Maŋtsɛyeli Jajelɔi Bɔ Amaniɛ

Odasefoi lɛ Hã Saji Fee Faŋŋ Hã France Maŋbii Lɛ

YEHOWA ODASEFOI ni yɔɔ France lɛ kɛ ekãa ja dɛhiɛmɔ wolo ni yitso ji People of France, You Are Being Deceived! (Francebii, Aalaka Nyɛ!) lɛ, ekomekomei akpekpei 12 kɛjɛ Sohaa, January 29, 1999, leebi mra kɛtsa nɔ kɛbote otsi lɛ naagbee mli yɛ gbɛjegbɛi lɛ anɔ, kɛ sɛɛ mli lɛ kɛtee shia kɛ shia hu. Mɛni hewɔ afã nakai tafaa lɛ?

Atsɔɔ yiŋtoo kɛha nakai tafaa lɛ mli yɛ gwabɔɔ kɛha sanegbaa ni tee nɔ yɛ Paris nakai Sohaa leebi lɛ. Odasefonyo naawielɔ ko tsɔɔ akɛ: “Nɔ ni wɔtaoɔ wɔfee amrɔ nɛɛ ji ni wɔha ale wɔ jogbaŋŋ ni agbɛnɛ hu, wɔku wɔheguɔ ni agbɛɔ kɛshwãa lɛ naa. Wɔbaakpɛlɛ ni awie wɔhiɛ, shi wɔkaŋ he wɔboŋ amalei kɛ wiemɔi ni fiteɔ wɔ gbɛi lɛ atoi dɔŋŋ.”

Eyɛ mli akɛ Yehowa Odasefoi lɛ ji Kristofoi ajamɔ ni da fe fɛɛ lɛ ateŋ nɔ ni ji etɛ yɛ France moŋ, shi ajɛ́ Odasefoi abii babaoo ni afee amɛ niseniianii yɛ skul. Ashwie onukpai kɛjɛ amɛ nitsumɔi amli ni awo amɛhe gbeyei yɛ amɛ jamɔ lɛ hewɔ. Naakpɛɛ sane ji akɛ, atao jamɔ mli tooyelii ni amɛ nine eshɛ nɔ lɛ po mli akwɛ, ni aheɔ oha mlijaa 60 too yɛ amɛdɛŋ. Mɛɛ gbɛ nɔ tafaa lɛ tsu nɛkɛ hiɛaŋkwɛmɔ nɛɛ he nii yɛ?

Dɛhiɛmɔ wolo lɛ jaje akɛ: “Yehowa Odasefoi lɛ kɛ amɛ nanemɛi 250,000 ni yɔɔ France lɛ ETE SHI AMƐSHI anɔkwa ni ayeee amɛ Kristofoi ajamɔ ni étee nɔ yɛ France kɛjɛ afi 1900 lɛ, ni afee ekɛ kuui ni he yɔɔ oshara lɛ ekome kɛjɛ afi 1995 . . . lɛ. AMƐTE SHI AMƐSHI niseniianii ni afeɔ amɛ daa gbi lɛ hewɔ.” Aha heguɔgbee naafolɔmɔi ni akɛba Odasefoi anɔ yɛ France lɛ kɛ shishiumɔ gbɛ̀i ni heguɔgbelɔi tao koni amɛkɛhã maŋbii aná jwɛŋmɔ ni ejaaa yɛ amɛhe lɛ efee faŋŋ. Dɛhiɛmɔ wolo lɛ mu sane naa akɛ: “Yehowa Odasefoi ni fe akpekpei enyɔ kɛ amɛ nanemɛi yɛ Europa ŋmɛnɛ. Amɛtsɔɔ bulɛ kpo ni amɛjieɔ amɛhaa Sanekpakpa lɛ mli saji ni he hiaa lɛ nɔ amɛkɛ bulɛ haa mlai ni Nɔyelii ni amɛyɔɔ amɛshishi lɛ ewo lɛ. Francebii, anɔkwalei lɛ nɛ. Eji sɔ̃ ni kã wɔ nɔ akɛ wɔha nyɛle anɔkwalei nɛɛ, taakɛ bɔ ni amɛji lɛ!”

Akpɛlɛ Nɔ Oya kɛ Jwɛŋmɔ ni Ja

Aja dɛhiɛmɔ woji lɛ akpekpei abɔ yɛ klɛŋklɛŋ gbi lɛ nɔ. Beni shɛɔ shwane mli lɛ, Odasefoi ni fe 7,000 kɛ dɛhiɛmɔ woji ni fe 1,300, 000 eha gbɔmɛi lɛ yɛ Paris pɛ. Eka shi faŋŋ akɛ enɛ ji klɛŋklɛŋ kwraa ni gbɔmɛi lɛ naa akɛ Odasefoi lɛ miija dɛhiɛmɔ woji yɛ gbɛjegbɛi lɛ anɔ. Gbɛ̀i anɔ ni atsɔɔ atswaa adafi, ní maŋ lɛ kɛ akutsoŋ adafitswaa woji ní tɛlɛvishiŋ fata he lɛ kpɛlɛ tafaa nɛɛ nɔ jogbaŋŋ. Adafitswaa wolo ni ji Le Progrès de Lyon lɛ ŋma akɛ: “Nɛkɛ mɔdɛŋbɔɔ nɛɛ . . . hã wiemɔ ko ni anuuu shishi lɛ fee faŋŋ. Yɛ afii nyɔŋma ni eho lɛ mli lɛ, wiemɔ ni ji ‘mligbalamɔ kuu’ lɛ ená gbɛi fɔŋ, ni ji oshara, kɛ awuiyeli shishinumɔ. . . . Yehowa Odasefoi jeee mɛi ni he yɔɔ oshara ní eeeba lɛ akɛ no baaha amɛjwa maŋ.

Mɛi ni le Yehowa Odasefoi lɛ ahiɛ sɔɔ amɛ toiŋjɔlɛ su kɛ suɔmɔ ni mlikwɔ ni amɛyɔɔ kɛha shihilɛ gbɛjianɔtoo ni yɔɔ lɛ. No hewɔ lɛ, mɛi babaoo ni yɔɔ gbɛjegbɛi lɛ anɔ lɛ tsɔɔ hiɛsɔɔ kɛ sɛɛfimɔ ni amɛyɔɔ kɛha Odasefoi akpei nyɔŋmai abɔ ni ná gbɛfaŋnɔ yɛ tafaa lɛ mli lɛ he. Nine shɛ tɛlifoŋ, fas, kɛ woji anɔ amrɔ nɔŋŋ kɛjɛ maŋbii lɛ adɛŋ ni amɛkɛmiitsɔɔ amɛshidaa yɛ dɛhiɛmɔ wolo ni amɛnine shɛ nɔ lɛ hewɔ. Nɔ ni fe fɛɛ lɛ, aha anɔkwafoi lɛ hegbɛ ni amɛnu anɔkwalei ni kɔɔ Odasefoi lɛ ahe yɛ bɔ ni aka yiŋ awie amɛhe wiemɔi ni nilee bɛ mli lɛ fɛɛ sɛɛ, ni mɛi ni áwie amɛhemɔkɛyeli lɛ he efɔŋ lɛ, nyɛ amɛtsɔ amɛhenumɔi anɔ ni amɛtsɔɔ bɔ ni amɛbuɔ enɛ hã.