Gbɛtsɔɔmɔ yɛ Nanemɛi Kpakpai Ahalamɔ Mli

TAAKƐ Reader’s Digest wolo lɛ tsɔɔ lɛ, gbekɛbii kwɛɔ amɛnanemɛi moŋ agbɛ kɛha gbɛtsɔɔmɔ yɛ atadewoo kɛ lala toiboo mli fe amɛfɔlɔi. Enɛ hewɔ lɛ, ehe miihia ni fɔlɔi ale mɛi ni amɛbii lɛ kɛbɔɔ kɛ he ni amɛkɛ amɛ bɔɔ yɛ.

Esmé van Rensburg, ni ji tsɔɔlɔ nukpa ni tsɔɔ nii yɛ ŋaalee nitsumɔhe lɛ yɛ South Africa univɛsiti ko lɛ kɛɔ akɛ: “Eji gbɛnaa nii ni kã onɔ akɛ otao ni ole.” Ekɛfata he akɛ: “Eka shi faŋŋ akɛ obii lɛ amli baafu bo, shi amɛhe baajɔ.” Kɛkɛ ni ekɛ ŋaawoi ni nyiɛ sɛɛ nɛɛ ha fɔlɔi. Esa akɛ mlai ni abaawo lɛ afee nɔ ni jwɛŋmɔ yɔɔ mli, ni hiɛ shishitoo mlai ni shishinumɔ yɔɔ mli; bo obi lɛ toi; kaafee nii kɛteke nɔ, shi too otsui shi, ni ole nɔ ni osumɔɔ akɛ okɛɛ. Kɛji akɛ obi lɛ eje naanyobɔɔ ni esaaa shishi momo lɛ, no lɛ gbalamɔ ojwɛŋmɔ kɛya subaŋ ni ehiii ni naanyobɔɔ lɛ kɛba lɛ nɔ moŋ fe ni ooofã koni afo naanyobɔɔ lɛ sɛɛ kwraa.

Ŋaawoo ni hi kɛha fɔlɔi yɛ Nyɔŋmɔ Wiemɔ, ni ji Biblia lɛ mli etsɛ. Ákɛ nɔkwɛmɔnɔ lɛ, ekɛɔ akɛ: ‘Wɔhe afee oya kɛ ninumɔ, wɔhumi shi kɛ wiemɔ, wɔhumi shi kɛ mlifu.’ (Yakobo 1:​19) Ŋmalɛi lɛ hu kɛ ŋaawoo kpakpa haa yɛ bɔ ni wɔɔhala nanemɛi wɔha: “Mɔ ni kɛ nilelɔi nyiɛɔ lɛ, eetsɔ nilelɔ; shi mɔ ni kɛ kwashiai bɔɔ lɛ, eeená amane.” (Abɛi 13:​20) Nɛkɛ nɔkwɛmɔnii nɛɛ tsɔɔ nilee ni yɔɔ kɛha mɛi ni kaneɔ Biblia lɛ kɛ hiɛsɔɔ, ni amɛtsuɔ nibii ni ekɛɔ lɛ ahe nii daa gbi yɛ amɛshihilɛ mli lɛ.