Biblia Shishitsɔɔmɔ Kɛtsɔ Namɔ Hewalɛ Nɔ?
SHISHITSƆƆMƆ ko tsɔɔ wiemɔ ni ji, “tsɔɔ shishi” lɛ shishi akɛ “ní aaayɔse aŋkroaŋkro susumɔ yɛ hemɔkɛyeli, kojomɔ, loo shihilɛ mli.” (Webster’s Ninth New Collegiate Dictionary) No hewɔ lɛ, yɛ bei babaoo mli lɛ, shihilɛ mli ni mɔ ko jɛ, ewoloŋlee kɛ tsɔsemɔ ni ená lɛ náa enɔ hewalɛ yɛ nɔ fɛɛ nɔ ni etsɔɔ shishi lɛ mli.
Ni kɛlɛ, Biblia shishitsɔɔmɔ hu? Ani wɔyɛ heyeli ni wɔkɛaatsɔɔ Biblia mli wiemɔi lɛ ashishi yɛ bɔ ni wɔ diɛŋtsɛ wɔ “hemɔkɛyeli, kojomɔ, aloo shihilɛ” ji lɛ naa? Taakɛ wɔbaakpa gbɛ lɛ, Biblia mli woloŋlelɔi kɛ shishitsɔɔlɔi titri tsɔɔ akɛ amɛfeee nakai, shi Nyɔŋmɔ moŋ ji amɛgbɛtsɔɔlɔ.
Nɔkwɛmɔnɔ kome ji nɔ ni awie yɛ shishigbɛ niŋmaa kɛha Yohane 1:1 yɛ A New Version of the Four Gospels, ní John Lingard fee yɛ afi 1836 kɛ sablã ni ehiɛ ni ji “Katoliknyo Ko” lɛ mli lɛ. Ekɛɔ akɛ: “Hii ni jɛ hemɔkɛyelii fɛɛ amli lɛ jɛɔ ŋmalɛi krɔŋkrɔŋi lɛ amli amɛmaa amɛ jwɛŋmɔi anɔ mi: shi, yɛ anɔkwale mli lɛ, jeee Ŋmalɛ lɛ nɔ amɛdamɔɔ, shi amɛ diɛŋtsɛ amɛkɛ amɛ shishinumɔ fataa Ŋmalɛ lɛ mli wiemɔ lɛ he.”
Eyɛ mli akɛ akpɛlɛ oti lɛ nɔ moŋ, shi mɛni ji niŋmalɔ lɛ yiŋtoo? Eniiamlitsɔɔmɔ lɛ miifi bɔ ni etsɔɔ nakai kuku lɛ shishi eha lɛ sɛɛ, nɔ ni etsɔɔ shishi akɛ: “Shishijee lɛŋ lɛ ‘wiemɔ lɛ’ yɛ, ni ‘wiemɔ lɛ’ kɛ Nyɔŋmɔ yɔɔ, ni ‘wiemɔ lɛ’ Nyɔŋmɔ ni” lɛ, ji Triniti tsɔɔmɔ lɛ shishitsɔɔmɔ diɛŋtsɛ.
Mɛni tsirɛ niŋmalɔ lɛ koni etsɔɔ Yohane 1:1 lɛ shishi ni ekɛfi Triniti tsɔɔmɔ lɛ sɛɛ? Ani ‘Ŋmalɛ lɛ nɔ edamɔ’ ni efee nakai? Enyɛŋ eba mli nakai ejaakɛ anaaa Triniti tsɔɔmɔ lɛ yɛ Biblia lɛ mli he ko he ko. Kadimɔ nɔ ni The New Encyclopædia Britannica lɛ kɛɛ yɛ nɛkɛ oti nɛɛ he akɛ: “Asaŋ wiemɔ ni ji Triniti lɛ loo tsɔɔmɔ ni ale waa lɛ ejeee kpo yɛ Kpaŋmɔ Hee lɛ mli.” Kɛfata he lɛ, nilelɔ E. Washburn Hopkins ni tsɔɔ nii yɛ Yale University lɛ kɛɛ akɛ: “Eyɛ faŋŋ akɛ, Yesu kɛ Paulo lé triniti tsɔɔmɔ lɛ he nɔ̃ ko; . . . amɛwieee nɔ ko yɛ he.”
Agbɛnɛ, te wɔbaamu sane naa wɔha tɛŋŋ yɛ mɛi ni fĩɔ Triniti shishitsɔɔmɔ ni yɔɔ Yohane 1:1 lɛ, aloo Biblia mli sane kroko ko sɛɛ lɛ? Kɛtsɔ Ow. Lingard diɛŋtsɛ nɔdaamɔ nɔ lɛ nɔ lɛ, “jeee Ŋmalɛ lɛ nɔ amɛdamɔɔ, shi amɛ diɛŋtsɛ amɛkɛ amɛ shishinumɔ fataa Ŋmalɛ lɛ mli wiemɔ lɛ he.”
Miishɛɛ sane ji akɛ, wɔyɛ Nyɔŋmɔ diɛŋtsɛ Wiemɔ lɛ ni baakudɔ wɔ yɛ enɛ mli. Bɔfo Petro kɛɛ akɛ: “Nyɛle enɛ tsutsu akɛ ŋmalɛ lɛŋ gbalɛ fɛɛ gbalɛ lɛ ejɛɛɛ gbɔmɔ ko shishitsɔɔmɔ mli. Ejaakɛ gbalɛ ko bako yɛ gbɔmɔ suɔmɔ naa pɛŋ, shi moŋ Mumɔ krɔŋkrɔŋ lɛ tsirɛɔ Nyɔŋmɔ gbɔmɛi krɔŋkrɔŋi lɛ ni amɛwieɔ.”—2 Petro 1:20, 21.