6:​14) Enɛ hewɔ lɛ, Kristofoi ni ahɛle amɛ shi yɛ asafo lɛ mli lɛ baanyɛ amɛkpɛ yiŋ amɛha amɛ diɛŋtsɛ amɛhe koni amɛkɛ mɔ ni bɛ gbɛjianɔtoo shi eji nyɛmi lolo lɛ akabɔ tsɔ̃.

[Shishigbɛ niŋmai]

[Mfonirii ni yɔɔ baafa 31]

Kristofoi onukpai woɔ mɛi ni bɛ gbɛjianɔtoo lɛ ŋaa, ni kɛlɛ amɛnaa amɛ akɛ nanemɛi heyelilɔi lolo